Hebrews 9

Iiriw pris woos mua maa eneka aka-pa Mua Maneka patiram-ikemik

Aria sira awona nain feenap, Mua Maneka-ke Moses maakep koonoweya lotu sira unowa wuomakek. Ne Mua Maneka farowa ne patirow epa nain wiena siraremik. Feenap, sel koora kuap konimiw kemena mika-puukamik. Ne kemena eena miimow ona-pa ikua nain “Kemena Iwowa Emi” naimik. Kemena nain arua takeriya iimarowap-puamik, ne samapora pun ikua, naeya emer ikowa samapora iinan-pa wuamik. Emera nain Mua Maneka patirowa-ke. Ne kemena oko nain, “Kemena Iwowa Emi Akena” naimik. Esimsa oko gol-pa onamik nain nan wuap-puamik. Esimsa nain maa tana kuumiwkin kawus ikin eliwa urupiya nain-ke. Ne bokis oko nan ikua, mikikira kemena gol-pa onamik. Nain Mua Maneka eena Isrel wiamiya opora kaikak nain ilenam-ikowa-ke. Ne maa enowa maana
9.4Iiriw wi Isrel epa asia saa manekiw-pa ikiwem-ikok maa enowa weetakeya Mua Maneka-ke maa enowa maana wia sesekam-ikomak. Kisim Bek Sapta 16-pa eliw urufowen.
naimik nain gol amina-pa iparep bokis tepak-pa nan wuap-puamik. Ne Aron soomarow kuuma eena iiriw mua mikomakek
9.4Iiriw wi Isrel papako emina kekanep Mua Maneka Aron pris uuwowa pepekimok nain miatinemik. Naeya Mua Maneka wia maakeya Aron ne wi kerekera woos mua unowiya kuisow kuisow wiena soomarow kuuma Moses iwiwkin sel lotu koora-pa wuak. Uuriw ikip urufamik-na Aron kuuma muutiw mua mikomakek. Nain ona Mua Maneka Aron pris uuwowa pepekimok nain ilenowa-ke. Ne pun wi Isrel emina kekanemik nain ilenowa-ke.
nain ne nomon kakawa erup nain pun bokis tepak-pa wuap-puamik. Nomon kakawa nain eena Mua Maneka-ke Moses sira unowa maakemi siisimep iwok nain.
Bokis opaimika nain gol-pa sirarep wakesimemik. Pris woos mua epa neeke aka fiena-waremi wi mua pina iiraromiya. Ne ensel erup pun naap, gol-pa sirarep bokis iinan-pa iimarowap-puamik. Eewua ere-erup iipap ikaiwkin bokis nain epa ununa wuap ikaiya. Nain wilinem-ikua nain Mua Maneka fan ikua nain ilenam-ikowa-ke. Nain aakisa maa unowa eena maem nain maa gelemutitik ikua, yo sererkap aakunowa me pepek.

Aria maa unowa nain naap moresarep-puap wi pris anane uuwami kemena miimow ona-pa ikua nain ikiwimik. Ne pris woos mua-ke waisow kemen oko nain tepak ikiwiya. Mokoma kuisow fofa kuisow neeke ikiwiya. Maa eneka aka feekiya ikiwep bokis iinan-pa fiena-waremi ona kiikir pina iirarep kiiriw aka oko aawep emeria mua kema me suuwowa pina onimik nain wia iiraromiya. Ewar Eliwa-ke feenap ariman yia maakiya, sel lotu koora ikua nain konim maneka nain-ke kemena nain mika-puukap ikaeya Kemen Iwowa Emi Akena nainmua ikiwowa me pepek. Naapeya i Mua Maneka wiar ikiwowa are wuara-ko me ikua. Maa muutitik sel lotu koora-pa ikua nain i aakisa kamenap ikaimik nain kukusimok. Makena, i Mua Maneka maa ele-eliwa iwimik, ne maa eneka-pa o patirimik. Nain i pina yiar iirareya kema dubila-ko me eliwa arem-ikaimik, weetak. 10 Patirowa sira naap nain oram mia iinan muutiw-ke, eena maa enowa, ne eka enowa ne wapena yasuwowa muutiw. Naap ookam-ikaiwkin Mua Maneka maa unowa iiwawun kakenurumep sira enuma wueya sira unowa nain piipuiyen.

