James 4

Sira samo-samora piipuap sira eliwa ookowa

Ne ni opor onoma kamenap nain kema niam bagiwirami ni-nieniw irakiman? Ni irakiman nain miiwa fain maa kookalowa kema-pa anane niar imenareya ni-nieniw irakiman. Ne ni maa kookaliman nain me aawiman, naapeya ni mua wia ifakimiman, ne maa wiar kema kuowa niar ikua. Ne ni nain kema manekiw ikok maa nain aawowa me pepekeya ni-nieniw niam aakunowami irakowa fakeriman. Moram ni maa kookaliman nain Mua Maneka farep me nokariman. Ne ni niena maa kookalep nokariman nain niena miiwa-pa feeke mia kookalowa-pa ikowa naep nokariman. Naapeya Mua Maneka me nia apekariya.

Ni Mua Maneka ookowa nain mia suuwowa saarik wuiman. Ni miiw fain sira manek akena kookaliman nain, Mua Maneka ona iiwua mua niam arowiman. Ni fain me amisareman-i? Makena, wi mua miiw sira womar wiar ikau naep onimik nain wiena akena Mua Maneka iiwua mua wiam arowimik. Mua Maneka opora feenap maep-puak nain, feenap, “Mua Maneka ona Ewar Eliwa sesekeya i yiamiya ikaiya nain-ke me efa piipueka naiya.” Ni opora nain oram maek wiar naiman-i? Nain Mua Maneka ona yia asipowa naep manek akena yia kemalep yia asipiya. Naapeya ona opora-pa feenap maek,

“Mua Maneka wi mua wiena unuma wiam purupimik nain wia poraiya. Ne wi mua wiena unuma wiam poraimik nain wia kemalep wia asipiya.”
(Gutpela Sindaun 3.34)

Ne naapeya ni niam poromi Mua Maneka opora baliwep wiar ookeka, ne Satan fieneka. Naeya o nia piipuap nia baurarinon. Ni Mua Maneka mamaiya-pariw ikeka. Ne os pun ni niamiya ikainon. Neemi ni eena sira samora-pa ikeman nain sira nain piipueka. Ni kema ere-erup ikaiman nain pun ni aakisa ikiwos samora piipueka. Ne ni sira samora onaman nain kema samorareka, kerew akena omomeka ne niena niam irowa sira kema suuwap omomeka. Ne niena alakuow sira pun kema suuwap kema samorareka. 10 Naap onap Mua Maneka mokoka-pa niam poreka. Naeya os-ke unuma nia purupinon.

11 Naapeya emar unowik, ni nieniw me niam tuunami, murarow opora me niam oneka. Moram ni Yeesus teeria mua oko murarow opora wia onami wia mekawowen-na ni Moses sira wuomakek nain pun murarow opora onami mekawinon. Naeya ni sira mekawiman nain sira nain me ookiman, moram ni sira nain tuuniman. 12 Mua Maneka-ke sira unowa wuomakek, ne sira nain ookami mua wia mekawiya. Ona waisow yia aawinon, ne pun ona waisow iiwawun yia samorinon. Ne ni mua sira kamenapeya niam tuunami niam mekawiman.

13 Ni mua papako feenap maiman “I ikoka uurika, ere e fofa oko-pa owow oko-ko wiar ikiwiyen. Neek ikok mokoma kuisow uuwowa onami maamuma-ko imeniyen,” naap maiman. 14 Ni eena naap maiman nain ni uurika epa kamenap-ko niar imenarowa nain, ni me amisarowen! Nis-na aakafua saarik, urupemi, epa ekow marew puep ikiwemi mesenaliya naap. 15 Naapeya ni feenap maowa-ke eliwa, “Ona Mua Maneka-ke kookalep-na, ona kookalowa-pa i eliw ikok maa fain oniyen, e maa oko-ko oniyen.” Ni naap maowa-ke eliwa. 16 Nain ni niam purupemi niena kookalowa-pa onowa nain aakuniman. Sira naap nain eliw marew. 17 No sira kakeniw onowa amisarep ikon nain me onowa nena akena sira samora onin.

Copyright information for `MHL