Galatians 2

Yerusalem-pa wiam fiirimemik opora

Aria mokoma ten kuisow erepam naap weesereya i Banabas ikos Taitus aawep feekiya Yerusalem ikiwemik. Yo ikiwem nain yieniw me ikiwem, weetak, Mua Maneka-ke kema yieya ikiwem. Yo ikiwep fuunep, wi owow oko oko mua opora wia maakem-miem nain wi Yeesus teeria woos mua uuwowa nain wia maakem. Wiena wiisow ikaiwkin opora baliwep sererkap wia maakem. Wi mua oro-oram me wia maakem, oko yo uuwowa iiriw uuwam nain ne aakisa uuwiyem fain wis-ke efar samoriwkin uuwowa nain iiwawun oro-booninon. Nain naep yo uuwowa nain wi woos mua wiisow ikaiwkin wia maakem. Ne aria wi mia kanima puukowa naimik nain, Taitus o Grik mua-ke, mia kanima puukow marew ikua. Nain wi woos mua-ke o mia kanima puukowa-ko me suuwamik. Nain aakisa wi opor fafarumow mua-ke ekapep Yeesus teeria i yionarep ikok yia samoru naep onamik. I sira awona piipuap Yeesus Krais sira ookami eliw akena ikemkun yiar urufap, Yuuda sira awona ookowa yia suuwamik. Naemi kiiriw naapiw pina yiu naep onamik. Ne is-ke kekanemi opora nain iiwawun wia fienamik. Ne wi opor marew akena ikemik. Nia kema suuwap naap onamik. Naeya ni aakisa Yeesus Krais opor eliwa ne makena nain, anane maneka eliw wiar ookam-ikowen.

Ne aria wi Yeesus teeria woos mua opora wia maakem nain, wi opora kuisow-ko me kiripomemik. Pepek, wi mua unumiya, nain yo wi opora maemik nain me wia kema suuwiyem. Moram, Mua Maneka me yia fookiya. Moram wi opora efar miimap feenap furewamik. Mua Maneka yo Pita ikos uuwowa feenap yiek, Yeesus opor eliwa wia maakowa nain Pita wi Yuuda wia maakem-miawowa, yo Pol wi owow oko oko wia maakem-miawowa. Mua Maneka eena Pita kekanoweya wi Yuuda gone-pa uuwam-miawiya nain kekanowa nainiw yo yieya owow oko oko opora wia maakem-miawiyem. Ne wi Yeesus teeria woos mua wia maimik nain, Yems, Pita ne Yon naap, Mua Maneka-ke kekanowa yo yieya uuwiyem nain efar furewamik. Naap furewap i owow oko oko wiar ikiwep Yeesus opor eliwa wia maakowa nain i Banabas ikos wapena yia opami Mua Maneka uuwowa eliwa niek, naap yia maakemik. Ne wiena wiam maemik, “Is-ke Yuuda mua wiar ikiwep Yeesus opor eliwa wia maakem-miawiyen,” naap wiam maemik. 10 Naap yia maakemi maemik, “I opor oko marew, ni uuwowa eliw ikip uuwowen, nain ni ikiwemi wi Yeesus teeria mua oorpowa nain kema wia suuwap maa wia asipeka.” Naap yia maakemik nain yos pun iiriw yena naap onowa nain kema manek akena wuam-ikem.

Pita sira puukeya Pol-ke amukarek

11 Aria i iiriw Yerusalem-pa opora aakunep kaikamik nain Pita-ke ikiwep Antiok-pa ikok opora nain puukak. Ne yos-ke ona miir onoma-pa arimaniw amukarem. 12 Moram o feenap onak, iiriw Antiok-pa ikok wi owow oko oko Yeesus opora wiar opimik nain wiamiya maa enem-ikua. Ne wi Yuuda mua mia kanima wiam puukowa kekanimik nain, Yems wameiya ikok ikiwemik. Wi nain owow oko oko wiamiya enowa emi. Naeya Pita wia keker opap owow oko wiamiya maa enem-ikua nain iiwawun wia piipuak. 13 Naap oneya wi Yuuda Yeesus opora wiar opimik nain mua papako owow oko maa wiamiya enem-ikemik nain pun o ookap wiam sailemik. Ne Banabas pun kema ere-erup aremi wi sira wiokap naap onak. 14 Ne aria yos-ke wi unowiya Yeesus opor eliwa ara papako wiar kapi fookiwkin naap wia urufap mua unowa ikaiwkin Pita feenap maakem, “No Yuuda mua-ke, nain nos-ke iiriw wi owow oko sira wiokap wi wiamiya ikon. Nain, moram naep aakisa kiiriw kiremi wi owow oko i Yuuda mua sira yiar ookowa wia suuwin?” Yos-ke naap maakem.

Moses sira ookowa piipuap Yeesus Kraisookowa maek

15 Aria makena, i Yuuda mua-ke Mua Maneka opora wiar ookam-ikemik, ne i me wi owow oko oko Mua Maneka me ookimik naap. Nain feenap amisaremik, 16 i Moses sira wuomakek nain ookamkun Mua Maneka pina marew me yia naiya, weetak. Yeesus Krais opora wiar opamkun i pina marew yia naiya. Naapeya i aakisa Mua Maneka pina marew yia nainok naep Yeesus Krais opora wiar opimik. Ne me Moses sira wuomakek nain ookowa-pa Mua Maneka pina marew yia naiya. Moram yiena kae sira nain ookowa-pa Mua Maneka pina marew-ko me yia naiya, weetak akena. I unowiya pina muaiw ikemik. 17 Ne i aakisa Mua Maneka-ke ni pina marew yia nainok naep Yeesus Krais opora wiar opamik. Naap onamkun feenap yia maimik, “Moses sira wuomakek nain me ookimik,” naap yia furewap maimik. Ne i Krais ookami Moses sira wuomakek nain mikikira-pa wuamik. Naeya naep maikuan, “Wi Moses sira wuomakek nain piipuamik, nain onoma Yeesus naneka.” Wi pepek maikuan-i? Weetak akena! 18 Yo iiriw Moses sira wiar ookam-ikem nain piipuap aakisa Krais sira wiar ookiyem. Ne kirep kiiriw nainiw Moses sira ookekam-na yena naap yame maekam, “Yo Moses sira me piipuowa nain piipuam. Naeya sira samoram,” naap yame maekam. 19 Moram yo iiriw Moses sira ookam-ikok feenap yame furewam, yo sira unowa nain ookowa me pepek. Naapeya sira nain piipuap Krais ookam, o sira-pa wiar ikainen naep, ne yo Moses sira ookowa era efar puok, ne aakisa Mua Maneka sira ookowa muutiw ikem.

20 Iiriw Yeesus Krais nomokow moke-pa wuiwkin umok nain yo nain naep sira awona pun ifakimem. Naapeya yena pun umem yame naiyem. Yo aakisa ikem fain Yeesus Krais-ke efamiya ikok kema yiem-ikaeya ona sira-pa ikem. Ne mokok enuma ikem fain Mua Maneka Muuka opora wiar opap ikem. Muuka eena yo efa kookalep ona wame wuami umok nain. 21 Neemi yo Mua Maneka efa kemalep efa saliwak nain kua-pa me wuinen. Moram i Moses sira ookamkun Mua Maneka-ke mua kaken eliwa yia nainon, naap maiyen-na Krais umok nain oram maneka umok.

Copyright information for `MHL