Hebrews 2

Mua Maneka yia aawok nain maa maneka-ke

Ne naapeya i Yeesus opor makena wiar miimamik nain baliwep akena wiar opam-ikok yiam kemapawam-ikowa-ke. Oko i maa melupiw kema irinaremi iiwawun piipuiyen. Nain onoma feenap, Mua Maneka opora iiriw wi ensel wia maakeya Moses maakem-ikemik nain opor makena-ke. Ne wi mua opora nain fienap me ookamik nain wia kiripomaya wi sirirowa maneka aawemik. Moram o yia aawowa uuwowa onak nain maa maneka-ke. Yiena Maneka Yeesus yia aawowa nain ona ariman maek. Naeya wiar miimamik nain-keyia maakemi opora nain maken akena-ke naemik. Ne naapeya i opora me wiar miimiyen-na sirirowa maneka aawowa nain kamenap baurariyen? Opor makena wi eena maemik nain Mua Maneka-ke kekanowami wi mia-pa wiar wueya o kekanowa ariman wiar wuami maa miililina sira-sira onamik. Ne pun ona kookaleya Ewar Eliwa-ke uuwowa ononer wiomakek. Naapeya i opora nain makena-ke naiyen.

Yeesus kiikir yia aawok

Moram opora i eena maemik nain Mua Maneka-ke me wi ensel wia naep miiw enuma oninen naek. Ne pun me wi ensel-ke urufam-ikauk naek, weetak. I mua yia naek, moram ona opor ara oko-pa feenap maek,

“Aa, Mua Maneka, i mua-na maa oram-ke, no me yia kema suuwowa nain yia kema suuwin. Ne pun me yia kakaltowa nain yia kakaltin.
Aria no mua onap wi ensel tepak-pa wiar wuan, ne wi ensel-ke o lawiliw nomakemik. Ne mua meta ne unum maneka iwemi miiw maa muutitik urufam-ikainok naen.”
(Someka 8.4-7)

Opora naap maek. Makena, Mua Maneka-ke mua onap maa muutitik os-ke urufam-ikainok naek. Maa kuisowo me urufam-ikowa-ko me ikua, weetak. Nain aakisa mua-ke maa muutitik urufam-ikaeya-ko me urufimik.
Nain Yeesus-ke makena, i naap urufimik. O iiriw miiwa-pa ikua nain epa iiw muuta wi ensel tepak-pa wiar ikua. Moram Mua Maneka-ke i miiw mua pina muuta nain yia kemalep os-ke uminok naek. Naapeyao sirirowa maneka aawep umeya Mua Maneka-ke kekanowa ne unum maneka iwok. Naeya aakisa saria ikok miiw maa muutitik urufam-ikaiya.

10 Mua Maneka miiw maa muutitik onomakep urufam-ikaiya, ne neeke yena unum maneka efar amisaruk naek. Os-ke Yeesus yena muuk teeria unowa nain wia aaweya wi unum maneka pun aawuk naep o neek sirirowa aawinok naek. Ne sirirowa aawemi pina sira-sira nomakep dubil maneka ikainok naek. Naapeya Muuka sira naap onak nain pepek akena imap-puak.

Mua Maneka sira onak nain makena-ke

11 Aria Yeesus ne wi mua pina wiar iirareya Mua Maneka teeria-pa wiar ikemik nain unowiya wiena wiawi kuisow. Naapeya o wi unowa nain aamun wia naowa nain emina me ururiya. 12 Neemi Mua Maneka maakek,

“Yo ikoka no unuma nefa fakerami yena aamun unowa wia maakinen. Ne fiirimow epa-pa someka awemi unuma nefa fakerinen,”
(Someka 22.22)

13 Ne pun maek,

“Mua Maneka makena-ke naemi opora wiar opiyem.”
(Aisaiya 8.17)

Ne nainiw maek,

“Aakisa yo fanem, Mua Maneka muuk teeria unowa yo wapena-pa wia wuak nain unowiya fan ikemik.”
(Aisaiya 8.18)

Yeesus miiw mua puukap ikok i yia asipak

14 Aria Mua Maneka yena muuk unowa wia maek naini miiw mua fanemik. Ne Yeesus pun miiw mua-ke. Yo miiwa-pa ikok umep Satan kekanowa iiwawun wiar samorinen naek, eena miiw mua umowa wuak kekanowa nain. 15 Wi emeria mua umowa keker opamik. Nain-ke wia kaikap-pueya ikemik. Yos-ke umemi wia wasirkamkun wi umowa me keker opuk naek. Naapeya o umok. 16 Makena, me wi ensel wia asipekam naep umok, weetak. Wi eena Abraham saarik Mua Maneka opora wiar opimik nain wia aawekam naep umok. 17 O mua-ke, miiw mua pina wiar iirarowa naep wi miiw mua eena ona wiamun unowa nain imenarimik naap imenarek. Ne pun wia kemalep pris woos mua
2.17Wi Yuuda mua Mua Maneka tempel koora-pa patirowa uuwowa onam-ikemik nain pris woos mua kuisow wiar ikua. Os-ke mokoma kuisow fofa kuisow tempel kemena ikiwep konim maneka sererep ikua nain nomakep kemena oko tepak akena nain ikiwem-ikua. Maa eneka aka feekiya ikiwep Mua Maneka miira-pa fiena-warem-ikua, wi Yuuda pina wiar iirarowa naep.
arep Mua Maneka patirowa maek nain ona wame wuami patirap wia aawemi pina wiar iirarinen naek.
18 Akimow unowa iiriw wiar imenareya yoowa maneka aawok. Naapeya aakisa wi akimowa-pa ikemik nain eliw wia asipinon.

Copyright information for `MHL