Ephesians 4

I Krais mia wiar arep Mua Maneka sira wiar ookiyen

Aria yo yiena Maneka uuwowa muuta nain aakisa koora ekap ikem, yo nain-ke fain nia maakiyem. Ni Mua Maneka yena teeria efar ikeka naep nia fareya ona teeria wiar ikeman. Naapeya ni ona kookaliya naap sira wiar ookam-ikeka. Naemi niena niam poromi wi Yeesus teeria oko tepak-pa niam wuami saria wieka. Sira-ko samoriwkin-na kema bagiaw marew niam saliwam-ikeka. Ne Ewar Eliwa nia fiirimep kema kuisow nia wuak nain naap palanep ookam-ikok kema epaskun ikeka. I unowiya mia kuisow, ne Ewar Eliwa kuisow muuta nain-ke yiamiya ikua. Naemi i unowiya Mua Maneka-ke yia fareya ona epa kuisow yia fonap-puomak nain arewap ikemik. Naap kema suuwap i unowiya yiena Maneka waisow naimik, ne ona opor eliwa kuisow nain ookimik, ne yia yasuwiwkin ona teeria kuisow aremik. Ne Mua Maneka ona waisow, eena yiena Auwa nain-ke maa unowiya urufiya nain. Maa muutitik os-ke tepak-pa uuwam-ikaeya maa iiwawun eliwa ikaiya.

Aria i mua kui-kuisow-na, Krais yia kemalep ona yia amisarep uuwowa ononer yiek. Naapeya Mua Maneka opor ara oko nain pun feenap maek,

“O iiwua wia nomakep aawep o wameiya iinan urupemik. Ne ona teeria maa ele-eliwa wiek.”
(Someka 68.18)

Aria opor ara fain, “O iinan urupok” nain mauwa maekam naep naap maek? Nain feenap, Krais umep miiw tepak orop-puap kiiriw iinan urupok. 10 O eena kiikir miiw tepak orok nain kiiriw iinan akena urupok. Naeya epa unowa nain yos-keriw epa aawinen naek. 11 Ne os-ke wi mua kui-kuisow uuwowa ononer wiek. Mua papako ona aposel uuwowa wiek, papako profet uuwowa wiek, ne papako owow-owowa ikiwemi ona opor eliwa wia maakowa, papako ona teeria wia urufam-ikowa ne papako somek mua, Mua Maneka teeria sira eliwa wia maakowa nain. 12 Ona uuwowa baliwep fauk naep uuwowa naap wiomakek. Naeya wi unowiya uuwami Krais teeria eena mia ara maemik nain wia asipami unow onaiya kekanep ikaikuan. 13 Uuwowa nain naap ikiwem-ikaeya i unowiya opor makena kuisow nainiw opami kema kuisow ikok Mua Maneka Muuka baliwep wiar amisariyen. Ne i unowiya kema puke-afurap Krais sira nain pepekiw ookam-ikaiyen.

14 Naap ikok i gia kema saarik me ikaiyen, i kema pukep ikaiyen. Naapeya wi wadol mua-ke opor oko yia maakemi afila yiemi me yia kiri-kiripuk. Ifer umukut kuemi eena aasa laalanowiya, naap me yia onuk, weetak. 15 Naeya i feenap oniyen, wi mua oko wia kookalemi opora makeniw maimik. Naeya i Krais sira ookowa kema pukep ikaiyen. I Krais mia ara unowa wiar ikemik, ne o ikiwosa-ke. Ne o wiar kekanep ikemik. Naeya mia ara unowa nain wiam mikowawami mia kuisow arek, nain mia ara unowa wiena uuwowa-ke ononer uuwimik. Naapeya i naap uuwami yiam kookalemi yiam saliwam-ikemkun Krais mia ara arimemi kekaninon.

Wi Kristen sira enuma-pa ikeka wia maakek

17 Naapeya yo opora fain nia maakemi yiena Maneka unuma-pa feenap nia maakiyem. Ni aakisa wi sisin mua sira me wiokeka akena, weetak, weetak akena. Wi maa kema suuwimik nain iiwawun maken marewa. 18 Wi emina kekanep Mua Maneka opora miimowa miatinep maa makena me amisaremik. Naapeya wiena kema suuwowa eliw marew, wi epa kokoma-pa ikemik. Mua Maneka kemena-pa wiar ikowa nain wiena sisina-pa wiam wuimik. Naapeya wi emina reenemi woosa eliw marew ikaimik. 19 Wi sira samo-samora onimik nain emina-ko me ururimik. Ne wiena mia kookalowa wiam ookowa nain kema manekiw ikaimik. Oram uruw mia samora kemaiw ikok sira samo-samora oni-ikim-ikaimik.

20 Nain ni iiriw sira samora-pa nan Krais amisarowa me aaweman, weetak. 21 Ni o opora wiar miimap teeria-pa wiar ikeman. Naeya opor makena eena o wiar ikua nain nia maakiwkin amisarep ikaiman, maken-i? 22 Ni iiriw sira samora onowa kema nain-ke nia mufeya nain onam-ikeman. Ne ni sira awona naap nain piipueka naep nia maakemik. 23 Fain pun suule niemik, ni Yeesus Krais-ke kema niar kiripeya kema suuwowa melina ikok sira enuma ookeka. 24 Naeya ni kema suuwowa enuma eena Mua Maneka ona niek nain ookami o saarik ikowen, feenap, ni dubila ikok sira makena ookam-ikowen.

25 I unowiya epaskun arep mia kuisow akena ikemik. Naapeya ni unowiya wadol sira piipuap opor make-makeniw niam maakeka. Ni naap onam-ikeka. 26 Ni kema bagiwirap-na maa urufap, pina me oneka. Feenap, kema bagiaw naap iram-ikaiwkin epa me kokomarinok, kema siinowa ewurareka. 27 Oko ni epa maala kema bagiwiriwkin Satan-ke nia mufeya sira samora onowen. 28 Wi ikum mua maa ikumarowa neek piipuauk. Piipuap baliwep pokap wiena wapena-pa mauwuk. Uuwap maa saapa imenap wiena wiam kakaltami wi mua maa marew ikemik nain eliw wia asipam-ikauk.

29 Aria ni aakunemi-na opor samo-samora me maeka. Opor eliwiw niam maakeka, naeya wi mua kekanowa marewa nain eliw wia saliw-iram-ikowen. Ne nia miimami kema eliwa ne kekanowa neek aawikuan. 30 Mua Maneka Ewar Eliwa ni niamiya ikaiya nain Yeesus teeria-pa wiar ikeman nain nia ilenam-ikowa-ke. Nain ikip ona epa kereriya neeke nia aaweya eliw akena ikowen. Ne Ewar Eliwa opora kema-pa nia wuomiya nain me wiar fieneka. Naeya kema me wiar samorowen. 31 Ni kema bagiaw irowa nain piipueka, riirinowa ne mua wia iririmowa pun. Me wia kakankeka, wia firekow opora sira-sira me oneka, ne niam irewowa kema nain iiwawun piipueka. 32 Ni niam kookalow manekiw ikok kekelka niam ookeka. Mua Maneka-ke Krais muuta nain pina me niar kema suuwowa nia saliwiya. Naapeya pina nia oniwkin-na kema me suuweka, niam saliweka.

Copyright information for `MHL