Ephesians 1

Aria yo Pol eena Yeesus Krais aposel nain-ke ni ona teeria Efesus-pa ikeman nain parosifa fain nia siisimomiyem. Ni o opora baliwep wiar opiman nain feenap nia maiyem. Yiena Auwa Mua Maneka ne yiena Maneka Yeesus Krais wi ikos nia saliwami nia asipiwkin ni kema sonom eliwa ikowen.

Mua Maneka-ke owow iinan kekanowa i yiek

I Mua Maneka unuma wiar fakerikua, eena yiena Maneka Yeesus Krais Wiawi nain. I Krais teeria-pa wiar ikemkun os-ke owow iinan epa yia fonomami saliwap yia moresarep-puomaya i eliwa ikemik. Moram ona iiriw miiwa me onowa ikok yia nanikak, ni o wameiya eliw akena ikeka naep. Naeya i ona teeria kakeniw wiar ikok pina marew ona mokok epa-pa eliwa ikaiyen. Ona yia kookalep iiriw ekera yia nanikap-pueya ikemik. Ne i Yeesus Krais opora wiar opamkun yia aaweya ona muuka wiar aremik. Ona kookalowa-pa naap yia onak. Ona Muuka manek akena kookaliya nain kema suuwap i manek akena yia kemalep yia saliwak. O eena yia saliwowa kema eliw akena. Naapeya i nain kema suuwap unuma fakeriyen.

O manek akena yia kemalep yia saliwowa kema manekiw ikok yia saliwowiw ikaiya. Ona amis maneka wame ookap feenap yia onomak. Krais-ke umep aka wiar orok nain-pa yia sesenareya yia aawep pina yiar iirarek. Krais sesekowa nain iiriw ekera kema-pa maep-puak. Iiriw eena kema maek nain ewur ariman me wuak, ne aakisa ona kookalep yia ofakowak. 10 Nain feenap, ona kema-pa iiwawun maep-puak nain ona epa pepekimok nain pepek ereya urufak-na anirak. Naeya Krais sesekak, os-ke owow iinan ne miiw maa unowa onamiaremi urufam-ikainok naep.

11 Mua Maneka ona kookalowa-pa maa mauwa maiya nain onomakiya. Neemi iiriw ona kookalep yia nanikap-pueya i Krais ekima-pa ona teeria wiar ikemik. 12 Naeya i Yuuda kiikir Krais opora wiar miimap opap ookowa nain yia pepekimok, ikoka yena parin maneka kekanowa onaiya ikem nain anane efa kema suuwami unuma efar fakeram-ikauk naep. 13 Aria ni miiw oko oko teeria pun ni Yeesus Krais opor makena nain iiriw miimaman. Opor eliwa makena nain feenap, aakisa Mua Maneka-ke nia aawok. Ni nain miimap Krais opora wiar opap ona teeria wiar ekaman. Naeya Ewar Eliwa niamiya ikua, Mua Maneka ona iiriw maek naap. O niamiya ikua nain feenap, ni Krais teeria-pa wiar ikeman nain niam ilenam-ikowa-ke. 14 Ewar Eliwa i yiamiya ikaeya Mua Maneka epa eliwa yia fonap-puomak nain maa makena urufiyen. Ona maep koonowak nain naep arewap ikaiyen. Ne Mua Maneka yia aaweya ona wameiya eliw akena ikaiyen. O uuwowa kekanow maneka yia onomak nain wiar kema suuwap unum maneka fakeriyen.

Pol-ke Mua Maneka wi Efesus amisa wiinok naep farek

15 Aria yo opora feenap niar miimam, ni yiena Maneka Yeesus opora wiar opam-ikok Mua Maneka teeria emeria mua oko wia kookaliman. 16 Sira naap niar miimap iiwawow marew Mua Maneka faremi unuma wiar fakerami sira eliwa naakem-ikaiyem. 17 Ne ni baliwep naap ikeka naep yo anane Mua Maneka fariyem, yiena Maneka Yeesus Krais fariya nain, Auwa eena iinan akena unum maneka ne kekanowa onaiya ikua nain. O faremi nokaremkun os-ke woos eliwa niemi kema nia fookeya kema pukep ona opor kemena balisow akena wiar amisar-ikim-ikowen. Naeya o baliwep amisarowen. 18 Ne yo feenap naep Mua Maneka faremi fain pun nokariyem, ni kema puke-afurap o epa eliwa yia fonap-puomak nain baliwep akena wiar amisarowen. Ne epa eliw akena eena ona teeria yia wuomak nain wiimar makena urufiyen, ni naap maep naap kemaiw niam tuupam-ikaiman nain arewap ikowen. 19 Ne ni fain pun wiar amisarowen, i Yeesus Krais opor makena wiar opamkun ona kekanowa-pa manek akena yia asipiya. Mua Maneka kekanowa maa unowa iiwawun nomakek. Ona kekanowa nainiw Krais umep ikaeya iikirowak. Iikirowap owow iinan purupep ona aken ekeria-pa pokomowak. 21 Naeya miiw maa kekanowa unowa ne wi saria mane-maneka ne wi anim onoma os-keriw iinan akena-pa wiar ikua. Ne aakisa wi mua unum onaiya ikemik nain os-ke unuma urup-afurap-ikua, ne ikoka epa kirep epa oko imenariya nain pun naap ikainon. 22 Ne Mua Maneka-ke woos mua wuami maa unowa o tepak-pa wiar wueya os-ke urufiya. Ne os pun ona teeria maneka woos mua wiar ikua. 23 Naeya i ona teeria-na o mia ara-ke. Naapeya ona, ne ona mia ara onaiya iiwawun irina kuisow. Ne miiw maa unowiya, iinan maa unowiya os-ke epa aawemi os-keriw ikaiya.

Copyright information for `MHL