John 13

Yeesus ona teeria merena wia yasuwomak

Aria Pasowa maapora fofa uurika naap nain kererinon, ne aakisa feenap nain Yeesus kema-pa maek, yo miiwa piipuap Auwa wiar ikiwowa epa fan mamaiyarek naek. Naeya ona teeria senam akena wia kookaliya nain wia ofakowap-puami uminen naek.

Urera Yeesus ona teeria wiamiya enowa naep wiam fiirimemik. Ne mua Yuudas-na Satan-ke iiriw kema iwep-puak, Yeesus opap wi iiwua wapena-pa wiar wuowa nain. O Saimon Iskariot muuka-ke.

Aria Yeesus ona wame amisarek, maa iiwawun ona Wiawi-ke o wapena-pa wiar wuap-puak. Ne pun amisarek, Mua Maneka wiar ekapok ne ikoka nainiw o wiar ikiwinon. Naapeya ona wame poromi taar teekow mua saarik arep iikirami ona mia suuwowa anian iirarep konima aawep urom ara-pa aek. Aep-puap epira-pa eka sawikap ona teeria mua kuisowiw merena wiar yasuwap konimiw meren supuka wiar ipiw-ikiwok. Naap oni-ikiwemi Saimon Pita wiar areya maakek, “Maneka, nos-ke yo merena yasuwominan-i? Weetak.” Ne Yeesus-ke maakek, “Yo sira oniyem fain onoma me amisaren. Ikoka amisare.” Naeya Pita-ke maakek, “Weetak akena, yo merena me yasuwome.” Naeya maakek, “No merena me yasuwominen-na yo efamiya me ikainan.” Naap maakeya maakek, “Oo Maneka, naapeya-na merena muutiw me yasuwome, wapena ne woosa pun iiwawun!” 10 Ne maakek, “Mua iiriw yakiek nain merena muutiw yasuwinok. O tumina marew. Ni unowa tumina marew, nain mua kuisow muuta-ke weetak.” 11 Moram iiriw amisarek, mua eena o aawep wi iiwua wapena-pa wiar wuowa nain. Naapeya maek, “O mua kuisow weetak.”

12 Aria merena wia yasuwomap-puap mia suuwowa nainiw wuap ona epa ekak. Ne wia nokarek, “Yo sira nia onam nain ni kema-ko aaweman-i? 13 Ni anane yo ‘somek mua’ ne ‘Maneka’ efa naiman nain makena. 14 Nain yo niena Maneka ne somek mua-ke aakisa yame porop merena nia yasuwomam. Ne nis pun niam porop niena teeria mua oko naap wia oneka. 15 Yo aakisa nia ofakowami onam, ni naap oneka. 16 Makena nia maakiyem, uuwow mua-ke ona saria nomakep os-ke maneka me ariya. E, mua ikip uuwiya nain-ke mua eena o sesekak nain nomakep os-ke maneka me ariya, weetak. 17 Aria ni aakisa opor kemena amisareman, ne ni sira nain onowen-na Mua Maneka kemelowa niinon!

18 Yo opora nia maakem nain me ni mua iiwawun unowiya nia maem. Makena, yo nia amisarep nia pepekimem, nain mua kuisow-ke Mua Maneka opor oko makena arowinon, feenap,

‘Yena yomar oko eena yo efamiya maa enek nain-ke yo efa samorinon.’
(Someka 41.9)

19 Yo aakisa nia maakem nain ikoka imenarinon. Ne imenareya ni urufap efa maowen, yo anane ikaiyem nain-ke, naap efa naowen. 20 Yo makena nia maakiyem, yo mua eena wia sesekiyem nain mua naareke wia aawiya-na yos pun efa aawiya nainen. Ne mua eena yo efa aawiya nain o efa sesekak nain pun aawiya nainen.” Naap maek.

Ikoka Yuudas Yeesus wi iiwua wapena-pa wuinon

(Matiu 26.20-25, Mak 14.17-21, Luk 22.21-23)

21 Aria Yeesus naap aakunep-puap kema iiwawun samorarep maek, “Yo makena nia maakiyem, ni teeria fain mua kuisow-ke ikoka wi iiwua wapena-pa efa wuinon.” 22 Naeya ona teeria-ke mua naarew maek naemi wi-wieniw wiam mokakemik. 23 Ne Yeesus mua eena kookaliya nain wameiya-pa wiar ikua. 24 Ne Saimon Pita-ke naarew maiya naep mua nain maariw maakek. 25 Naeya mua nain-ke kame kiir inep ikok maara muutiw kirep Yeesus nokarek, “Maneka, no mua naarew main?” 26 Ne maakek, “Mua eena ikoka emer ikowa kakawa maa eka-pa suuwap onakinen. Mua nain-ke naap oninon.” Naap maemi emer ikowa kakawa aawep maa eka-pa suuwap Yuudas onakek. 27 Ne Yuudas emer ikowa nain aawep enek. Naeya Satan-ke woosa iiwawun wiar kekanowak. Ne Yeesus-ke maakek, “No maa onekam naep-na ewurarep-pue.” 28 Ne ona teeria mamaiya ikemik nain mua kuisow opora nain kemena-ko me aawemik. 29 Moram wiena maamuma Yuudas-ke urufiya, naapeya wi kema naap maemik, maa enowa-ko sesenarinok naep maakiya-i e maa-ko sesenarep wi mua oorpowa wiinok naep maakiya-yon. 30 Aria Yuudas emer ikowa nain wiar enep-puap iikirap owaruma oromi ikiwok. Ne epa pun iiriw kokomarek.

Sira enuma

31 Yuudas ikiweya Yeesus-ke wia maakek, “Aakisa epa fan ekapok, Mua Muuka unum maneka ariman wiar arowa. Ne Mua Maneka kekanowa ne unum maneka mia-pa wiar urufikuan. 32 O Mua Maneka kekanowa ne unum maneka ariman wiar wueya Mua Maneka pun ona Muuka unuma pirami ariman arowinon. Ikoka kuisow naap oninon. 33 Muuk unowa, yo ni niamiya senam me ikainen. Ni ikoka efa akupowen. Iiriw wi Yuuda wia maakem naap, aakisa nis pun nia maakiyem, epa yo ikiwiyem nain ni ikiwowa me pepek. 34 Naeya yo aakisa sira enuma nia maakiyem, sira feenap onam-ikeka, ni niam kookaleka, yo nia kookaliyem naap. Nis pun naap niam kookaleka. 35 Ni niam kookaliman nain wi unowa nain naap nia urufap maikuan, ‘ona teeria-ke,’ naap nia maikuan.”

Yeesus Pita maakek, “No ikoka efa sailinan”

(Matiu 26.31-35, Mak 14.27-31, Luk 22.31-34)

36 Ne Saimon Pita-ke nokarek, “Maneka, no kaanek ikiwin?” Naeya maakek, “Epa yo ikiwiyem nain no aakisa me yookinan. Ikok wiimar yookap ekapinan.” 37 Ne Pita-ke maakek, “Maneka, no moram efa iirarin? Yo no muuta nain eliw uminen.” 38 Naeya maakek, “Nos-ke yo muuta nain eliw uminan-i? Weetak. Yo makena nefa maakiyem, ikok uura aara me farowa ikaeya no sailemi maem-ikainan, mua fain yo me amisarem. Naap sailowa arow arinan.” Naap maakek.

Copyright information for `MHL