Acts 3

Pita mua meren samora saliwak

Aria iir oko amirika ama arow naap Mua Maneka farow ama areya Pita Yon ikos tempel koora ikiwemik. Ne tempel koora omopora, Omopora Eliwa naimik nan mua meren samora-ko nan pokap ikua. Mua nain onak uroma-pa naap imenarek. O pikiwep tempel omopora-pa nan pokomowap-puiwkin maamuma wia nomarem-ikua. Ne wiam erup tempel koora urupep nomaku naep oniwkin wia urufap maamuma wia nomarek. Wia nomareya wiam erup-ke mokoka toonep urufami Pita-ke maakek, “I yia urufe.” Ne mua nain maa-ko yiikuan naep mokoka toonep wia urufak. Naeya Pita-ke maakek, “Yo maamuma niowa nain yo maamuma marew akena, maa kuisow muuta onominen. Nasaret mua Yeesus unuma-pa nefa maakiyem, no iikirap soomare.” Naap maakemi mua nain wapen akena-pa opami iikirowak. Ne mua nain nan-pariw kepura wiar kekaneya patak naemi soomarek. Ne wi wiamiya tempel koor kemena ikiwok. O wame irami pikin-ikiwemi Mua Maneka unuma fakeram-ikua. Ne wi emeria mua unowiya o urufap maemik, 10 “Nee, mua fain Omopora Eliwa naimik nan pokap ikok maamuma wia nomariya nain-ke.” Naap urufap samor-ko soranep eneka teekamik.

Pita tempel koora-pa opora wafurak

11 Aria mua nain Pita Yon ikos wiamiya ikiwemi epa unuma Solomon Pokow Epa naimik nan iimarep ikaiwkin wi mua unowa wia urufap karuwiw ekapep wia imararemik. 12 Ne Pita-ke naap wia urufap wia maakek, “Ni Isrel, emawik, ni moram mua sariarek fain urufap niam soranowiman? Ne moram mokoka toonep yia urufam-ikaiman? Ni kema naap wuiman-yon aa, mua fain wi mua eliwiya wiena kekanowa-pa saliwamik, naep yia naiman-i? 13 Emar unowik, iiriw yiena nembesir Abraham, Aisak, Yekop ne yiena nembesir unowa Mua Maneka eena farem-ikemik nain-ke ona uuwow mua Yeesus kekanowa iwemi unum maneka naek. Mua nain nis-ke wi iiwua wapena-pa wuaman. Ne Pailat wiarik opora-pa wuaman. Ne os-ke pina marew naemi iirarekam naep oneya nis-ke ifakime naakeman. 14 Yeesus mua sira eliwa ne Mua Maneka mokoka-pa mua kaken eliwa-ke, nain nis-ke mikikira iweman. Ne mua oko mua wia ifakimeya koora-pa wuamik nain Pailat maakiwkin nia piipuomak.

15 Mua kaken eliwa nain Mua Maneka wiar ikiwowa era yia ofakowow mua-ke, nain nis-ke ifakimiwkin umok. Ne Mua Maneka-ke kiiriw iikiroweya i kakeniw mokok onaiya urufap nain maimik. 16 Ne aakisa o opora opam-ikok o unuma unufamkun mua meren samora fain sariarek. Mua fain iiriw pokapiw ikua nain ni paayareman, ni urufam-ikeman. Ne o Yeesus opora wiar opap iiwawun sariarek. Aakisa ariman fan urufaman.

17 Aria emar unowik, yo amisarem nain, ni niena woos mua unow onaiya Yeesus samoraman nain ni me amisarep naap onaman. 18 Nain iiriw akena Mua Maneka-ke ona profet wia maakeya naap maem-ikemik, ona Krais pepekimok nain ikoka sirirowa aawinon naemik. Ne ni aakisa sira onaman nain, opora nain pepek erak. 19 Naapeya ni kema kiremi sira samora oniman nain piipueka, ne Mua Maneka-ke pina niar iirarinok. 20 Ni naap onowen-na Mua Maneka-ke nia kekanoweya ni kema eliwa aawowen. Os-ke kiiriw Yeesus sesekeya ekapinon, o Krais nain, iiriw ni nia naep ona pepekimep-puap sesekak nain. 21 O aakisa owow iinan-pa ikaiya, neeke ikok ikok nainiw orainon. Maa muutitik iiriw Mua Maneka-ke ona profet wia maakeya maem-ikemik nain epa pepek ereya o miiwa kiiriw orainon. Ne sira samo-samora fan ikua nain kakenami iirarinon. 22 Ne iiriw Moses pun naap maek,

‘Ikoka Mua Maneka-ke niena teeria mua kuisow sesekeya ona profet ikainon, yo efa sesekak naap nain sesekinon. Ne ni ikoka maa muutitik nia maakiya nain opora wiar miimami opora nain wiar ookam-ikeka.
23 Ne ni mua o opora me wiar miimowen-na Mua Maneka-ke sisin nia wuami nia samorinon.’
(Lo 18.15-19)

24 Opora nain wi profet unowa nain maem-ikemik, Samuel-pa onoma wuap ekapemi profet unowa nain. 25 Mua Maneka i nomokow fiira Abraham opora maakep koonowak nain feenap,

‘Ikoka nena nembesir teeria-pa mua kuisow imenarinon. Ne mua nain wapena-pa wi miiw mua unowa kekanowa aawep eliw ikaikuan.’
(Yenesis 22.18, 26.4)

Ne ona profet ne yiena nembesir unowa wia maakep koonowak nain ni aakisa makena urufaman.
26 Naapeya Mua Maneka-ke ona uuwow mua eliwa Yeesus pepekimemi sesekeya o kiikir i Isrel teeria yiar ekapok. Ne kema nia kiripeya ni kema kirowen-na sira samora oniman nain piipuap kema eliwiw ikowen.”

Copyright information for `MHL