Colossians 3

Mua Maneka-ke i Krais wameiya yia iikirowak

Aria Mua Maneka-ke Krais iikirowak nain nis pun nia iikirowak. Naapeya ni iinan owowa manek akena kema wuam-ikeka, eena Krais-ke Mua Maneka aken ekeria-pa wiar pokap ikua, owowa nain. Ni miiw maa unowa kema me wueka. Moram ni iiriw umep ikowa saarik ikok miiw sira piipuaman. Naeya ni Mua Maneka wameiya-pa wiar ikeman. Nain onoma Krais, eena ni kema-pa niar uuwiya nain. Ne ikoka o nainiw miiwa oraiya nain mia parin onaiya ne unum maneka ikainon, ne nis pun o epaskun naap ikowen.

I emeria mua enuma aremik

Aria naapeya ni miiw sira unowa kema-pa niar ikomakek nain iiwawun piipu-afureka. Sira feenap nain, uruw mia samora, enum eruarowa, maa unowa kema kuowa ne mia kookalow manekiw ikowa, maa kookalep ifemakowa, maa kookalowa kema manekiw ikok Mua Maneka me kema suuwowa, sira naap nain. Wi mua Mua Maneka opora wiar fienap sira naap onimik nain ikoka o bagiaw wiar urufikuan. Ne nis pun iiriw sira samora unowa nain-ke niar ikaeya naap ookam-ikeman. Ne aakisa ni sira fain iiwawun piipueka, kema bagiwirowa ne maa iririmowa, mua oko wia samorowa, wia tuunowa ne opor kia-kia aakunowa, sira naap nain iiwawun piipueka. Ne nieniw me niam peeskimeka. Moram niena sira awona kema-pa niar ikomakek nain iiriw iirarep emeria mua enuma puukaman. 10 Ne Mua Maneka eena miiwa maa muutitik onomakek nain-ke kema nia dubilam-ikaeya ona sira iiwawun pepek eriman. 11 I aakisa mua enuma puukap i unowiya epaskun akena ikemik. Naapeya i yiam fookap feenap me maiyen, ni Grik teeria-ke, ni mia kanima me puukiman ne i Yuuda teeria-ke, i mia kanima puukimik. Ni owow oko-ke, ni mua asia-ke, i yiena wenup ikaiyen. Ni uuwow mua sesa marew oram wia uuwam-ikomiman ne i yiena kakeniw miiwa-pa uuwimik, weetak, i naap me yiam maiyen. Moram Krais waisow maneka, ne i kema suuwimik nain waisow nanek.

I kema wiisarow sira-pa ikaiyen

12 Mua Maneka ona iiriw nia nanikap nia aaweya ona teeria-pa wiar ikeman. Ne pun o manek akena nia kookaliya. Naapeya ni nain kema suuwap feenap onam-ikeka. Mua wia kemalep wia saliwami kekelkiya wia wueka. Ni niena niam poreka. Ne pina-ko nia oniwkin-na ewur me kema bagiwireka. 13 Mua oko-ke maa niar samorinok-na miikapura me oneka, pina nain me wiar kema suuweka. Moram Mua Maneka pun pina niar iirariya, naeya nis pun naap akena oneka. 14 Sira unowa eliwa, nain niam kookalowa sira nain manek akena-ke. Naapeya niam kookalowa sira miimowa-pa wuowen-na sira unowa nain pun onami baliwep akena epaskun ikowen.

15 Krais-ke ni kema eliwa ikeka naep nia fareya ni unowiya kema eliwiw ikok epaskun areman. Naapeya o kema sonom eliwa niek nain kema-pa niar taanep ikainok. Naeya ni niam saliwam-ikowen. Naap onami Mua Maneka sira eliwa naakem-ikeka. 16 Ni anane Krais opor eliwa unowa nain kema-pa niar kekanep ikainok. Naap ikaeya kema pukep opora aakunemi niam maakem-ikeka. Naeya ni unowiya sira eliwa-pa ikowen. Naap onami niena kema-pa Mua Maneka sira eliwa naakemi someka Mua Maneka opora-pa ikomakek nain awemi lotu someka papako pun awem-ikeka. Ne someka enuma papako Ewar Eliwa-ke kema niiya nain awem-ikeka. 17 Ni opora aakunowa ne uuwow unowa nain yiena Maneka Yeesus kema suuwap o unuma-pa aakuneka ne uuwowa oneka. Naap onami o unuma unufami Mua Maneka sira eliwa naakem-ikeka.

Wi mua emeria muewemik nain ne wiena muuka wiipa

18 Aria ni emeria niena mua tepak-pa wiar ikok opora wiar miimeka. Moram yiena Maneka teeria-pa wiar ikemik nain sira naap onowa-ke. 19 Ne ni mua pun naap, niena emeria wia kookaleka, me wia iririmeka. 20 Aria takira, neene niawi opora wia miimeka. Moram yiena Maneka sira nain niar urufowa kookaliya. 21 Aria ni emeria mua, niena muuka wiipa kema me wia bagiwiroweka, oko wi neeke kema pinarikuan.

Wi uuwow mua ne wi woos mua sira

22 Aria ni uuwow mua eena sesa marew wia uuwomiman nain niena woos mua opora wiar miimeka. Feenap me maeka, “I wadolalemi wiena mokoka-pa baliwep uuwamkun uuwow mua eliwa-ke yia nauk.” Naap me maeka, weetak. Yiena Maneka Yeesus Krais ekima opap kema kuisow wuap uuwowa baliwep oneka. 23 Uuwow unowa oniman nain palanemi uuweka. I me wi mua nain wiar uuwimik, weetak, i yiena Maneka ona wiar uuwimik, naap maeka. 24 Moram ni amisareman, ikoka yiena Maneka ona ni sira eliwa oniman nain nia kiripomaya maa eliwa iiriw nia wuap-puomak nain makena urufowen. Naapeya ni feenap kema suuweka, makena, wi mua wia uuwomiman, nain yiena Maneka uuwow sira niar urufiya. 25 No maa baliwep me oninan-na ikoka Mua Maneka-ke pina nain kiripami yoowa niinon. Moram o me yia mekawiya, no uuwow mua-i e saria-i, epaskun naap sira niar urufiya.

Copyright information for `MHL