Hebrews 1

Mua Maneka Muuka-ke i opora yiek

Iiriw ekera Mua Maneka-ke iir unowa siisia sira-sira ona profet wia maakeya wis-ke yiena nembesir wia maakemi ofakowam-ikemik. Ne naap ekapep ekapep aakisa miiwa weeserow epa fain o kema kamenap ikua nain yia ofakowami uuwowa nain ona Muuka mia-pa ariman wuak. Muuka nain-ke maa unowa onamiarinok naep uuwowa o wapena-pa wuomaya os-ke miiwa ne iinan maa muutitik tawerarek. Mua Maneka unum maneka, parina ne kekanowa onaiya ikua nain os pun naap akena-ke. O opora eena maemi miiwa ne iinan maa muutitik kekanowa wieya naap ikomakek. Ne wi miiw mua pina wia iiraromowa uuwowa nain welawap urupep Mua Maneka aken ekeria-pa wiar pokap ikua, eena Mua Maneka unum maneka iinan akena-pa ikua nain.

Mua Maneka Muuka-ke wi ensel wia nomakek

O ona unum maneka eena Mua Maneka iwok nain ookami wi ensel wia nomakek, ne wi o tepak-pa wiar ikemik. Nain feenap, iiriw akena Mua Maneka-ke ona Muuka maemi maek,

“Yo Wiawi wiar ikainen, ne o yena Muuka efar ikainok.”
(Someka 2.7)

Ne Muuka maakek,

“No yena Muuka-ke, ne yo nena Niawi-ke.”
(2 Samuel 7.14, 1 Stori 17.13)

Aria opora eena Muuka maakek nain wi ensel kuisow naap-ko wia maakek-i? Weetak.
Iir nain Mua Maneka ona Muuka kuisow akena nain miiwa poromi maek,

“Mua Maneka ensel unowa nain o unuma fakeruk.”
(Lo 32.43)

Ne wi ensel wia maek,

“Wi yo uuwow teeria-ke. Ne wi ewar saarik wia sesekiyem. Ikiwimik nain mukuna wilinowa saarik.”
(Someka 104.4)

Ne nainiw Muuka maemi maek,

“Oo, Mua Maneka, no anane saria maneka ikainan. Ne nos-ke miiw emeria mua wia urufami era makena-pa wia pikiwem-ikainan.
No sira samora manek akena miatinep sira makena onowa kookalin. Naapeya Mua Maneka eena nena Mua Maneka-ke wel ikiwosa-pa nefar sawikami saria maneka nefa wueya no kemelowiw ikain. Naap onami unum maneka nieya wi nefamiya ikemik nain no tepak-pa nefar ikemik.”
(Someka 45.6-7)

10 Ne pun maek,

“Oo Maneka, no iiriw ekera miiwa ne iinan maa muutitik nena kema siisia-pa taweraren.
11 Ne maa muutitik nain ikoka iiwawun mesenalinon, ne nena wia. No anane maneka naap ikain nain-ke. Maa unowa nain ikoka mia suuwowa saarik awonarep samorarinon.
12 Ne mia suuwowa awonareya wu-wueskap wafurimik naap oninan. Ne pun mia suuwowa ofa geenareya iirarep enuma wuimik, naap akena oninan. Ne no wia, no anane naap ikainan.”
(Someka 102.25-27)

13 Aria Mua Maneka-ke maakek,

“No ekapep yena aken ekeria-pa efar poka. Naap ikaeya nena iiwua iiwawun no kepur tepak-pa wia wuinen.”
(Someka 110.1)

Aria Mua Maneka opora Muuka maakek fain ensel kuisow-ko naap-ko maakek-i? Weetak.
14 Wi ensel-na wi ewar-ke, ne Mua Maneka uuwowa onomimik. Ona wia sesekeya mua wia asipam-ikaimik, wi eena Mua Maneka wia aaweya ona teeria-pa ikemik, wi nain.

Copyright information for `MHL