Krais era yia eepomak

11 Maa unowa ele-eliwa iiriw ekapowa maek nain fanek, Krais-ke ekapemi pris woos mua arep nain yia pekapomak. Pris arep Mua Maneka miir onoma kakeniw wiar kererek nain lotu epa akena-pa ikua. Nain eliw akena, naeya wi iiriw sel lotu koora-pa sira onam-ikemik nain iiwawun nomakek. Nain me miiw fain maa-ke, naeya me mua-ke onamik, weetak. 12 O Kemen Iwowa Emi Akena nain ikiwok nain me meme ne bulmakau iimarow eremina aka aawep feekiya ikiwok, weetak. Ona aka-pa Mua Maneka patirami miir onoma wiar ikiwok. Ne ikiwowa kuisow muuta arek nain i yia aawok. Ne i anane maneka eliw ikaiyen. 13 Wi pris-ke meme ne bulmakau aka-pa pina wiar iirarimik. Ne mia muura wiar fau naep bulmakau suwina kuumep saakia aawep eka onaiya kiripap wia fiena-wiarimik. 14 Nain Krais aka-ke iiriw sira nain nomakek. Moram o pina marew akena. O eena Ewar Eliwa kekanowa-pa wame wuami Mua Maneka baliwep akena patirak. I sira samora onami umowa imenimik nain ona aka-pa pina yiar iirareya i kema dubila ikemik. Ne Mua Maneka anane ikaiya nain kookalep uuwowa onomiyen.

15 Aria wi mua iiriw Moses sira wuomakek nain tepak-pa ikok pina onam-ikemik nain Krais-ke umemi pina iiwawun wiar iirarek. Naapeya os-ke Mua Maneka opor enuma yiamiya kaikak nain yia opomak. Naeya wi mua eena Mua Maneka wia fariya nain ona maa ele-eliwa wia wuap-puomak nain makena urufikuan, maa eena anane ikaiya nain.

16 Aria sira feenap saarik, mua-ko ona wiimar umowa naep ona epa iir kaapariw maep-puinon, ne ona muuka o opora maep-puak nain ookami maa unowa wiar onamiarinon. Ne mua unowa amisarep maikuan, wiawi wiar umok. Ne naap urufam-ikaiwkin maa unowa wiar opinon. 17 Ne mua nain me uminon-na o opora kaikak nain me makena arinon. Ne umeya-na makena, wiar kooninon. 18 Ne naapeya iiriw Mua Maneka wi Isrel wiamiya opora kaikak nain pun naap, maa eneka aka-pa opora koonowak. 19 Iiriw Moses eena Mua Maneka sira wuomakek nain wia maakep-puap bulmakau iimarow eremina aka ne meme aka aawep eka onaiya kiripak. Ne iisop takera iiriw sipsip afifa oka kaikap-puiwkin ikua nain aawep aka-pa suuwap wi mua fi-fiena-wiaremi maifa pun fiena-warek. Maifa eena Mua Maneka sira wuomakeya siisimemik nain. 20 Naemi wia maakek, “Mua Maneka opora niamiya kaikap ni ookeka maek nain aka fain-ke koonowak.” 21 Naap onami sel lotu koora ne maa unowa koor kemena-pa ikomakek nain bulmakau aka nain aawep fi-fiena-warek. 22 Naapeya maiyen, sira nain ookami maa unowa aka-pa muura faeya dubila kuisow ariya. Aka mia-pa me wiar orainon-na pina iirarowa era me ikainon.

23 Aria Moses sira wuomakek nain ookami patirow sira-sira onimik nain maa unowa owow iinan-pa ikomakek nain kukusimimik. Ne maa unowa nain Mua Maneka uuwowa-pa ikainok naep maa eneka aka-pa muura faimik. Ne owow iinan Mua Maneka wameiya ikowa nain me maa eneka aka-pa yia pikiwinon, nain maa oram-ke. Yeesus aka-ke makena, maa eneka aka nomakek. 24 Mua Maneka owow iinan-pa ikua nain makena-ke. Ne sel lotu koora wi mua-ke wapeniw kuamik nain iinan owowa kukusimowa-ke. Ne Krais epa ikiwok nain sel lotu koora nain kemena me ikiwok, weetak, o kakeniw owow iinan urupok. Ne aakisa i yia naep Mua Maneka miir onoma-pa ikok opora yia maakomiya. 25 Aria pris woos mua sira feenap, mokom unowa anane siiwa nain kerereya Mua Maneka patirowa naep maa eneka aka feekiya Kemena Iwowa Emi Akena nain ikiwiya. Ne aka nain pun me ona mia aka-ke, weetak. Ne Krais sira onaiya onak. Iir kuisow muuta ona mia-pa Mua Maneka patirami ona aka sawikak. 26 Wi pris onimik naap onam-ikekak-na, aria Mua Maneka eena miiw maa muutitik imenak epa nan sirirowa aaw-ekapep ekapep aakisa epa feeke, naap aawem-ikekak. Nain weetak. Aakisa fan miiwa epa weeserem-ikaeya os-ke imenarepi pina iiwawun yia iiraromakam naep Mua Maneka patirowa kuisow muuta aremi patirowa unowa iiwawun weeser-wuak. 27 Mua unowiya umowa kuisow muuta arep Mua Maneka yia mekawami opora-pa wia wuowa nain arewam-ikowa-ke. 28 Ne Krais pun naap, umowa kuisow muuta aremi Mua Maneka patirak. Neemi emeria mua unowa pina wia iiraromak. Ne ikoka kiiriw nainiw ekapinon. Ekapiya nain pina wia iiraromowa me ekapinon, weetak. Teeria eena o arewap ikemik nain wia aawowa ekapinon.

Copyright information for `MHL