Hebrews 7

Melkisedek unum maneka onaiya ikua

Aria Melkisedek-na Salem owow saria-ke, nepun Mua Maneka Iinan Akena nain pris-ke. Iiriw Abraham irakowa ikiwep wi owow saria wiam erepam wiamiya irakep wia ifakimok. Ne kirep owowa ekapem-ikaeya Melkisedek-ke o miira puuk-ikim-ikok urufap ane-puukak. Ane-puukami Mua Maneka kekanowa iwok. Naeya Abraham irakowa-pa maa unowa aawomakek nain sererkap mokoka iimeka kuisow wuap mokoka kuisow arowap wuomak. Melkisedek unuma nain kemena feenap, “Owow saria kaken eliwa-ke”. Ne opora Salem nain kemena feenap, “Kema sonom eliwa” ne “Pokow eliwa”. Ne o Salem owow sariaiya maemik, o emeria mua pokowa eliwa wiiya. O wiawi onak marew, ne pun o kaka marew. O imenarek nain me amisaremik, ne umok nain pun me amisaremik. O Mua Maneka Muuka saarik pris uuwowa-pariw ikua, anane maneka naap.

Aria ni kema suuweka, Melkisedek mua unum maneka-ke. Feenap, yiena nembesir Abraham yiena nomokow fiira-ke. Nain o maa unowa irakowa-pa aawomakek nain mokoka kuisow o wuomak. Aria Liwai Abraham nembesir teeria-pa imenarek.
7.5Abraham wiimasip Yekop muuka ten kuisow okaiwi-pa erup, ne muuka oko unuma Liwai. Mua Maneka Moses maakek nain ookami Liwai teeria pris uuwowa wuak. Wi Isrel maa enowa ne maa unowa mokoka iimeka kuisow wuap kuisow wi Liwai wia wuomimik.
Ne wi Liwai aka-pa imenaremik nain wi pris arem-ikemik. Ne wiena sira ookami wiena kaka epaskun Isrel maa unowa mokoka kuisow wiar aawem-ikemik.
Ne Melkisedek me Liwai kerekera-pa imenarek, nain o Abraham kekanowa iwok, ne Abraham maa unowa mokoka kuisow o wuomak. Abraham eena Mua Maneka-ke opora maakep koonowak, mua nain. Naeya maimik, makena, mua kekanowa iwok nain maneka, ne kekanowa eena wiar aawok nain o tepak-pa wiar ikua. Aria wi Liwai wi Isrel maa unowa mokoka kuisow wiar aawem-ikemik, nain wi umem-ikemik. Nain Melkisedek o anane ikaiya naimik. Melkisedek eena Abraham era-pa miira puukak nain, iir nain Liwai me imenarowa ikua, ona nembesir Abraham aka-pa wiar ikua. Naapeya feenap maikua, Abraham maa mokoka kuisow Melkisedek wuomak nain, Liwai pun maa mokoka kuisow Melkisedek wuomak naiyen. Naapeya maikua, Melkisedek pris uuwowa nain wi Liwai wiar nomakek.

11 Aria Moses sira wuomakek nain-ke ikaeya wi Isrel nain ookami wi Liwai kerekera-ke pris uuwowa onam-ikemik. Ne wi teeria nain pris uuwowa nain-pa i mua unowa Mua Maneka mokoka-pa mua kaken eliwa arekamik-na aa, Mua Maneka-ke pris oko imenarinok me naekak. O eena me wi Aron teeria-pa pris arem-ikemik naap ikua, weetak. O iiriw Melkisedek pris ikua naap. 12 Aria pris uuwowa oko imenareya sira pun naap, nainiw oko wuowa-ke ikua. 13 Ne pris eena Mua Maneka maek nain kerekera oko-pa imenarek. Iiriw kerekera nain-ke mua kuisow pris-ko me arep Mua Maneka patiram-ikua. 14 Nain ariman maneka ikua, yiena Maneka-na Yuuda kerekera-pa imenarek. Ne iiriw Moses-ke ikoka Yuuda kerekera-pa pris-ko imenarowa-ko me maem-ikua.

