Acts 24

Wi Yuuda-ke Pol opora-pa wuamik

Aria fofa ikur naap weesereya pris woos mua Ananaiyas ne owow woos mua papako ne wiena aakunow mua oko unuma Tetulus naimik nain unow onaiya wiam aawep Sisaria ikiwemik. Fuunep anim onom maneka Feliks wiar ikiwemik. Kererep Pol opora-pa wuamik nain opor onoma nain maakemik. Aria os-ke Pol fareya ekapok. Ekapeya Tetulus iikirap aakunowa onoma wuami maek, “Sira eliwa, mua maneka Feliks, nos-ke sira eliwa-pa yia pokomoweya i baliwep ikemik, irakowa marew ne sira samora-ko me onimik. Nena sira eliwa-pa yia wueya i nain ookimik. Naapeya owow unowiya sira nefar urufap mua eliwa nefa naimik.

Aria i me senam nefa pokomowiyen naep, opora iiw muuta fain maemkun yiar miime. Feenap, mua fain sira eliwa me oniya, wi Yuuda mua owow unowa baliwep ikemik nain kema wia momoreya irakowa imenamik. Ne wi Nasaret mua opora ookimik nain woos mua oko fanek. Me nain muutiw, sira fain pun onak. I tempel koora ikiwep sira yiar puukekam naep onak. Naap onam-ikaeya opamik. Ne i yiena sira-pa opora-pa wuau naep onamik. [ Nain ami woos mua Lisias-ke ekapep kekanemi i wapena-pa yiar aawok. Yiar aawep naap yia maakek, ‘Ni o opora-pa wuau naep-na ni ikip Feliks wiar kererep opora-pa wueka,’ naap yia maakek.] Ne aakisa no mua fain nokarinan-na opor onoma wiar amisarinan, i sira kamenap naep opora-pa wuamik nain.” Naap maeya wi Yuuda unowiya opora nain wiar ane-kekanowami maemik, “Opora nain makena maiya.”

Pol Feliks opora maakek

10 Ne anim onom maneka-ke Pol maakek, “Aria aakisa no-ko aakune.” Naeya Pol iikirap feenap maek, “Yo amisarem nain no mokom unowa i kame fain yia urufam-ikon. Naapeya yos pun no mokok epa-pa pika yame opami opora maowa nain eliw naiyem. 11 Aria feenap, yo iiriw Mua Maneka farekam naep Yerusalem ikiwep nan ikemkun sira kamenap efar imenarek nain ekapep aakisa yo fan ikem, nain epa me ekam. Iiwawun fofa ten kuisow erup muuta. Yo opora maem nain maken-i e weetak, nena amisarekam naep-na eliw wia nokarinan. 12 Ne yo tempel koora-pa wi Yuuda me wia fiirimep opora-ko me wiamiya irakem. Ne lotu koora-pa ne epa oko-pa-ko me wia fiirimep irakowa kema me wia mikam-ikem. 13 Ne yo opora marewa, nain wis-ke oram maneka opora-pa efa wuau naep onimik. 14 Ne aakisa maiyem fain makena, me sailiyem. Yo yiena kae Mua Maneka farem-ikemik nain opora wiar ookami Yeesus sira ookiyem. Eena wi wadol sira-ke naimik nain. Nain yo Moses sira wuomakek nain makena maemi wi profet opora siisimep-puamik nain pun makena naiyem. 15 Wi opora feenap maem-ikemik, ‘Mua eliwa ne mua samora umimik nain Mua Maneka-ke kiiriw wia iikirowinon.’ Ne yos pun opora nainiw wia maakem ikem. 16 Ne naapeya yena kukusa yame saliwami Mua Maneka ne mua unowa mokok epa-pa sira samora-ko me oniyem, weetak.

17 Ne yo iiriw Yerusalem piipuap ikiwep mokom unowa owow papako-pa yiawem-ikok kiiriw nainiw ekapem. Yiena Yuuda teeria mua oorpowa nain wia asipowa naep maamuma wia pekapomam. Ne pun yo iiwawun Mua Maneka patirowa naep ekapem. 18 Ekapemi yiena kae sira-pa mia muura iirarep welawap yo tempel koora-pa Mua Maneka patirekam naep ikiwem. Nan ikemkun wi Yuuda Esia-pa ikok Yerusalem ekapemik nain-ke efa urufamik. Iir nain yo mua unowa wia fiirimep me-ko kirir-iraparemik. Ne irakowa-ko me wia iikirowam. Wi yo pina kamenap onamkun efa urufamik nain moram fan me ekapemik? Naeya aakisa wis-ke no miir onoma-pa nefar iimarep opora eliw maekamik. 20 Ne oko pun, wi woos mua fan ikemik fain iiriw Yerusalem-pa opora-pa efa wuamik nain pina efar imenap-na aakisa kakeniw mauk. 21 Yo opor unowa marew, opora kuisow fain maemkun wi efar miimamik. Yo faremi feenap maem, ‘Mua umimik nain iikirikuan, naap maemkun muut nain opora-pa efa wuaman,’ naap maem.” Pol opora naap wafurak.

22 Ne aria Feliks Yeesus opora maimik nain balisow wiar amisarek. Ne opora weeserowami wia maakek, “Ikoka ami woos mua Lisias ekapeya-na yo opora nain kiiriw niar miiminen.” 23 Naap wia maakemi ami woos mua oko sesekami maakek, “No Pol pikiwep koora-pa wue. Me kaike, neek soomarem-miawinok. Ne ona womar o urufowa ne maa enowa asipowa naep-na eliw asipuk.”

Feliks-ke Pol koora-pa wuak

24 Ne fofa papako ikiweya Feliks ona emeria Drusila ikos ekapemik. Ona emeria nain pun wi Yuuda teeria-ke. Aria Feliks-ke Pol fareya ekapok, Yeesus Krais ookowa sira maeya-ko wiar miimekam naep. 25 Ne Pol ekapep wiamiya aakunemi opora papako feenap wia maakek, sira eliwa-pa ikowa, kukusa yiam saliwami balisow soomarowa ne Mua Maneka wiimar yia mekawowa nain wia maakek. Naap wia maakem-ikaeya Feliks nain miimap kema tootonep maek, “Eliw, no ikiwe, iir oko yo epa oram-ko arep-na nefa maakemkun kiiriw ekapep aakuneya nefa miiminen.” 26 Ne Feliks kema oko feenap wuam-ikua, Pol maamuma-ko yieya wasirkamkun orainok. Kema naap wuap anane Pol farep ikos aakunem-ikemik.

27 Aria naap ikok mokoma erup naap ikiweya mua unuma Posius Festus naimik nain-ke Feliks asipap uuwowa os-ke epa wiar aawok. Ne Feliks uuwowa piipuami wi Yuuda kema tenuk naep Pol koora-pa ikua nain me iirarek.

Copyright information for `MHL