Acts 6

Wi maa enowa kakaltow mua wia pepekimemik

Aria iir oko-pa wi Yeesus opora wiar opam-ikemik nain unow akena imenariwkin teeria nain manekarek. Ne wi Grik opora aakunimik nain-ke wi Iibru opora aakunimik nain wia aakunowami maemik, “I unowiya teeria kuisow. Ne ni anane niena teeria wi emeria mua maa enowa-ki maa iiwarimik nain wia asipami i emer apura-ko me wia kemalep me wia asipiman.” Naap wia aakunowiwkin wi ten kuisow erup nain-ke opora nain miimap teeria unowiya wia fiirimep wia maakemik, “I Mua Maneka opora wia maakowa uuwowa wiar piipuap wi emer apura enowa wia kakaltowa uuwowa neeke ariyen-na eliw marew. Naapeya ni mua ikur okaiwi-pa erup naap wia pepekimiwkin uuwowa nain wis-ke urufam-ikauk. Wi mua sira eliwa ne Mua Maneka-ke Ewar Eliwa wieya kekanowa ikemik nain, ne maa balisow kema suuwimik nain, mua sira nain wia pepekimeka. Ne i anane Mua Maneka faremi opora wiow mua ikaiyen.” Naap wia maakemik.

Ne wi unowiya opora nain eliwa-ke naep mua wia pepekimemik. Wia pepekimemik nain feenap: Stiwen, Filip, Prokorus, Nikanor, Timon, Pamenas ne Nikolas. Stiwen o Mua Maneka opora kekanowa wiar opiya, ne Mua Maneka-ke Ewar Eliwa iweya kekanowa onaiya ikua. Ne Nikolas, ona owowa Antiok, ne o iiriwiw Yuuda sira wiar ookam-ikua. Wi teeria nain wia pepekimemik nain wi aposel mokok epa-pa wia iimarowiwkin Mua Maneka faremi wapena ikiwosa iinan-pa wiar wuami uuwowa nain wia wuomamik.

Ne naap iki-ikok Mua Maneka opora-ke manekarek. Ne Yerusalem owow maneka nain emeria mua unowa Mua Maneka opora opamik. Ne teeria manekarek. Ne wi pris teeria unowa pun Yeesus opora wiar opamik.

Stiwen opora-pa wuamik

Stiwen, Mua Maneka-ke manek akena kookaliya ne o kekanoweya kekanowa onaiya ikok maa miililina unowa onam-ikua. Ne wi Sairini ne wi Alesandria mua papako wi Yuuda sira wiar ookam-ikemik nain Yerusalem ekapep lotu onam-ikemik. Wi teeria nain-ke wi Silisia ne Esia Yuuda mua onaiya wiam aawep Stiwen wameiya oporiw irakemik. 10 Nain Mua Maneka Ewar Stiwen kekanoweya wi opora wiar porowa me pepek. 11 Naeya mua papako uroma wia mikiwkin Stiwen wadol opora onami maemik, “Mua nain Mua Maneka firekak, ne Moses sira wuomakek nain pun iiwawun firekami naap aakuniya.” 12 Naap wia maakemi wi emeria mua, owow woos mua ne wi sira amis mua kema wia mikamik. Ne wis-ke Stiwen opami wi woos mua ne wi sira amis mua wiar pikiwemik. 13 Ne wi mua papako pun wia pikiwemik, ikoka Stiwen wadol opora onuk naep. Wis-ke maemik, “Mua fain anane i tempel koora fain yiar maiya, ne Moses sira wuomakek nain pun opor unowa oniya. O feenap maeya miimimik, ‘Yeesus, Nasaret owow mua nain-ke ikoka i tempel koora fain yiar te-teekami sira unowa Moses wuomakek nain kiripami sira oko wuinon.’” 15 Ne mua unowa wiam fiirimep ikemik nain Stiwen miikapura balisow wiar urufamik-na miikapura onaiya wiar imenarek, ensel miikapura saarik wilinem-ikua.

Copyright information for `MHL