Acts 21

Pol Yerusalem ikiwok

Aria i ni feek ikeka wia naakep-puami aasa orop ikiwemik. Ne ikiwemi Kos mot oromik. Ne uurik ona Rodes mot oromik. Ne Rodes mot nain piipuap ikiwemi Patara mot oromik. Orop nan aasa oko Fonisia kame ikiwiya nain aawemik. Ne ikim-ikok Saiprus mot urufami asow ekeria-pa wuap nomakemik. Ne ikiwemi Siria kame-pa kererep Taiya owowa ekap kemena urupemik. Taiya nan maa koorma iiraremik. I owowa wiar urupep Kristen teeria wia imenap sande kuisow wiamiya nan ikemik. Nan ikemkun yiena Maneka Ewar Eliwa-ke wi Kristen kema wieya Pol Yerusalem me ikiwinok naep maakem-ikemik. Ne wiamiya nan ikok ikiwu naep onamkun wi emeria mua muuka wiipa ifer pona yia wiim-oromik. Yia wiim-orop i unowiya saa-pa nan keema muuna mikap Mua Maneka faremik. Farep weesereya ni feek ikeka wia naakep-puami i aasa iramkun wi kiiriw kirep owowa urupemik.

Agabus-ke Pol koora ekowa nain maakek

Ne i Taiya piipuap ikiwemi Tolemes owowa-pa fuunemik. Fuunep nan wi Kristen teeria wia urufami fofa kuisow wiamiya ikemik. Ne uurik ona wia piipuap ikiwep Sisaria-pa fuunemik. Fuunep Filip koora wiar ikiwep nan ikemik. Iiriw wi mua ikur okaiwi-pa erup wi Kristen teeria maa enowa wia urufam-ikomamik nain mua oko Filip nanek. Ona wiipa erepam me muewemik nain wi Mua Maneka opor kokosa aakunimik.

10 Ne i fofa papako Filip koora-pa wiar ikemkun mua unuma Agabus naimik nain-ke Yuudia-pa ikok yiar ekapok. Mua nain pun profet-ke. 11 Os-ke ekapemi Pol inakirowa maala wiar aawep ona merena wapena wame kaikami maek, “Ewar Eliwa-ke feenap maeya maiyem, inakirowa wiar aawem mua nain wi Yuuda-ke ikoka Yerusalem-pa wapena merena feenap wiar kaikap owow oko teeria wapena-pa wiar wuikuan.” 12 Naap maeya i Kristen mua papako unowiya Pol Yerusalem me ikiwe akena naakemi sisewaremik. Ne wia, ona yia maakek, “Ni moram omemi yo kema efa samoriman? 13 Yo Yerusalem ikiwinen. Neek ikok koora ekowa nain maa marew, ne yiena Maneka Yeesus unuma-pa umowa nain pun eliw oram naiyem.” 14 Naap maeya i kookalowa wiar puukowa me pepekeya maemik, “Mua Maneka ona kamenap kookalep-na eliw naap oninok.” Naap maemi kiiriw me maakemik.

Pol ona uuwak nain woos mua amisa wiek

15 Aria naap iki-ikok iir oko-pa i maa unowa opap soomaremik. 16 Ne Sisaria Kristen mua papako pun yiamiya ikiwemik. Yiamiya ikiwemi era-pa Saiprus mua oko unuma Nason naimik nain koora yia pikiwemik. Mua nain iiriwiw Yeesus opora wiar opak. Ne i ikiwep o koora-pa wiar inemik. 17 Aria ikiwemi Yerusalem-pa fuunemkun wi Kristen woos mua-ke sira eliwa-pa yia aawemik. 18 Ne uurik ona Pol i unowiya Yems ne wi Kristen woos mua papako wia urufowa ikiwemik. Wi unowiya wiam fiirimep ikaiwkin i wiar fuunemik. 19 Ne Pol-ke sira eliwa wia naemi ona uuwowa eena Mua Maneka kekanowa-pa owow unowa ikiwemi Yeesus opor eliwa wia maakem-miek nain opora sererkap wia nanaromak.

Wi woos mua Pol mia muura faow sira one maakemik

20 Ne wi Pol opora nain wiar miimap Mua Maneka unuma purupemik. Ne Pol maakemik, “No amisaren, i Yuuda mua unow akena Kristen aremik. Ne yiena kae sira iiriw Moses wuak nain pun kekanowa opam-ikaimik. 21 Ne mua papako-ke feenap nefa maimik, nos-ke wi Yuuda owowa oko purer wiokap ikemik nain feenap wia maaken, ‘Ni Moses sira wuak nain piipueka, niena muuka mia kanima wia puukowa sira nain piipueka, yiena kae sira nain me ookeka,’ anane naap maem-ikon nefa naimik. 22 Ne no aakisa fan ekapep ikon nain meta nefa miimikuan. Naeya i kamenap oniyen. 23 Naapeya no feenap onap-ko urufe, aakisa wi mua wiam erepam Mua Maneka unuma-pa opora koonowap-puamik nain no wi teeria wiar eke. 24 Ne unow onaiya mia muura faowa sira oneka. Ne wi afifa wia kaisomowa sesa nos-ke wia wuomaya afifa eliw wia kaisomuk. No naap oneya-na wi Yuuda nefa amisarikuan, i Moses sira wuak nain me yiar piipuan, naap nefa maikuan. Iiriw murarow opora nefa oniwkin wi miimap ikemik nain wadol opora-ke naikuan.

