Hebrews 8

Yeesus owow iinan-pa pris woos mua uuwowa oniya

Aria i fain naep maimik, feenap, i pris woos mua naap nain yiar ikua. O iiriw owow iinan urupep Mua Maneka eena pokiya nain aken ekeria-pa wiar pokap ikua. Pris woos mua arep Mua Maneka miir onoma-pa uuwam-ikaiya. Patirow epa eena Mua Maneka owow iinan-pa ikua nain maken akena-ke, me mua-ke kuamik, weetak. Ona Mua Maneka-ke maep naap wuak.

Wi pris unowa nain uuwowa feenap: wi mua-ke maa ele-eliwa pikiwiwkin Mua Maneka patirami iwimik, ne oko, pina wia iiraromowa nain maa eneka kuumimik. Naapeya yiena pris woos mua nain pun patirowa wiar ikua. O miiwa-pa ikua nain pris arowa maekak-na me arekak. Moram wiena sira ookami pris unowa ikemik nain-ke maa eneka-pa Mua Maneka patiram-ikaimik. Iiriw Mua Maneka Moses sel koora onowa maakek nain feenap,

“No lotu koora onami Sainai ema-pa nefa ofakowam nain kakeniw naap akena one,”
(Eksodas 25.40)

naap maek. Naapeya wi uuwowa onimik nain maa makena eena owow iinan-pa ikua nain kukusimimik.
Nain Yeesus eena pris uuwowa aawok nain maneka, wi pris unowa uuwowa wiar nomakek. Moram Mua Maneka opora yiamiya kaikak nain os-ke gone-pa aremi koonowak. Opora nain-pa Mua Maneka maa eliwa yia wuomak nain eliw akena. Naapeya iiriw Mua Maneka Moses wameiya opora kaikak nain iiwawun wiar nomakek.

Moram opora eena Mua Maneka iiriw Moses wameiya kaikak nain i pina eliw yiar iirarekak-na opor enuma yiamiya kaikowa me maekak. Nain feenap, Mua Maneka-ke wi Isrel sira wiar urufak-na wi eliwa weetak, naapeya maek,

“Epa ikoka imenarinon. Imenareya yo nainiw wi Isrel ne Yuuda kerekera opor enuma wiamiya kaikinen.
Opor enuma wiamiya kaikinen nain me iiriw wiena nembesir wia onomam naap, weetak. Wi iiriw Isip-pa ikaiwkin yena wia aawep epa oko wia pikiwem. Nain yo opora wi wiamiya kaikam nain me efar ookam-ikemik. Naapeya yo mikikira wiem.”
10 Neemi maek,

“Yo wiimar wi Isrel opora enuma wiamiya kaikowa nain sira feenap oninen. Yo sira nain wiena woosa ne kema-pa wiar wuinen. Ne wis-ke ‘yiena Mua Maneka-ke’ efa naikuan, ne yos-ke ‘yena teeria-ke’ wia nainen.
11 Wi unowiya yo efa amisarep ikaikuan, wi takira-pa ikip mua iperowa-pa. Naapeya mua oko-ke ona opor epaskun feenap me maakinon, ‘No Mua Maneka amisare,’ ne mua oko pun ona wiamun naap me maakinon, weetak.
12 Ne wi sira samora onimik nain wia kemalep wia iiraromap me wiar kema suuwinen.”
(Yeremaiya 31.31-34)

Mua Maneka-ke naap maek.
13 Aria opora oko Mua Maneka eena wiamiya kaikak fain enuma-ke naek. Naeya iiriw opora wiamiya kaikak nain awonarep ikoka iiwawun mesenalinon.

Copyright information for `MHL