Acts 22

Pol wi Yuuda opora wia maakek

Pol feenap wia maakek, “Ni mua iperowa ne emar unowik, yo efa miimeka. Yo opora efa maiman nain nia kiripomiyem.” Iibru oporiw naap wia maakeya wi ifaniw ikaiwkin maek, “Yo Yuuda mua-ke, Tasus-pa imenarem, Silisia kame-pa. Yo urupep Yerusalem-pa fan suule arem-ikok arimem, ne yena somek mua unuma Gamaliel. Os-ke Moses sira wuomakek nain eena kae-pa ekapok nain suule yiem-ikua, ne yo kae sira kekanowa akena wiar opiyem. Ni Mua Maneka opora ookowa kekaniman, ne yos pun naap kekanem-ikem. Naeya yo iiriw wi Yeesus sira fain ookam-ikemik nain wia weeser-wuowa naep samor akena wia ifakimem-ikem. Ne opora-pa wia wuami koora-pa wia wuam-ikem. Yo sira onam-ikem nain wi pris woos mua ne wi Kaunsel Maneka sira efar amisaremik. Ne wis-ke eliw efa maikuan. Yo naap onam-ikem nain wis-ke parosifa siisimep yiemik. Ne yo parosifa feekiya Damaskus ikiwep wi Yuuda parosifa wia ofakowami wi Kristen mua wia opinen naem. Wia opap Yerusalem wia pekapep opora-pa wia wuinen naem.

Yo nain naep ikiwem. Ikiwem-ikok ama gonegon naap owowa nain mamaiya arem-ikemkun aapereka-ke wilinek. Wilinemi efa mikeya wakiem. Ne miiwa-pa inep ikok iwakara oko feenap efa maakeya miimam, ‘Sol, Sol, no moram yo efa samoram-ikain?’ Naeya maakem, ‘Maneka, no naareke?’ Ne os-ke maek, ‘Yo Yeesus-ke, Nasaret mua, yo efa samoram-ikain nain-ke,’ naap efa maakek. Ne mua papako yo efamiya iwamik nain parina muutiw urufamik ne mua yo efamiya aakunem-ikua nain iwakara me miimamik. 10 Naeya nokarem, ‘Maneka, yo kamenap oninen?’ Ne efa maakek, ‘No iikirap Damaskus eke. Ne Mua Maneka uuwowa nefa pepekimep-puak nain neeke ariman nefa maakikuan.’ Opora naap efa maakek. 11 Ne yo parina nain-ke mokoka efa mikeya mokoka samorarem. Ne mua yo mamaiya iwamik nain-ke wapena-pa efa opap Damaskus efa pekamik.

12 Aria yo nan ikemkun mua oko unuma Ananaiyas naimik nain efa urufowa ekapok. Mua nain i kae sira balisow ookiya. Ne wi Yuuda nan ikemik nain o ekima opimik. 13 Os-ke urupemi mamaiya-pa efar iimarep maek, ‘Emar, no aakisa maa nainiw urufe.’ Naeya yo mokoka wilinep o urufam. 14 Ne naap efa maakek, ‘Mua Maneka yiena nembesir unowiya farem-ikemik nain-ke nefa pepekimep-puak, yo kookalowa efar amisarinok naek, ne Yeesus mua kaken eliwa nain urufinok naek. Ne opora aakuniya nain wiar miiminok naep nefa pepekimep-puak. 15 Ne nos-ke ikoka o opor makena wia maakem-ikainan. Ne o maa kamenap oneya wiar urufin nain ne wiar miimin nain wia maakem-ikainan. 16 No moram pokap ikon ya. No iikirap Yeesus faremi pina wasirkeya nefa yasuwinen.’ Naap efa maakeya iikiramkun efa yasuwak.

17 Aria naap ikok yo kiiriw Yerusalem ekapem. Ne iir oko-pa tempel koora ikiwep Mua Maneka farem-ikok mia oona ururep orop mokoka-keriw kirep Yeesus urufam. 18 O feekeriw efar iimarep ikok feenap efa maakek, ‘No ewuriw akena Yerusalem piipuap ikiwe. Moram wi owowa fain yo opora wia maaken nain me nefa miimikuan.’ 19 Ne yos-ke maakem, ‘Maneka, wi efa amisaremik, moram yo opora me efa miimikuan? Iiriw yos-ke wi mua no nookimik nain lotu koora-pa ikaiwkin wiar ikiwep wia opap wia arufami koora-pa wia wuam-miem. Nain wi sira efar amisaremik. 20 Ne iir nain Stiwen eena no muuta nain samor akena ifakimemik nain yos-ke nan wiamiya ikok eliw ifakimeman wia naem. Ne wiena mia suuwowa iirarep wuap-puiwkin nan iimarep wia urufam-ikomam,’ naap maakem. 21 Ne yiena Maneka-ke nainiw efa maakek, ‘No ikiwe. Yo nefa sesekamkun owow oko wiar ikiwep yo opora wia maakem-ike,’ naap efa maakek.”

22 Aria Pol aakun-ikim-ikok opora ara nain maeya wi kerewa faremi maemik, “Ifakimiwkin uminok oo. Mua feenap nain feek me ikainok. Iirareka aa!” 23 Naap maemi kema bagiwirap konima wiam baguserimik nain iiraromakemi foma aawep iinan-pa fi-fienamik. 24 Naap oniwkin ami woos mua nain-ke ona teeria wia maakeya Pol aawep wiena pika purupemik. Purupiwkin kiiriw wia maakek, “Wi moram mua fain kirirowamik. Ni sarua wariwkin opor makena yia maakinok.” 25 Naap wia maakiwkin Pol merena wapena wiar kaikap-puap sarua waru naep oniwkin os-ke ami woos mua oko wameiya iimarep ikua nain nokarek, “Mua eena Rom anim onoma tepak-pa wiar ikaimik nain pina wiar imenowa marewa nain wia arufimik nain sira ikua-i e weetak?”

26 Naap maakeya mua nain ona woos mua wiar ekap maakek, “No maa baliwep amisarep-ko onin-i? Mua fain i Rom anim onoma tepak-pa yiar ikua nain-ke.” 27 Naap maakeya ami woos mua nain-ke ekap Pol nokarek, “No mae. No Rom anim onoma tepak-pa yiar ikon-i?” Naeya Pol-ke maakek, “Ae, makena yo nain-ke.” 28 Naeya maakek, “Yo sesa maneka wuap Rom tepak-pa wiar ikem.” Ne Pol-ke maek, “Yo weetak. Yena auwa Rom tepak-pa wiar ikaeya yos pun imenaremi fain mua arem.” 29 Naap maeya wi mua o sarua waru naep onamik nain piipuamik. Ne ami woos mua nain pun keker opak, moram wi Rom mua seniw me wia kaikowa nain os-ke Pol seniw kaikak. 30 Ne uurik ona ami woos mua nain-ke wi Yuuda pris woos mua ne wi Yuuda Kaunsel Maneka wia farek, Pol opora-pa wuamik nain onoma wiar amisarekam naep. Ne wi ekapep wiam fiirimep ikaiwkin Pol porop gone-pa wiar iimarowak.

Copyright information for `MHL