Hebrews 3

Yeesus unum maneka-ke Moses unuma wiar nomakek

Naapeya yena teeria epaskun, ni unowiya Mua Maneka-ke nia fareya o teeria-pa wiar ikeman nain, ni Yeesus kema wuam-ikeka. Mua Maneka-ke o uuwowa sesekak, ne o pris woos mua arek. I o kema suuwap opor makena wiar maimik, mua nain. Fain baliwep kema suuweka. Iiriw Moses Mua Maneka koora urufow mua saarik Mua Maneka opora wi Yuuda wia maakem-ikua. Ne Yeesus pun naap, Mua Maneka-ke o uuwowa nain pepekimep opora maakek nain kakeniw wiar ookami uuwam-ikua. Makena, Moses unum maneka ikua, nain o koora saarik. Ne Yeesus-ke o nomakek, kekanowa ne unum manek akena aawok. Feenap saarik, mua eena koora kuaiya nain unum onaiya ikua, ne koor makena weetak. Makena, koor unowa mua-ke kuaimik, nain maa muutitik Mua Maneka-ke koora kuowa saarik sirarep-puak. Moses uuwow mua eliwa-ke. O Mua Maneka opora ookami ona teeria wia urufam-ikomak. Neemi Mua Maneka wiimar maa mauwa imenarinon naek nain os-ke wia maakem-ikua. Nain Krais Mua Maneka Muuka-ke, os-ke Wiawi opora ookap teeria wia urufiya. I kekanep o opora nain makena-ke naep naap ookam-ikaiyen-na is pun ona koora-ke.

Wi mua emina kekanimik nain uurarow epa me imenikuan

Aria wi opora me miimamik nain Ewar Eliwa eena maek nain feenap,

“Ni aakisa Mua Maneka opora wiar miimap-na emina me kekaneka. Iiriw wi nembesir epa asia nomon manekiw-pa ikiwem-ikok emina kekanep Mua Maneka opora wiar fienam-ikemik. Iir nain wi Mua Maneka opora fienami kekanowa wiar akimam-ikemik. Ne ni naap me oneka.
Yo mokoma ten erepam naap kekanowa onaiya maa miililina unowa imenami niena nembesir wia asipam-ikem. Nain wi kema pukowa marew, yo opora efar fienap efa akimam-ikemik.
10 Naapeya wi teeria nain wia kema bagiwirap maem, wi woos reenowa-ke. Makena, wi sira efar urufamik, nain mikikira yiep yo opora me efar ookam-ikemik.
11 Naeya yo kema bagiwirap opora koonowami maem, wi uurarow epa wia wuomam nain ikip me fuunikuan.”
(Someka 95.7-11)

Mua Maneka opora-ke naap maek.

Mua Maneka opora me wiar fieniyen

12 Aria emar unowik, ni maa uru-urufap, oko ni teeria mua oko Mua Maneka anane ikaiya nain opora wiar fienap makena-ke me wiar naep iiwawun piipuinon. 13 Ne Mua Maneka-ke aakisa opora yia maakem-ikaiya, ni naap maep anane maneka kema niam iikirowam-ikeka. Ne ni teeria mua kuisow sira samora-ke me nia momoreya emina me kekaninok. Naeya Mua Maneka me piipueka. 14 Nain onoma feenap, i iiriw Krais opora wiar opam-ikemik nain naap kekanep ikemkun Krais kiiriw ekapinok. I naap ikaiyen-na Krais wameiya ikok maa muutitik epaskun urufam-ikaiyen. 15 Moram opor ara oko nan maek,

“Iiriw niena nembesir emina kekanep Mua Maneka opora wiar fienam-ikemik. Ni sira me wiokeka. Aakisa Mua Maneka opora wiar miimap-na emina me kekaneka.”
(Someka 95.7-8)

16 Ni fain kema suuweka, iiriw teeria kain-ke Mua Maneka opora wiar fienam-ikemik? Nembesir teeria Moses-ke Isip-pa wia aawep epa oko wia pikiwem-ikua, wi teeria nain. 17 Ne mokoma ten erepam Mua Maneka teeria kain kema wia bagiwirap wia samo-samoram-ikua? Teeria nain-keriw epa asia saa manekiw-pa ikiwem-ikok pina onap umem-ikemik, wi nain. 18 Ne Mua Maneka-ke opora maep koonowak, “Wi uurarowa epa wia wuomam nain ikip me fuunikuan.” Opora feenap nain teeria kain wia maek? Wi opora makena-ke me wiar naemik, wi nain. 19 Naapeya wia amisarep maimik, wi iiriw Mua Maneka opora me wiar opam-ikemik, naeya wi ikiwep epa eliwa me fuunemik.

Copyright information for `MHL