James 1

Yo Yems eena Mua Maneka ne Yeesus Krais uuwow mua-ke parosifa fain ni Yuuda Yeesus opora wiar opiman nain nia siisimomiyem. Ni eena owow epasia akena-pa ikeman nain. Ne maiyem, ni kema sonom eliwa ikeka nia naiyem.

Akimowa-pa kekanep ikowa

Aria emar unowik, ni pina sira kamenap niar imenarowa imenarinon. Niar imenareya-na kemelowiw ikeka. Ni Yeesus sira ookam-ikaiwkin sira-sira nia onikuan. Ne neeke ni kekanep ikowa nain paayarowen. Naapeya ni kekanep ikowen-na, ni opora marew ne eliw nomakowen. Nomakep-na kema pukep Yeesus ookowa nain maa iiwawun paayarowen.

Mua Maneka nokariwkin kema suuwowa eliwa yiinok

Ni mua kema baliwep wuepowa nain me pepekeya-na, Mua Maneka farep nokareka. O eliw nia asipinon. O mua maa nokariwkin wia amukarowa marew oram ifaniw wuam-ikok wia apekariya nain-ke. Nain ni Mua Maneka maa nokaru naep-na, kema kuisow wuap ikok nokareka. Ni kema ere-erup arem-ikok nokarowen-na ni kema ifer umukut eena ewar-ke fuureya kuiya nain saarik. Mua kema ere-erup nain maken marew, naapeya no kema naap ikok maa mauwa kookalep nokarin nain ikoka Mua Maneka efa apekarinon, naap me nae, weetak.

Wi mua maa marew ne wi mua unumiya

Aria ni Yeesus teeria, ni unum marew akena nain Mua Maneka-ke unuma nia purupok, nain kemeleka. 10 Neemi ni mua unum onaiya ikeman nain, Mua Maneka nia poraiya nain, nis pun kema eliwiw ikeka. Moram, ni mua unum onaiya ikeman nain sipir wowosa saarik epa maala me ekowa naap ikok ewur mesenalowen. 11 Ni sipira kema suuweka, feenap, uuriw akena ama kekanowa onaiya urupemi sipira unowa kuumeya wowosa eliwa nain ururiya, ne urufowa eliw marew. Ne sira naapiw, ni mua unum onaiya ikeman nain ikoka niena uuwowa nain kemaiw ikaiwkin maa unowa nain niar samorarinon, sipir wowosa nain saarik.

Akimowa sira-sira wiar imenarinon

12 Aria wi mua eena iiriw akimowa sira-sira wiar imenareya akimowa nain nomakemik nain, wi kemeluk. Moram, akimowa sira naap nain pepek nan nomakemik. Wi mua nain ikoka Mua Maneka-ke wia kiripomaya owow iinan-pa anane eliwa ikaikuan. Mua Maneka-ke unum maneka wiemi bala eliwa ikiwosa-pa wia orowawominon. Iiriw wi mua o kookalimik nain wia kiripomowa maep koonowak nain wiarik. 13 Aria no akimowa sira naap nain niar imenareya oro-boonep-na, feenap me mae, “Akimowa fain Mua Maneka-ke efa akimak.” Naap me mae, weetak. Moram, Mua Maneka sira samora onowa kema-ko me wiar ikua, ne ona pun mua sira samora akimowa-pa-ko me wia wuiya, weetak. 14 Nain wiena mua kui-kuisow akimowa-pa oro-boonimik nain wiena mokok afila-pa ne wiena mia kookalowa-pa kokor erap wakimik. 15 Sira nain feenap, wiena mia kookalowa samora nain onowa kemaiw ikok sira samora imenikuan. Ne sira samora nain-ke wiena umep Mua Maneka wiar ikiwowa era wiar puukiya.

16 Naapeya emar unowik, niena me niam peeskimeka. 17 Maa eliw akena nain Mua Maneka-ke owow iinan-pa ore wuap yia sesekomiya. Yiena Auwa Mua Maneka eena mokoma, siiwa ne ama onomakek nain-ke. O me fain saarik, maa ipisia ama parina epa puukap-puami epa wueya ama parina oraiya, naap wame puukowiya, weetak. O anane parin manekiw ikaiya, sira kiri-kiripowa nain weetak. 18 Ne wi opor makena efar opap muuka wiipa efar aruk naep naap onak. Ne naapeya ona miiwa fain maa unowa onomakek nain maa eremina o patirimik maa nain saarik wiar ikemik.

Mua Maneka opora miimap ookowa-ke

19 Aria emar unowik, ni fain kemaiw ikeka. Ni mua unowiya opora wiar miimowa-ke ifana wuap baliwep wiar miimeka, aakunowa-ke kema suuwap aakuneka, ne ewur me kema bagiwireka. 20 Nain moram, Mua Maneka baliwep ikowa yia maakek nain bagiawiw ikainon-na kakeniw ikowa me ikaiyen. 21 Naapeya ni uruw mia samora sira niar ikomakek nain piipueka, ne sira samora onam-ikaiman nain pun piipuami kekelka ikok Mua Maneka opora wiar opaka. Opora eena kema-pa nia wuomak nain-ke kukusa eliw nia kakenominon.

22 Feenap me maeka, Mua Maneka opora miimapiw wuiyen, ni kema naap me wueka, niena me niam peeskimeka, weetak. Opora wiar miimami ookam-ikeka. 23 Wi mua opora miimapiw me ookimik nain sira fain saarik, mua ona miira galas-pa balisow akena wame urufap eenan ekami ewur akena ona miira wame kema irinariya. 25 Wi mua Mua Maneka sira eliw akena eena pina yiar iiraromowa nain urufap ookimik nain eliwa ikaikuan. Sira nain balisow akena wiar amisarep ikok kema irinarow marew ookimik nain, Mua Maneka-ke maa kamenap onimik nain wiar kemelami wia saliwinon.

26 No mua feenap main nain, “Yo anane Mua Maneka opora wiar ookiyem,” naap main, nain no kema wuepow marew aakunin. Opora momor aakunin nain nena name peeskimin. No Mua Maneka opora ookiyem naen nain oram maen. 27 Ne sira eena yiena Auwa Mua Maneka eliw akena naek nain feenap: wi apura, ne muuk maata maa marewa nain wia karuemi wia asipam-ikowa, ne miiw sira samora onimik nain me wiokowa, sira nain.

Copyright information for `MHL