Galatians 6

Wiam asipowa sira

Emar unowik, wi mua akimowa-pa oro-booniwkin-na, ni Ewar Eliwa kookalowa ookiman nain-ke kekelka wia maakemi wia kakeneka. Ne nis pun niena niam uru-urufap, oko nis pun iir oko akimowa-pa wakiowen. Naap niam asipami ni-nieniw pina niam akuawomaka, ne sira naap onowen-na Krais sira nain pepekiw wiar ookowen. O mua oko feenap wame maiya nain, “Aa, yo mua eliwa-ke,” naap wame maiya nain ona wame peeskimiya. Ne pun oram maneka naap wame maiya. Naapeya ni mua kui-kuisow niena sira niam furewam-ikeka. Ne mua oko sira wiar urufap feenap me maeka, o sira samora-ke, yo sira eliwa-ke. Ni niam kui-kuisow sira kamenap oniman nain niam fureweka. Moram mua kui-kuisow wiena sira kamenap onimik nain wiam amisaruk.

Sira eliwa oko feenap, mua eena Mua Maneka suule niimik nain maa wia asipeka.

Naapeya nieniw me niam peeskimeka. Ni feenap ne naeka, maa marew, i Mua Maneka sira eliw wiar fieniyen. Mua Maneka naap maowa me pepek akena. Moram no maa mauwa upinan-na kakeniw naap aawinan. Moram o mua miiw sira kookalowa ookam-ikaiya nain kookalowa welawami sira samora imen-ikiwemi mesenalinon. Ne o mua Ewar Eliwa kookalowa ookam-ikaiya nain anane eliwa ikowa imeninon. Naapeya i sira eliwa onam-ikowa kema me pinariyen. Moram i sira eliwa kekanep oni-ikiwem-ikemkun ikoka ona epa-pa kirowa yiar imenarinon. 10 Naapeya i sira eliwa wia onowa kema manekiw ikok wi maa-ko iiwariwkin wia asipam-ikaikua. Ne wi Yeesus kemena-pa wiar ikemik nain-ke balisow akena wia asipikua.

Mua Maneka teeria-pa ikok sira enuma ookowa-ke

11 Aria ni wapen siisia maneka fain efar urufeka, yos-ke yena wapena-pa parosifa ara fain nia siisimomiyem.

12 Wi mua ni mia kanima puukowa nia suuwimik nain wi mua eliwa-ke yia nauk naep naap nia maakimik. Onoma fain muuta nain naap onimik. Yeesus Krais nomokow moke-pa umok nain opora wiar maemi mia kanima puukowa sira onaiya maiyen-na yia kookalep me yia samorikuan, wi naap maimik. 13 Makena wi wiena mia kanima puukimik, nain wiena pun Moses sira wuomakek nain balisow akena me ookimik. Nain ni mia kanima puukiwkin-na wi unum maneka aawikuan. Wi nain naep ni mia kanima puukowa nia maakimik. 14 Aria yo maa oko me yame iriyem. Yo yena Maneka Yeesus nomokow moke-pa umok ne efa aawok muut nain maemi yame iriyem. Moram yo Yeesus Krais muuta nain miiw sira-sira fain ookowa yena yame weeser-wuami iiwawun mikikira-pa wuam. 15 Feenap, o teeria-pa wiar ikemik nain mua mia kanima puukowa nain maa oram-ke ne mia kanima me puukowa nain pun maa oram-ke. Nain maa kuisow fain maneka-ke, kema iiwawun kiremkun Mua Maneka mua enuma yia wuinon. 16 Ne wi mua Mua Maneka sira-pa wiar ikemik nain ona teeria kakeniw-ke. Naeya wi kema sonom eliwiw ikaikuan ne pun Mua Maneka wia kemalep wia asipinon.

17 Yo opora silewami feenap maiyem, ikoka kiiriw nainiw opora me efa oneka. Moram yo mia petiria onaiya ikem fain Yeesus uuwowa muuta nain mia petiria aawem.

18 Aria emar unowik, Yeesus Krais yiena Maneka nia kemalep nia asipam-ikaeya ni kema eliwiw ikowen. Makena.

Copyright information for `MHL