John 11

Lasarus umok nain Yeesus-ke iikirowak

Aria Betani owow mua oko Lasarus naimik nain napum maneka aawok. Ona wekera erup, Maria Mata ikos wis pun nan wameiya ikemik. (Iir oko Maria nain-ke sanda aawep ekap Yeesus merena yasuwomap ona afif fuuliw meren supuka ipiwominon. Emeria nain womokowa Lasarus, os-ke napumarek.) Ne wekera erup nain-ke Yeesus opora sesekomami maakemik, “Oo Maneka, nena nomar eliwa napum maneka aawok.” Ne Yeesus opor amisa nain aawep maek, “Napuma aawok nain me umowa-ke, weetak. Nain eena Mua Maneka kekanowa ne unum maneka wiar urufowa-ke. Ne Mua Maneka Muuka pun unum maneka aawinon.” Wiam arow nain Yeesus manek akena wia kookaliya. Nain opora miimap ewur me ikiwok, fofa erup nan ikua. Ne nain weesereya arowona ona teeria wia maakek, “Arika, i kirep Yuudia ikiwikua.” Naeya ona teeria-ke maakemik, “Sa, somek mua, erekema fan kame nan wi Yuuda-ke nomon ika nenaru naep onamik, nain no aakisa kiiriw ikiwowa main-i?” Ne wia maakek, “I parina-pa ikemik. Epa wiimiya nain ewur akena me kokomariya, ae-na? Mua amirika soomariya nain merena maa me eewawinon. Moram amirikiya maa urufap soomariya. 10 Makena, uura soomaremi merena maera-pa arinon. Moram epa kokomiya maa urufowa me pepek.” 11 Ne wia maakek, “Yiena emar Lasarus napumarep inep ikua, yo ikiwep ifimekam naep.” 12 Naeya ona teeria-ke maakemik, “Sa, o ininon-na ikoka sariarinon.” 13 Lasarus umok nain Yeesus-ke o inep ikua naek. Naeya ona teeria kema maemik, inep ikaiya maiya. 14 Ne aakisa fan opor makena fookap wia maakek, “Lasarus iiriw umeya soopamik. 15 Yo eliw akena wameiya me ikem, moram yo maa onamkun ni ikoka urufap makena efa naeka naep. Arika, aakisa wiar ikiwikua.” 16 Naeya Tomas-ke Yeesus teeria papako nain wia maakek, “Arika, i yiena somek mua ookap ikiwikua. Unowiya eliw neek umiyen!” (Tomas unum oko Didimus
11.16Unuma Didimus kemena feenap, onak-ke erup wia muukarek.
naemik.)

Umep iikirowa onoma Yeesus

17 Aria Yeesus ame ikiwep Betani fuunep naap miimamik, Lasarus iiriw umok, ne nomon ona-pa wuap-puiwkin fofa erepam ikiwok. 18 Betani owowa Yerusalem mamaiya-pa ikua. 19 Naapeya Maria Mata ikos wiena womokowa-ke umeya wi Yuuda unowa wia waawarowa ikiwemik.

20 Aria Yeesus ekapem-ikaeya Mata maakiwkin miimap miira puuk-ikiwok. Ne Maria koora-pa ikua. 21 O ikip era-pa miirowap maakek, “Aa Maneka, no feek ikekan-na yo yomokowa me efar umekak. 22 Nain yo amisarem, no maa mauwa naep Mua Maneka nokarinan-na eliw nefa apekarinon.” 23 Naeya maakek, “Nena nomokowa ikoka iikirinon.” 24 Ne Mata-ke maakek, “Aa yo amisarem, ikoka miiwa weeserow epa-pa iikirinon.” 25 Ne Yeesus-ke maakek, “Umep kiiriw iikirowa, ne anane eliwa ikowa nain onoma yos, ne mua naareke yo opora efar opinon-na makena o uminon, nain iikirap eliwa ikainon. 26 Ne mua mokok enuma ikok yo opora efar opiya nain iiwawun me mesenalinon, weetak. Anane eliwa ikainon. Yo maem fain no makena efar nain-i?” 27 Naeya maakek, “Ae, Maneka, yo makena nefa naiyem. No Mesaiya-ke ne pun no Mua Maneka Muuka-ke. Mua eena miiwa orowa maemik nain, makena nos.”

