John 14

Yeesus-na wi mua Auwa wiar ikiwowa era-ke

Aria Yeesus wiamiya aakun-ikiwemi maek, “Ni kema me samorareka. Mua Maneka opora wiar opap yos pun opora efar opaka. Naapeya nia maakiyem, yena Auwa koora kemen unowa wiar ikua. Naeya yo kiikir ikiwep epa nia saliwap-puominen. Auwa koora epa marew ikekak-na yo naap me nia maakekam. Ne yo ikip epa nia saliwap-puomap nainiw ekapep nia aawemkun ikiwep yena ikaiyem neeke efamiya ikowen. Ni aakisa yo ikiwiyem nain era nain amisareman.” Naeya Tomas-ke maakek, “Maneka, no epa kaanek ikiwin nain i me nefar amisaremik. Ne era pun kamenap amisariyen?” Ne Yeesus-ke maakek, “Era maem nain yos, opor makena ne anane eliwa ikowa nain pun onoma yo yaisow. Mua yo me efar ekapinon-na Auwa pun me wiar ikiwinon, weetak akena. Ni yo efa amisarep-na Auwa pun amisarowen. Ne aakisa nia mainen, ni o amisareman, ne pun urufaman.” Ne Filip-ke maakek, “Maneka, i fain muutiw nefa nokariyen, i Auwa-ko yia ofakoweya yiena mokok onaiya urufap eliw.” Naeya maakek, “Filip, yo epa maala ni niamiya ikem nain me efa amisaren-i? Mua yo efa urufak nain feenap maiyem, Auwa pun urufak. Ne moram naap main, ‘I Auwa-ko yia ofakoweya urufiyen.’ 10 Yo Auwa wameiya ikem ne Auwa yo efamiya ikua. No nain makena-ke me nain-i? Opora eena yo nia maakiyem nain me yena kema-pa maiyem, yo uuwiyem nain Auwa-ke ona efamiya ikok uuwam-ikaiya. 11 Yo Auwa wameiya ikem ne Auwa-ke yo efamiya ikua. Yo naap maiyem nain makena-ke efa naeka. Aria naap me naep-na yo maa miililina oniyem nain urufap makena efa naeka. 12 Yo makena nia maakiyem, mua eena yo makena efa naiya nain, yo mauwowa sira oniyem nain os pun eliw oninon. Neemi mauwowa sira oniya nain yo maa oniyem nain efar nomakinon, moram yo Auwa wiar ikiwiyem. 13 Naeya yo unuma-pa maa mauwa nokarowen-na eliw nia onominen. Naap onami Auwa unuma wiar pirinen. 14 Ni maa mauwa yo unuma-pa nokarowen-na eliw nia onominen.”

Yeesus Ewar Eliwa sesekowa maek

15 “Aria ni yo efa kookalowen-na yo opora nia maakiyem nain ookowen. 16 Ne ikoka yena Auwa nia nokaromamkun Ewar Eliwa nia sesekomaya anane niamiya ikok os pun nia asipam-ikainon. Ewar nain maken akena-ke. Wi mua miiw maa kookalimik nain o me urufikuan ne me amisarikuan, naapeya me aawikuan. Nain o anane naap niamiya ikainon, naapeya ni eliw amisarowen. 18 Niisow me nia wuinen, ikoka nainiw niar imenarinen. 19 Lawisiw akena miiw mua me efa urufikuan. Nain ni niisow eliw efa urufowen, moram yo anane ikaiyem nain-ke, ne nis pun naap ikowen. 20 Ne iir nain ni feenap efa amisarowen, yo yena Auwa wameiya ikem, naeya ni yo efamiya ikeman ne yo ni niamiya ikem. 21 Mua eena yo opora efar opap ookiya nain-ke yo efa kookaliya. Ne yena Auwa pun o kookaliya ne yos pun kookalemi yena yame ariman wuinen,” naap maek.

22 Ne Yuudas oko me Yuudas Iskariot, os-ke nokarek, “Maneka, moram i muutiw yiar ariman arinan ne wi miiw mua unowa nain weetak?” 23 Ne maakek, “Nain feenap, mua eena yo efa kookaliya nain opora efar miimap ookinon, ne yena Auwa pun mua nain kookalinon. I Auwa ikos anane o wameiya akena-pa wiar ikaiyen. 24 Ne mua eena yo me efa kookaliya nain yo opora pun me efar ookinon. Opora eena nia maakiyem nain me yena opora-ke, weetak. Auwa ona efa sesekak nain opora-ke.

25 Opor unowa nain iiriw niamiya ikok nia maakem-ikem. 26 Ne ikoka Ewar Eliwa eena nia asipowa nain Auwa-ke yena unuma-pa nia sesekominon. Maa unowa iiriw nia maakem-ikem nain os-ke kema niemi nia kemapaweya maa kema suuwam-ikowen.

27 Aria yo yena kema eliwa niemkun kema sonom eliwa ikeka. Yo nia saliwamkun kema sonom manekiw ikowen, kema naap nain miiwa feeke imenowa me pepek. Ni kema unu-unowa me wueka, ne me keker opaka. 28 Yo iiriw nia maakem, yo ikoka nia piipuap ikiwep ikok nainiw niar imenarinen. Ne yo Auwa wiar ikiwiyem nain, yo efa kookalekaman-na ni opora fain efar miimap kemelap eliw naekaman. Moram Auwa ona Maneka-ke, ne yo tepak-pa wiar ikaiyem. 29 Yo maa unowa fain me imenarowa ikaeya nia maakem, ikoka imenareya urufap makena-ke naeka naep. 30 Yo niamiya senam me aakuninen. Moram miiwa fain woos mua ekapowa epa wiar weeserek. Ona sira kamenap efa onowa nain me pepek. 31 Nain wi miiw mua feenap amisaruk naep, yo Auwa manek akena kookaliyem, naapeya maa unowa ona efa maakek kakeniw naap eliw ookinen.” Naap maep-puap wia maakek, “Arika, iikirap ikiwikua.”

Copyright information for `MHL