Hebrews 13

I mua oko manek akena wia kookaliyen

Aria ni Yeesus teeria, ni niam kookalowa-ke naap niam kookalem-ikeka. Ne mua pepena-ko niar ekapuk-na wia tetareka. Sira eliwa nain kemaiw ikeka. Iiriw mua papako naap onami miiw mua-ke naep wi ensel wia tetaremik. Aria wi koora ekap ikok sirirowa aawem-ikaimik nain wia kema suuweka, wi wiamiya koora ekap ikowa saarik ikeka. Ne wi papako wia samoriwkin sirirowa maneka aawem-ikaimik nain pun wia kema suuweka, nis pun sirirowa eena wi aawimik naap aaweka.

Aria muewowa sira maneka-ke, ni naap maemi baliwep ookeka. Muaiya emeria kema kuisow ikok uruw mia wiam kaikuk. Moram wi uruw mia, sosor mia ululkowimik nain ikoka Mua Maneka-ke pina nain wia kiripominon. Ni maamuma kookalowa-ke kema me nia pinarowinok. Ni maa pepek efar ikua naemi maa unowa kerew aawowa kema me urupeka. Moram Mua Maneka ona nia asipowa nain iiriw maeya ikua,

“Yo me nia piipuinen, yo miira me nia fieninen, weetak akena,”
(Lo 31.5)

naap maek.
Naapeya i kekanep feenap maiyen,

“Yiena Maneka-na yena efa asipowa-ke. Yo me keker opinen. Wi mua efa samorowa maimik nain wi kamenap efa samorikuan?”
(Someka 118.6-7)

Ni niena iiriw woos mua eena Mua Maneka opora nia maakem-ikemik nain wia kema suuweka. Wi opora opam-ikok umemik, naapeya wi sira nain wiar ifarimeka.

Opora fain makena: Yeesus Krais anane ikaiya, iiriw naap ikua, aakisa pun naap, ne anane maneka naap ikaiya. Naapeya opor miililina unowa nain-ke nia mufeya me ookeka. Mua Maneka eena yia kemalep yia asipam-ikaiya nain maemi i kekanep opora wiar ookiyen. Me maa enowa sira ookowa-pa opora baliwep wiar ookiyen, weetak. Sira naap nain-ko me yia naapiya. 10 Wi pris eena Mua Maneka tempel koora-pa uuwimik nain patirow maa enowa papako eliw enimimik. Nain i aakisa patirow maa esimsa oko yiar ikua, ne maa nan ikua nain wi pris enowa me pepek.

11 Aria feenap, pris woos mua-ke pina wiar iirarowa naep maa eneka aka aawep sel koora Kemen Iwowa Emi Akena neeke pikiwiya. Ne maa eneka makena pikip owow sisina-pa kuumiwkin iiwawun awiya. 12 Sira naapiw Yeesus ona aka-pa wi mua pina wiar iirarowa naep owow sisina-pa sirirowa maneka aawep umok. 13 Wi Yeesus sisina-pa wuap emin ururowa iwemik, naapeya is pun o wiar ikiwep naap aawikua. 14 Moram i miiwa-pa ikemik fain owowa eena anane ikowa nain weetak. Naapeya owowa ikoka imenarowa nain urufiyen naemi arewam-ikaimik.

15 Naapeya i anane Yeesus unuma-pa Mua Maneka lotu onami unum maneka iwikua. Ne yiena opaimika-pa o sira wiar maemi unuma wiar fakerikua. 16 Ne pun mua oko wia saalolokami wia asipowa sira nain kemaiw ikaikua. Moram Mua Maneka sira unowa naap nain patirow maa saarik kookaliya.

17 Niena woos mua tepak-pa niam wuami oporawiar miimam-ikeka. Moram wis-ke nia urufam-ikok nia kakenowa-ke. Wi uuwimik nain Mua Maneka-ke wiar pupinon. Naapeya opora wia miimeka. Naeya wi uuwowa onimik nain kemeluk. Oko ni emina kekaniwkin wi kema pinarep ikok baliwep me nia asipikuan, weetak.

18 Ne is pun yia kema suuwap Mua Maneka fariwkin yia asipam-ikainok. I yiam amisaremik, i anane sira eliwa onowa kookalimik. Naapeya yiam pupep maimik, i kema melin maneka ikemik. 19 Yo fain kema manek akena kookalep nia maakiyem, ni Mua Maneka fariwkin yo ewur akena era-ko wuomeya niar ikiwinen.

20 Mua Maneka i kema sonom eliwa yiiya nain-ke yiena Maneka Yeesus iikirowak, eena sipsip nepiow mua kekanowa nain. O umep ona aka-pa Mua Maneka opor enuma yiamiya kaikak nain koonowak. 21 Yo feenap nia naiyem, Mua Maneka sira eliwa onowa kema nieya o sira kookaliya nain naap onam-ikowen. Neemi Yeesus Krais kekanowa-pa nia kekanoweya sira kookaliya nain naap onam-ikowen. I unum maneka anane naap wiar fakeram-ikaikua. Makena.

22 Aria emar unowik, yo nia kekanowekam naep parosifa iiw muuta fain nia siisimomam, naapeya opora fain baliwep miimeka.

23 Yo amisa niiyem, yiena emar Timoti koora ekap ikua nain aakisa weeser-wuamik. Efar ekapowa ewur arinon-na ikos ni nia urufowa ikiwiyen.

24 Wi woos mua ne ni Mua Maneka teeria unowa nain wia maakeka, i eliwa ikeka wia naimik. Niena opor epaskun Mua Maneka teeria Itali-pa ikemik nain unow maneka ni eliwa ikeka nia naimik.

25 Yiena Mua Maneka nia kemalep nia asipam-ikainok.

Copyright information for `MHL