Yeesus anane pris ikainon, Melkisedek saarik

15 Pris oko iiriw Melkisedek ikua naap nain aakisa imenarek. Naeya i sira enuma eena maemik nain ariman arek. 16 Wi Liwai kerekera-pa imenaremik nain wiena sira ookami pris uuwowa aawem-ikemik, ne o weetak. O ona anane ikowa kekanowa-pa pris arek. 17 Moram Mua Maneka-ke maakek,

“No pris ikon nain anane maneka naap ikainan, iiriw Melkisedek ikua naap.”
(Someka 110.4)

18 Ne iiriw Moses sira wuomakek nain kekanowa mareweya yia asipowa me pepek. Naeya Mua Maneka-ke nain iirarep sira enuma wuak. 19 Moram sira awona ookimik nain Mua Maneka-ke i pina marew dubil maneka ikemik naap-ko me yia naiya. Naapeya era oko yia wuomak. Naeya i aakisa o wameiya wiar ekowa era yiar ikua.

20 Ne oko pun feenap, Mua Maneka mua eena pris uuwowa-pa wuak nain ona wame unufami maken akena naep maakek. Wi iiriw pris arem-ikemik nain naap-ko me wia onam-ikua, weetak. 21 Nain Yeesus-ke makena, Mua Maneka ona wame unufami maken akena naemi no pris uuwowa-pa ike naakek. Ona opor ara oko maek,

“Mua Maneka-ke maakek, ‘Maken akena naiyem. No pris uuwowa niem nain anane maneka naap ikainan. Yo nainiw kema oko me wuinen.’”
(Someka 110.4)

22 Naapeya Mua Maneka-ke maken akena naemi Yeesus pris uuwowa-pa wuak. Naeya Mua Maneka opora yia maakep koonowak nain os-ke opora wiar opomak. Iiriw eena Mua Maneka Moses opora maakep koonowak nain iiwawun nomakek.

23 Ne oko pun feenap, iiriw mua unowa pris arem-ikemik nain wi uuwam-ikok umem-ikemik. Ne mua oko-ke epa wiar aawem-ikemik. 24 Nain Yeesus naap nain wia. O anane maneka ikaiya nain-ke. Naapeya o pris uuwowa naap opam-ikainon. 25 Naeya wi mua o unuma-pa Mua Maneka wameiya wiar eku naep onimik nain os-ke wia aawep wia pekami Mua Maneka wameiya akena-pa wia wuam-ikaiya. Eliw naap oninon, moram o anane Mua Maneka wameiya-pa ikok opora yia maakem-ikomiya.

26 Yeesus Krais pina marew dubil manekiw ikaiya. O mua kema melin akena. Wi pina mua pina onimik, ne Mua Maneka o urufak-na o weetak akena. O unum maneka aawep urupep owow iinan-pa ikua. Pris woos mua naap nain pina yia iiraromowa nain pepek akena. 27 Ne oko pun feenap, wi iiriw pris nain anane maneka maa eneka-pa Mua Maneka patiram-ikemik. Mokomokoka patirami wiena pina kiikir iirarep-puap ikoka emeria mua pina wia iiraromimik. Yeesus naap-ko me onak. Iir kuisow muuta ona mia-pa Mua Maneka patirami emeria mua pina wia iiraromak. 28 Moram Moses sira ookami pris wia pepekimem-ikemik nain wiena pun pina-pa oro-boonimik nain-ke. Ne sira awona weesereya sira enuma eena Mua Maneka ona wame unufami maken akena maek nain pris wuak nain ona Muuka nanek. Muuka eena eliw akeniya uuwowa Wiawi iwok nain pepek akena welawak, nain.

Copyright information for `MHL