Acts 27

Pol Rom sesekeya aasa aawep ikiwemik

Aria i Itali kame wiar ikiwowa yia naiwkin, wi ami mua-ke Pol ne wi mua papako koora ekap ikemik nain wia aawep ami woos mua wapena-pa wiar wuamik. Mua nain unuma Yulius, ne o irakow mua andet kuisow (100) nain wiena woos mua-ke. Ne teeria nain Rom saria maneka Siisar ona kakeniw wia urufiya. Ne Adramitium aasa oko Sisaria piipuap Esia kemeniw ikiwowa naiwkin aasa nain iramik. Ne Aristakus pun yiamiya ikiwok, ona owowa Tesalonaika, Masedonia kame-pa ikua nain. Ne i ikim-ikok uurik ona Saidon-pa fuunemik. Ne Yulius-ke Pol kemalep wasirkeya ona womar papako wia urufowa ikiwok, maa-ko asipuk naep. Ne i Saidon piipuap ikiwem-ikok ewar-ke iikireya epa eliwa ookami Saiprus mot okaiwi ekeria-pa ikiwemik. Ikiwemi Silisia ne Pamfilia nomakemi Maira owowa ekamik, Lisia kame-pa.

Aria nan ikok ami woos mua nain-ke Alesandria aasa wiar imenap nan yia wuak. Aasa nain Itali kame ikiwekam naep onam-ikaeya wiar irap ikiwemik. Ikiwem-ikemkun ewar-ke yia fieneya fofa unowa momasia muuta ikiwem-ikemik. Momasia ikiwemi Nidus owowa mamaiya ekamik. Ewar-ke kerew akena kekaneya i kakeniw ikiwowa me pepekeya moke puukap ikiwemi Krit mot okaiwi-pa wuami ponaiw ikiwemik. Naap ikiwemi Salmone miira nomakemik. Ne ewar-ke kekan-afureya momasia ikiwemi Kemen Eliwa naimik nan urupemik. Kemena nain Lasea owow mamaiya-pa ikua. I ikiwowa nain ifera-ke samorar-afureya i epa maala nan ikemik. Nan ikemkun wi Yuuda enowa emi wuow fofa nain yia nomakek. Ifera senam kueya Pol-ke oko i maera-pa ariyen naep wia maakek, 10 “Yo feenap maiyem, i nainiw karuiyen-na epa samora imenap aasa yiar bulunareya maa koorma mesenalinon ne yiena pun maera-pa ariyen.”

11 Naap wia maakek-na wia, ami woos mua-ke opora wiar fienap aas onom mua ne faow mua wiisiw wiokak. 12 Ne kemena i urupep ikemik nain pun me eliw akena, ewar epa-pa ewar maneka kereremi kemena nain ifera senam kuiya. Naapeya mua unowa aakunep maemik, “I akimap-ko urufiyen, ikiwep Finiks owow kemena-pa neek ikaiyen. Ne ewar epa weesereya ikiwiyen.” Finiks eena Krit mot-pa ikua. Ne kemen miira nain-ke ewar maneka mika-puukeya kemena nain eliw ikaiya.

Ewar maneka ifera-pa imenarek

13 Aria naap arewap ikok gomi kireya eliw ikiwiyen naemi aanka perekami Krit mot ponaiw ikiwemik. 14 Ne ikiwem-ikemkun epa me ekowa, eremin ewar miiw maneka-pa epami aasa yiar ipiskami aas miira yiar kiripak. Ne i ikiwu naep onamik-na me pepek, oram ewariw ookam-ikemik. 16 Ewar-ke yia piwami Kauda mot ponaiw yia pikiweya kerew akena uufunemik. Aas gelemuta mufem-ikemik nain mufep aas maneka iinan amapurupep baliwep akena kaikamik, me pukinok naep. 17 Ne ifara maneka aawep i aasa ikemik nain iiwawun maneka kaik-ikiwemik, me pukinok naep. Aria oko ewar-ke aasa yiar pikiwemi Libia saana-pa korininon naep aas leep mufep poromakemik. Naeya ewar lawisiw yia pikiwem-ikua. 18 Ne uurik ona naap nain ewar kekanemi aasa yiar anu-fieneya maa koorma ifera-pa wafufuramik. 19 Ne kiiriw uurik ona aasa uuwimik maa muutitik nain aawep wafufuramik. 20 Fofa unowa nain epa kokom miiriw ikua, ama ne mokoma-ko me urufam-ikemik. Ewar maneka naap wuunem-ikua. Ne i kema maemik, i mesenaliyen-i e kamen-i, naap maemik.

