Galatians 5

I Ewar kekanowa-pa ikemik ne uuwimik

Aria, Moses sira wuomakek nain yia wasiep ikua. Ne Krais-ke ni sira nain tepak-pa me ikeka naep yia aawok. Naapeya ni kekanep ikeka. Kekanep ikok nainiw sira awona-pa me niam wuiwkin nain-ke me nia opap koonowap ikainok.

Yo Pol-ke feenap nia maakiyem, ni baliwep kema aaweka. Ni mua mia kanima puukowa eliw yia puukomaka naiman nain, Krais ookiman nain makena me wiar urufowen. Naap onowa nia suuwiwkin eliw naiman nain yos-ke kiiriw opor kekanowa feenap nia maakiyem, ni mua nain Moses sira unowa nain baliwep akena ookami iiwawun welaweka. Ne ni mua feenap maiman nain, Moses sira unowa ookamkun Mua Maneka-ke pina marew yia nainok, naap maiman nain Krais teeria-pa wiar ikowa nain niena sisina-pa niam wuiman. Naeya Yeesus Krais nia kemaliya nain niena oro-boonemi makena me urufiman. Mua Maneka Ewar Eliwa-ke yiamiya ikaeya Yeesus Krais opora wiar opamkun Mua Maneka-ke pina marew yia naiya. Ne i nain makena-ke naep kema manekiw ikaimik. Moram Yeesus Krais kemena-pa wiar ikowa nain mia kanima puukowa-i e me puukowa nain pun oram-ke. Nain ona opora wiar opami mua wia kemalowa nain sira maneka-ke.

Aria ni Yeesus Krais era baliwep wiar ookam-ikaiman, nain mua naareke niar mika-puukeya wakieman? Me Mua Maneka ni nia farek nain-ke era niar mika-puukeya wakieman, weetak. Ni fain-ko kema suuweka, yis gelemuta wuap inasin emera onaiya kiripiwkin iiwawun ariminon. Naapeya wi teeria nain wia uru-urufami ikeka. 10 Ne yos-ke naap nia maiyem, yiena Maneka-ke kema epaskun yia wueya yo opora nia maakem nain kiiriw nainiw era oko-pa me efar gaep ekowawowen. Nain wi mua ni era nain piipueka naep kema nia irakowimik nain ikoka wiena pina-pa Mua Maneka sira wiar urufikuan. Wi mua kamenap nain pun Mua Maneka sira wiar urufikuan. 11 Nain yena emar unowik, wi moram yo efa samoriwkin anane sirirowa aawem-ikaiyem. Yo mia kanima puukowa nia maakekam-na me efa samorekamik. Ne Yeesus Krais nomokow moke-pa umok nain opor eliwa me miatinekamik. 12 Wi mua mia kanima puukowa nia maakemi kema nia irakowimik nain wiena imeka pun iiwawun wiam waromakuk naiyem!

13 Naapeya emar unowik, makena ni Mua Maneka-ke nia aaweya Moses sira wuomakek nain kiiriw me ookiman. Nain ni Mua Maneka teeria-pa wiar ikok niam irami sira samora kiiriw me oneka. Niam kookalemi sira eliwa-pa niam wueka. 14 Moram Moses sira wuomakek nain unowa ikua, nain sira unowa nain sira kuisow fain-ke baguserap ikua, feenap, “No mua oko wia kookale, nena name kookalin naap.” 15 Naeya ni niam uru-urufap, oko ni nieniw irakep niam pukep omanaremi iiwawun niam samorowen.

Ewar Eliwa wia asipam-ikaeya eliw ikaikuan

16 Naapeya yo opora feenap maiyem, ni ikowa Ewar Eliwa kookalowa-pa ikeka, naap nain niena ikiwos samora nain me ookowen. 17 Moram i ikiwos samora-ke Ewar Eliwa opora yia maakek nain wiar fieniya. Neemi i ikiwos samora nain ne Ewar Eliwa opora yia maakek nain wiam anu-fienimik. Ne sira erup nain-ke kema nia irakoweya, ni kema ere-erup arep sira eliwa onowa kookaliman nain me pepek. 18 Nain ni Ewar Eliwa kookalowa ookowen-na Moses sira-ke me nia wasinon.

19 Aria ikiwos samora nain sira fain imeniya: uruw mia samora, soma orowa, enum eruarowa kemaiw ikowa, 20 mua miira sirarep patirowa, epia mua ne maikua onowa, kema bagiwirowa, irakowa imenowa, yamunsiarowa, maa iririmowa, maa ifemakowa, iiwuarowa, wiam fo-fookap irakowa, 21 maa wiar kema kuowa, eka kekanowa eruarowa, ne eka enep momorarep yiawowa, ne sira-sira naap nain. Iiriw naap me oneka nia maakem. Ne aakisa nainiw nia maakiyem, ni sira naap onam-ikowen-na Mua Maneka kemena-pa wiar ikowa nain maa makena me wiar urufowen.

22 Aria sira eliwa Ewar Eliwa-ke imeniya nain feenap: mua wia kookalowa, kemelow manekiw ikowa, kema sonom eliwiw ikowa, kekelka ikowa, maa wia asipowa, kema melin ikowa, mua karanowa, wia saalolokowa, mua saria ikowa, sira naap nain. Ne ni sira eliwa naap onowen-na opora-pa me arowen, weetak akena. 24 Naapeya wi mua Yeesus Krais kemena-pa wiar ikemik nain o nomokow moke-pa umok nain kema suuwimik. Nain kema suuwap wiena mia kookalowa ne sira-sira onam-ikemik nain iiwawun mikikira-pa wuamik. 25 I Ewar Eliwa kekanowa-pa ikaimik, naapeya Ewar Eliwa kema yiiya nain ookikua. 26 Ne yiena me yiam pirikua, kema me yiam bagiwirowikua ne kema me yiam kuikua.

Copyright information for `MHL