Acts 8

Aria Stiwen ifakimemik nain Sol pun eliw wia naek. Stiwen ifakimep-puap wi Yeesus teeria Yerusalem-pa ikemik nain pun samor akena wia samoram-ikemik. Ne wi bauraremi Yuudia ne Samaria kame ikiwomakemik. Wi aposel-ke Yerusalem-pa nan ikemik. Ne wi mua papako Mua Maneka sira wiar ookimik nain-ke Stiwen sawi napuma aawep soopami omow maneka omemik. Ne Sol-ke wi Yeesus opora opamik nain koora wiar ikiwep wia mufep porop wia samorami koora-pa wia wuam-ikua.

Wi Samaria-ke Yeesus opor eliwa wiar opamik

Aria wi Yeesus opora opamik nain mua papako baurarep owow unowa wiar ikiwep Yeesus opor eliwa nain wia maakem-miemik. Ne Filip-ke Samaria kame owow maneka wiar ikiwep Yeesus Krais opora wia maakem-miek. Maa miililina onomakek nain meta wiar miimamik ne wiar urufamik. Naapeya wi emeria mua unowa o wiar ekapep wiam fiirimep ikok opora baliwep akena wiar miimam-ikemik. Ne wi mua sawur wia anirawiwkin ikemik nain os-ke wiar iirareya kiriremi wia piipuap bauraremik. Wi mua mia aka wiar umok nain, ne wi mua meren samora nain pun wia saliweya sariaremik. Ne owowa nain wi naap urufap kemelamik.

Owowa nain mua oko unuma Saimon. Os-ke iiriw ona maikua-pa maa fiemi sira-sira unowa onam-ikua. Wi emeria mua naap miimap kakaem-ikemik. Ne os pun anane naap wia maakem-ikua, “Yo inasin mua-ke.” 10 Ne wi woos mua ne mua unum marew nain pun o opora maek nain maken akena-ke wiar naem-ikemik, “Inasin mua, ne kekanowa naimik nain-ke,” naap maemik. 11 O mokoma unow akena sira unu-unowa onami wia mufem-ikua, naapeya o ookam-miemik. 12 Ne aakisa fan Filip-ke owowa wiar kererep Yeesus opora wia maakeya opora opamik. Mua Maneka opor eliwa wia maakemi Yeesus unuma-pa teeria wiar ekowa nain wia maakek. Naeya wi Yeesus opora wiar opiwkin eka-pa wia yasuwak. 13 Ne Saimon pun Yeesus opora wiar opeya Filip-ke yasuwak. Ne o anane Filip wameiya ikua. Naap ikok Filip maa miililina unowa onam-ikua nain wiar urufap wiar kakaem-ikua.

14 Ne aria wi aposel Yerusalem-pa ikok wi Samaria meta wiar miimamik, Mua Maneka opora wiar opamik nain. Naap miimap Pita Yon ikos wia sesekiwkin Samaria ikiwemik. 15 Wi Samaria yiena Maneka Yeesus unuma-pa wia yasuwamik nain Ewar Eliwa me wiar orowa ikua. Naeya Pita Yon ikos wiar fuunep Ewar Eliwa wiar orainok naep Mua Maneka faremik. 17 Ne wapena ikiwosa-pa wiar wuiwkin Mua Maneka Ewar Eliwa wiar orok. 18 Wiam erup naap oniwkin Ewar Eliwa wiar orok nain Saimon pun nan ikok wiar urufak. Naap urufap maamuma pekapemi maek, 19 “Ni niam erup kekanowa nain yo yiiwkin yo wapena wi emeria mua ikiwosa-pa wiar wuamkun Ewar Eliwa wiar orainok.”

