Hebrews 6

I kekanep naap ikaiyen

Aria i Krais opora miimap kema kirep sira samora piipuap o ookimik, opora nain nainiw me mae-maep naem-ikaiyen. Nain eena koor umua poka iiriw koonowap-puamik nain-ke. Ne aakisa mua iperowa suule wiowa saarik onowa-ke ikua. Ne opora fain me senam aakuniyen: mia muura faemi wapena yasuwow sira nain, ne wapena ikiwosa iinan-pa wia wuowa, ne wi iiriw umemik nain kiiriw iikirowa, ne Mua Maneka mua wia mekawap epa eliwa-pa i e epa samora-pa wia wuowa, opora naap nain. Opora unowa nain neek ikaeya-ko, i Yeesus Krais opora wiar aakunemi kemena wiar fookami kema pukep ikaiyen, Mua Maneka kema naap yiem-ikaeya-na.

Aria wi Yeesus opora iiwawun parinarep iiriw wiar aawemik. Ne o wameiya ikok owow iinan maa muutitik iiriw iiwawun furewamik. Ewar Eliwa pun orop wi wiamiya ikaeya furewamik. Mua Maneka opora wia maakek nain makena wiar imenareya eliwa-ke naemik. Ne pun Mua Maneka kekanowa maa miililina mia-pa wiar imeneya urufamik. Wi mua nain Yeesus iiwawun piipuikuan-na ikoka kamenap kema kirikuan? Me pepek akena. Moram wi maa unowa nain amisaremik, nain wi Yeesus ookowa piipuikuan-na Mua Maneka Muuka nomokow moke-pa nainiw patot warowa saarik onami emina ururowikuan. Naeya wi nainiw kema kirikuan-i? Me pepek.

Sira nain feenap, miiwa ikua, anane ipia oromi eka iweya manin maa enowa baliwep arimep makenariya. Naeya manin onoma maa enowa nan aawiya. Miiwa naap nain Mua Maneka-ke anane sonomiya. Ne miiwa nain sipir samora ne ifar asia-ke geewomakinon-na miiwa nain eliw marew. Naeya Mua Maneka-ke samorinen naiya. Ne ikoka kuumeya-na awemi foma muup marew ikainon.

Emar unowik, i opora kekanowa nia maakemik. Nain i iiriw nia amisaremik. Mua Maneka-ke iiriw nia aaweya o sira-pa baliwep ikeman. 10 Mua Maneka sira kakeniw ikaiya, pepek yia kiripominon. Naeya ni uuwowa oniman nain niar kema suuwinon. Ne ni ona unuma-pa ona teeria mua oko wia kookalep wia kakaltaman nain niar kema suuwinon. Ne aakisa naap onam-ikaiman nain pun. 11 Naemi i feenap oneka nia naimik, ni unowiya Mua Maneka uuwowa onomiman nain kema kaalalep naap onam-ikok ikok umowen-na eliw. Naeya Mua Maneka maa eliwa nia wuap-puomak nain makena urufowen. 12 Ni naap palanem-ikowen-na me lebumarowen. Wi papako Yeesus opora opap kekelka ikok kekanep ikemik. Wi naap ikok ikok Mua Maneka maa mauwa wia maakep koonowak nain ikoka siisia eliwa urufikuan. Ne nis pun wi sira wiar ookami naap ikowen.

Mua Maneka opor makena maek

13 Mua Maneka Abraham opora maakep koonowak nain mua oko o kekanowa wiar nomakowa nain marew, waisowiya ona wame unufami maken akena naek,

“Yo kekanowa niemkun nena nembesir teeria kerew akena imenarem-ikaikuan.”
(Yenesis 22.17)

15 Naap maakeya Abraham nain kekelka arewam-ikua. Naapeya opora eena Mua Maneka maakek nain makena urufak.

16 Sira naap ikua. Opora aakunemi mua oko-ke iikirap yo opora nain makena-ke naemi mua oko kekanowa wiar irap ikua nain unuma unufami mainon. Naeya opora koonowami opora umukikuan. 17 Iiriw Mua Maneka ona Abraham opora maakek nain ikoka i ona nembesir teeria maa maken akena wiar imenareya urufuk yia naek. Ne o nainiw kema oko me wuinen naep ona wame unufami maken akena naek. 18 Ne maa erup nain feenap, o opor makena maep koonowak, ne pun ona wame unufami opora nain maek. Naapeya o kema kirep maa oko maowa me pepek, ne me sailinon. Ne i Mua Maneka wiar ekap eliw ikaimik nain i maa erup nain kema suuwap kekanep Mua Maneka maa eena maek nain kemaiw yiam tuupam-ikok arewam-ikaiyen. 19 I maa eena arewam-ikemik nain aasa aanka saarik yia koonowap ikaeya pinarep ikaimik. Nain feenap, Yeesus o pris woos mua lotu koora konim maneka sererep ikua nain
6.19Mua Maneka lotu koora kemena-pa konim maneka sererep ikua nain epa puukap ikaeya, pris woos mua muutiw mokoma kerereya fofa kuisow muutiw konim maneka epa puukap ikua nain kemena ikiwem-ikua. Ikiwep bokis Mua Maneka miir onoma-pa ikua nain aka fiena-waremi wi pina wiar iirarem-ikua. Wi mua oram ikiwowa emi maneka. Ne Yeesus yia asipami yia aawowa naep tepak ikiwep owow iinan urupep Mua Maneka miir onoma-pa imenarek.
nomakep ikip tepak akena-pa Mua Maneka neeke wiar fuunek.
20 I yia naep o kiikir miimep ikip nan ikok pris woos mua uuwowa onam-ikaiya. Ne anane maneka naap ikainon, Melkisedek pris woos mua ikua naap.

Copyright information for `MHL