25 Ne wi owow oko teeria Yeesus opora wiar opamik nain i unowiya iiriw aakunep parosifa wia sesekomami naap wia maakemik, maa enowa inasina patirimik nain me wiar enimuk, ne maa eneka aka me enimuk. Ne maa eneka imakuna firirimiwkin umiya nain pun me enimuk, ne uruw mia kaikuk, i naap wia maakemik.”

26 Aria wi Pol opora nain maakiwkin uurik ona mua wiam erepam nain wia aawep unowiya mia muura faowa sira onamik. Onap unow onaiya tempel koora ikiwep wi pris wia maakemik, “I mia muura iirarep-puap fofa oko-pa Mua Maneka patirow maa onaiya ekapiyen,” naap wia maakemik.

Pol tempel koora kemena-pa opamik

27 Aria wi fofa ikur okaiwi-pa erup wuamik nain arep ikok iir oko Pol ona waisow tempel koora ikiwok. Ne wi Yuuda mua Esia kame-pa ikemik nain Yerusalem ekapep ikemik nain-ke o tempel koora-pa ikaeya urufamik. Urufap mua papako kema wia iikirowiwkin unow onaiya ikiwep opamik. Ne kiriremi maemik, 28 “Emar oo, yia asipami mua fain baliwep opikua! Mua fain-ke anane owow unowa wiar ikiwep, i Isrel yia maiya, ne Moses sira wuomakek nain pun yiar maiya, ne yiena tempel koora fain pun yiar maiya. Ne aakisa i tempel koora fain wi owow oko teeria me wia purupowa nain wia purupok. Naap onami i tempel koora sira yiar puukak.” Naap maemik. 29 Moram wi iiriw Pol Efesus mua Trofimus ikos Yerusalem-pa nan yiawem-ikaiwkin wia urufamik. Ne Pol Trofimus tempel koora me purupok nain wis-ke purupok naemik. 30 Naemi wi Yerusalem-ke opor makena-ke naep unowiya karuwiw ikiwep Pol tempel pika kemena-pa ikaeya opap muf-iraparemi owaruma poromik. Poriwkin ewur akena tempel pika omopora unowa nain upomakemik.

Ami mua maneka-ke ekapep Pol aawok

31 Aria wi Pol aruf-iraparemi ifakimu naep onam-ikaiwkin opora-ke ikiwep wi Rom ami woos mua wiar kererek, wi Yerusalem mua unowiya kirir-iraparemik, naap maemik. 32 Ne aria opora naap miimap ami mua papako wia aawep karuwiw ekapemik. Ekapiwkin wi Yuuda Pol arufam-ikok wia urufap piipuamik. 33 Ne ami mua maneka nain-ke ona teeria wia maakeya sen erup aawep Pol wapena wiar purekamik. Ne wia nokarek, “Mua fain naareke, ne maa mauwa oneya ifakimu naep oniman?” 34 Naap wia nokareya wi faremi opora ononer maemik. Opora wenu-wenup maimik nain o opor onoma-ko me wiar aawok. Naapeya ona teeria wia maakeya Pol aawep wiena pika pikiwemik. 35 Wi emeria mua unowiya fare-ookami maemik, “Ifakimiwkin uminok!” Ne aria pikiwem-ikok wiena pika iinan purupu naep oniwkin wi Yuuda mua-ke Pol arufu naep senam akena suuw-irapariwkin kiiriw akuawep purupemik.

Pol ami woos mua ikos aakunemik

37 Ne aria wi Pol pika kemena pikiwu naep oniwkin ami woos mua nain maakek, “Yo opora-ko efar ikua.” Naap maeya mua nain-ke maakek, 38 “Ei, no Grik opora wiar aakunen. Yo-ko no Isip mua-ke nefa naem. Iiriw irakow mua tausen erepam (4,000) wia aawep anim onoma yiamiya irakep baurarep epa asia nomon manekiw nain ikiwemik, mua nain-ke nefa naem.” 39 Ne Pol-ke maakek, “Weetak, yo Yuuda mua-ke, ne yo Silisia kame Tasus owowa-pa imenarem, ne yo owow maneka-ke. Yo wi fain opora-ko wia maakekam naep.” 40 Naeya ami woos mua-ke eliw naeya Pol iinan-pa iimarep ikok poporaruk naep wapeniw wia onomak. Ne wi unowiya poporariwkin ona Iibru oporiw wia maakek.

Copyright information for `MHL