20 Naap wia maakeya Pita-ke iiraremi maakek, “No umemi epa samora ikiwinan, nena maamuma onaiya. Mua Maneka-ke ona kookalowa-pa maa oram yiiya nain sesenarep aawowa naen. 21 Mua Maneka nefa urufiya nain no kema eliwa-ko me kema suuwin. Naapeya no i yiamiya mauwowa nain era-ko me ikua. 22 No aakisa kema kirep Mua Maneka fare. Ne nena kema naap maen nain nefar iirarinon-yon. 23 Yo kema nefar urufiyem nain eliwa marew. No kema wia bagiwirowiw ikain. Ne sira samora-ke kema nefar taanep ikua.” 24 Pita naap maeya wia maakek, “Sira eliwa, ni Mua Maneka fariwkin yo pina fain efar iirarinok. Ne yo maa maeman nain me efar imenarinok,” naap wia maakek.

25 Ne aria wiam erup nain Mua Maneka opora wi emeria mua baliwep wia ookomap weesereya kirep Yerusalem ikiwemik. Ikiwem-ikok era-pa Samaria owow gelemutitik nain Mua Maneka opora wia maak-ikiwemik.

Filip Itiopia owow mua oko Yeesus opor eliwa maakek

26 Aria, Mua Maneka ensel-ke Filip maakek, “No maa saliwap ikiwe. Yerusalem era ookami iwap Gasa-pa fuunimik era nain ooke.” Era nain epa asia saa manekiw. 27 Naap maakeya Filip iikirap soomarek. Ne Itiopia mua oko Yerusalem-pa lotu arep weesereya ona owowa ikiwem-ikua. Mua nain Itiopia owow saria maamuma urufow woos mua-ke. Owow saria nain emeria-ke, mua nain ona miiw aasa oos teeria-ke mufemik. Ona owowa ikiwem-ikok profet Aisaiya opora siisimok nain unuf-ikiwem-ikua. 29 Ne aria Filip ikiwem-ikaeya Mua Maneka Ewar Eliwa-ke maakek, “No miiw aasa nain mamaiya wiar eke.” 30 Naeya Filip karuwiw ekap mua nain Aisaiya opora nain unufam-ikaeya miimak. Ne nokarek, “No opora unufam-ikain nain kemena-ko aawon-i e weetak?” 31 Ne mua nain-ke maakek. “Yo yenaiw kemena me amisarinen. Mua oko-ke opor kemena fookomikuan-na yo eliw amisarinen.” Naap maep Filip maakeya miiw aasa wiar urupep pokak. 32 Mua nain Mua Maneka opora unufak nain feenap,

“Wis-ke o sipsip saarik ifakimu naep pikiwemik nain o me omok. Ne sipsip muuka saarik, afifa wiar kerawam-ikaiwkin aakunowa marew, muutarep ikua.
33 O unuma iiwawun poromik ne o emin iimarow mua marew. Moram o miiwa-pa ikowa nain iiwawun wiar weeserowamik. Ne o teeria marew.”
(Aisaiya 53.7-8)

34 Ne aria mua nain-ke Filip nokarek, “Profet nain mua naarew maemi opora naap maek? Ona wame maek-i e mua oko wia maek?” 35 Naeya Filip-ke Mua Maneka opor kemena nain ookomami Yeesus maek. 36 Aria wiam erup miiw aasa-pa aakun-ikiwem-ikok, eka urufamik. Eka urufap mua nain-ke maek, “Urufe, eka naneka. Maa marew, yo aakisa kuisow efa yasuwe naiyem.” [ 37 Naap maeya Filip-ke maakek, “No Mua Maneka opora wiar opeya-na eliw nefa yasuwinen.” Ne mua nain-ke maek, “Yo Yeesus Krais opora wiar opiyem, o Mua Maneka Muuka-ke naiyem.”] 38 Naap maep miiw aasa faow mua wia maakeya asipiwkin wiam erup orop Filip-ke o eka-pa yasuwak. 39 Weesereya eka piipuap urupiwkin, Mua Maneka Ewar-ke nan-pariw Filip mesalimep pikiwok. Ne mua nain Filip me urufak, oram kemelami ona owowa ikiwok. 40 Ne Filip ikiwemi owowa oko Asdot naimik nan kiiriw imenarek. Nan ikok owow unowa nain Yeesus opor eliwa wia maakem-miek. Naap wia maak-ikiwemi Sisaria owow maneka-pa fuunek.

Copyright information for `MHL