Yeesus omok

28 Aria Mata naap maep weesereya nainiw kirep owowa ekapep ona wiamun Maria fareya epeya ifan onoma-pa maakek, “Somek mua fanek, no nefa ikumiya.” 29 Maria naap miimap ewursow akena Yeesus urufowa ikiwok. 30 (Yeesus owowa me wiar fuunowa ikua, iiriw Mata ikos era-pa aakunemik epa nan-pariw ikua.) 31 Ne wi Yuuda koora-pa taanep ikemik nain Maria naap urufap matmat-pa omomekam naep ikiwiya naemi ookamik. 32 Aria ikiwep Yeesus urufap meren onoma-pa iima ifemakep ikok maakek, “Oo Maneka, no feek ikekan-na yo yomokowa me efar umekak.” 33 Naap maakemi omok, ne wi Yuuda ookap ekapemik nain pun omemik. Yeesus naap wia urufap kema beelalep kema-pa omem-ikok wia maakek, “O sapuka kaanek wuaman?” Ne wis-ke maakemik, “Maneka, i ikip nefa ofakowiyen.” 35 Naap maakiwkin Yeesus omok. 36 Ne wi Yuuda-ke maemik, “Aa, mua nain manek akena kookalek.” 37 Ne papako-ke maemik, “O mua mokok opa wia saliwam-ikua. Ne moram mua fain me saliwak, naeya me umekak!”

Yeesus Lasarus iikirowak

38 Aria Yeesus matmat ekam-ikok kema iiwawun beelalek. Matmat nain nomon ona-pa onamik. Sawi napuma nan wia wuap nomon opaimikiw ofomamik. 39 Ne ekap wia maakek, “Nomon opaimika nain iirareka.” Naeya Mata-ke maakek, “Oo Maneka, fofa erepam ikiwok, oko beel ikina yia aawinon!” 40 Ne Yeesus-ke maakek, “Yo iiriw nefa maakem, feenap maem, no makena efa naeya-na Mua Maneka kekanowa aakisa wiar urufinan. No iiriw me miiman-i?” 41 Naeya nomon maneka eena ona ofomap-puamik nain iiraremik. Ne Yeesus iinan mokakemi maek, “Oo Auwa, no opora efar miimin, naapeya sira eliwa naiyem. 42 Yo amisarem, no anane efa miimin. Nain yo mua unowa aakisa fan taanep ikemik fain wia naep maiyem. Naeya wi urufap no efa sesekan nain makena-ke efa nauk.” 43 Naap maep Lasarus farep maek, “Oo Lasarus, no iikirap epa maneka ore!” 44 Naeya o eena iiriw umok nain iikirap orok. Miikapura, wapena, merena, mia ara iiwawun konimiw wasiep wuamik nain naap ikaeya feekiya orok. Oraeya wia maakek, “Konima wiar wasirkiwkin soomarinok.”

Wi woos mua-ke Yeesus ifakimu naep opora anumamik

(Matiu 26.1-5, Mak 14.1-2, Luk 22.1-2)

45 Aria wi Yuuda unowa Maria waawarowa ekapep ikemik nain Yeesus naap oneya urufap papako-ke makena-ke naep opora wiar opamik. 46 Ne papako-ke ikiwep Yeesus sira kamenap onak nain wi Farisi wia maakemik.

47 Wia maakiwkin wi Farisi, wi pris woos mua wiam aawep ikip wi Kaunsel Maneka wiamiya fiirimemik. Aakunemi maemik, “Emawik noma, i sira kamenap oniyen? Mua nain-ke maa miililina kerew akena imeniya noma! 48 I naap mokokiw urufam-ikaiyen-na mua unowa o ookiwkin wi Rom anim onoma-ke ekapep tempel koora yiar samo-samorami yiena pun yia samorikuan!” 49 Ne mua oko unuma Kaiafas, o iir nain wi pris woos mua-pa ikua. Os-ke maek, “Ni maa kema suuwap me aakuniman. 50 I teeria maneka fain wi Rom-ke me yia samoruk. Naapeya mua kuisow-ke epa yiar aawep uminok. Naap nain eliwa.” 51 Opora maek nain me ona kema-pa maek, weetak. Iir nain pris woos mua-pa ikok maa ikoka imenarowa nain maek. Feenap, Yeesus-ke wi Yuuda unowiya epa wiar aawep uminon. 52 Ne me wi Yuuda muutiw epa wiar aawep uminon, wi Mua Maneka muuka wiipa teeria unowa miiw maneka owowa unowa-pa ikemik nain unowiya wia aaweya teeria maneka kuisow ikaikuan.

53 Aria iir nain naap urufap wi Yeesus ifakimowa naep era akupam-ikemik. 54 Ne naapeya Yeesus Yuudia kame-pa ariman me soomarem-ikua. Ona teeria wia aawep kame nain piipuap ikiwep owowa oko Efraim naimik nan ikemik. Owowa nain epa asia nomon manekiw nain mamaiya-pa ikua.

55 Aria wi Yuuda Pasowa fofa mamaiyarek. Naapeya wi owow unowa Yerusalem ikiwemik. Neek ikok yiena mia tumina iirarep ikemkun fofa maneka nain kererinok naemik. 56 Wi Yeesus akupami tempel pika kemena-pa ikumami maemik, “Nee, Pasowa maapora fain me yiar ekapinon-i e kamenap?” 57 Wi Farisi ne wi pris woos mua-ke opor kekanowa ariman maemik, “Mua naareke Yeesus urufap-na ariman yia maakiwkin ikiwep opiyen,” naap maemik.

Copyright information for `MHL