Colossians 4

Aria ni saria niena uuwow mua nia uuwomimik nain baliwep wia wueka, ne uuwow sira ookami kakeniw wia kakaltam-ikeka. Moram, nis pun mua oko tepak-pa ikeman, Mua Maneka eena owow iinan-pa ikua nain.

Mua Maneka farowa ne kakeniw soomarowa sira

Ni Mua Maneka farowa kekanem-ikeka. Ne palanep o faremi sira eliwa naakem-ikeka. Ne is pun yia kema suuwap Mua Maneka nokariwkin era yia eepomaya Krais opora wia maakem-ikaiyen. Opora eena iiriw kokot wiar ikua ne aakisa ariman arek nain wia maakiyen. Makena, yo o opora muuta nain koora-pa efa wuamik. Naapeya ni Mua Maneka farep nokariwkin efa asipeya ona opor kemena baliwep wia fookomamkun amisaruk. Yo nain maowa efar ikua.

Wi sisin mua wiamiya ikok-na baliwep kema suuwap sira eliwiw oneka. Ne Krais opora wia maakowa nain kemaiw ikok opora oko aakunemi anewami nain wia maakeka. Ne wia asipowa naep Krais opora baliwep wia nanaromiwkin wi miimowa-ke wiar afililinok. Naemi opora-ko nia nokariwkin-na opora pupep kakeniw wia kiripomowen.

Tikikus Onesimus ikos wia sesekak

Yo aakisa kamenap ikem nain ikoka Tikikus-ke niar ikiwemi nia maakinok. O yiena emar eliwa-ke ne uuwow epaskun, Mua Maneka uuwow mua kakeniw-ke. Ikiwemi i kamenap ikemik nain nia maakemi nia kekanowinok naep yo sesekamkun ni niar ikiwinon. Onesimus niena owow epaskun pun ikoka sesekinen. O yena emar eliwa-ke, ne ikoka Tikikus wameiya niar ikiwep maa mauwa i yiar imenarek nain nia maakikuan.

Pol Kolosi sira eliwa wia naakek

10 Aria Aristakus i aakisa ikos koora ekap ikemik, o nia maek, ni eliwa ikeka nia naek. Banabas womar Mak pun ni eliwa ikeka nia naek. Yo iiriw feenap nia maakep-puam, o iir oko-pa ikiwep niar fuuninok-na sira eliwa, kookalep aaweka. 11 Ne Yosua, eena unum oko Yastus, os pun naap nia maek, ni eliwa ikeka naek. Wi Yuuda mua wiam arow fain-ke yo efamiya uuwami Mua Maneka pika kemena-pa ikowa opora nain wia maakem-miawimik.

12 Aria Epafras pun nia maek, ni eliwa ikeka naek. Os pun Krais Yeesus uuwowa wiar opiya. O Mua Maneka ona nia kekanoweya ni kekanep ikok kookalowa baliwep wiar amisareka naep anane Mua Maneka kekanowa akena farem-ikaiya. 13 Yo fain nia maakiyem, makena, ni nia naep anane uuwow yoowa naap aawem-ikaiya. Me ni niisow, wi Laodisia ne wi Ierapolis pun sira naap wia oniya. 14 Ne yiena emar eliwa Luk, eena ikemika kaikow mua nain, Demas ikos ni eliwa ikeka nia naimik.

15 Aria Yeesus teeria Laodisia-pa ikemik nain wia maakeka, yo Pol-ke maiyem, ni eliwa ikeka wia naiyem. Aria ni Nimfa pun maakeka, no eliwa ike naap maiyem, ne wi teeria o koora-pa wiar fiirimimik nain pun sira naapiw wia maakeka.

16 Aria parosifa fain urufap-puap wi Laodisia teeria wia sesekomaka, wis pun urufuk. Ne parosifa oko wi Laodisia wia sesekomam nain ni Kolosi pun eliw wiar urufowen. 17 Ne Arkipus feenap maakeka, “Yiena Maneka uuwowa niek nain baliwep uuw-ikiwemi iiwawun wiar welawe,” naap maakeka.

18 Aria opor ara fain yena wapen siisia kakeniw siisimiyem. Siisimemi ni nia maiyem, eliwa ikeka nia naiyem. Yo koora-pa ikem fain yo efa kema suuweka. Yiena Mua Maneka anane nia kemalemi nia asipam-ikainok.

Copyright information for `MHL