21 Ne epa maala maa enowa miatinep enow marew ikemik. Ne Pol-ke wia maakek, “Ni mua unowiya yo opora efa miimekaman-na Krit mot me piipuekamik. Ne ewar asia me miirowap maa unowa me yiar samorarekak, ne yiena pun me samor aawekamik. 22 Naapeya yo nia maakiyem, i mua kuisow-ko me mesenalinok, naapeya ni kekaneka. Aasa muutiw neek mesenalinok, i mua kuisow-ko me mesenaliyen. 23 Moram uura yo Mua Maneka efa urufam-ikaiya ne uuwowa wiar opiyem nain-ke ona ensel sesekeya efar imenarek. 24 Ne feenap efa maakek, ‘Pol, no me keker opa, no ikoka eliw ikiwep Rom saria maneka Siisar miir onoma-pa wiar iimarinan. Mua Maneka no muuta nain wi mua unowa aasa-pa nefamiya ikemik fain me mesenaluk naek,’ naap efa maakek. 25 Naapeya nia maakiyem, ni kekaneka, Mua Maneka opora makena-ke, ona efa maakek naap ikoka imenarinon. 26 I ikoka ewar-ke aasa yiar fieneya ikiwep mot oko-pa samorareya neek ikaiyen.” Naap wia maakek.

27 Ewar asia wuunem-ikaeya sande erup aawok. Ewar-ke yia fuureya i ikiwep Adri ifera-pa nan ipatarep ikemik. Ne uur gone wi aasa uuwow mua naap furewamik, i miiwa mamaiya arem-ikaimik naemik. 28 Naap furewap ifer irauwa pepekimu naep ifara maala piipuamik, nain meren wafurowa ten ikur okaiwi-pa kuisow (60) naap. Ne naap ikok kiiriw pepekimemik, nain meren wafurowa ten ikur (50). 29 Aria naap urufap oko aasa urupemi nomona-pa korininon naep aanka erepam aas mikikira-pa ikaiya nain fuurkiwkin aasa ipatarek. Naap ikok maem-ikemik, “Epa-ko wiimep-puekan oo.” 30 Ne wi aasa uuwow mua papako bauraru naep wadolalemi maemik, “I aasa aanka miira-pa ikua nain wafuriyen naep.” Naemi aas gelemuta fuurkiwkin ifera orok. 31 Ne Pol-ke wi ami wiena woos mua onaiya wia maakek, “Wi aasa uuwow mua fain baurarikuan-na i unowiya miira mesenaliyen.” 32 Naap wia maakeya wi ami mua-ke aas gelemuta nain ifara puukiwkin ifera-ke pikiwok.

33 Aria uuriw epa wiiwim-ikaeya Pol-ke maa-ko enimuk naep wia maakek, “Ni sande erup naap kema tootonep maa-ko me enem-ikeman, oram maneka pokap ikeman. 34 Sira eliwa, maa-ko enimeka. Maa enep mia tooneka. Ni kema unu-unowa me wueka, i eliw ikiwiyen, ne unow onaiya eliwa ikaiyen.” 35 Naap wia maakeya o urufam-ikaiwkin emer ikowa kakawa kuisow aawep Mua Maneka farep wuepap enek. 36 Wi naap urufap wis pun kema urupep maa enemik. 37 I mua andet erup ten ikur okaiwi-pa erup ne kiiriw ikur okaiwi-pa kuisow (276) naap aasa nan ikemik. 38 Aria wi maa pepek enep weesereya aasa-ko efefarinok naep wit sia-pa ikua nain ifera-pa wafufuramik.

Aasa pukok

39 Aria epa wiimeya i mot oko urufamik, ne aas mua mot unuma nain me amisaremik. Ne wi kemena saa miira eliwa urufap aasa neeke amapekiyen naemik. 40 Naap naep aanka ifara pu-puukamik, ne sigar opow ifara nain pun iiwawun wasirkamik. Ne aas leep miimowa-pa ikua nain purupiwkin ewar-ke yia fuureya ewur akena mot nain ekamik. 41 Ekam-ikemik-na wia, aasa ikiwemi aas miira saana-pa mikap iiwawun koonek, sigar kiripowa me pepek. Ne aas ipekuma ifer umukut-ke arufam-ikaeya puku-pukok. 42 Aria wi ami mua-ke wi koor ekow mua wia ifakimu naep aakunemik. Oko wi pikinep kaalal-urupep baurarikuan. 43 Ne wia, wiena woos mua-ke Pol kema suuwap wi naap onu naiwkin wia puukak. Neemi mua unowiya wia maakek, “Ni mua kaalalowa amisareman nain ifera pikinep kaalalep pona urupeka. Ne ni mua papako kaalalowa me amisareman nain aas pukowa kakawa-i e maa oko-ko opap kaalalep pona urupeka,” naap wia maakek. Aria i naap onap unow onaiya saa urupep eliwa ikemik.

Copyright information for `MHL