John 17

Yeesus ona teeria wia asipekam naep Mua Maneka farek

Aria Yeesus opora nain wia maakep-puap iinan mokakemi Mua Maneka faremi maek, “Oo Auwa, yo epa aakisa efar ekapok. Ikoka nena Muuka-ke no unum maneka ariman nefa wuinok naep-na no aakisa Muuka fain unum maneka ne parin onaiya iwe. Moram nos-ke miiw mua wia urufowa nain o wapena-pa wiar wuan, ikoka wi mua eena o iwon nain anane eliwa ikowa wiinok naep. Anane eliwa ikowa nain onoma feenap, wi no nefa amisarep no naisow Mua Maneka makena-ke nefa nauk, ne Yeesus Krais pun amisaruk, eena nos-ke sesekan nain. Yo mauwowa eena yien nain welawami no unum maneka ne kekanowa nain ariman arowam. Aria Auwa, yo iiriw miiwa me imenarowa ikaeya no nefamiya ikemkun unum maneka ne parina efar ikua nain aakisa nain ariman efar wue.

Ne wi mua eena miiw sira-pa ikaiwkin wia aawep yo teeria-pa efar wuan nain iiriw wia maakemi unuma ariman nefa wuamkun nefa amisaremik. Wi nena teeria-ke, ne yo yiomaken. No opora nefar opimik. Ne aakisa amisaremik, maa sira-sira yo yiomaken nain iiwawun no nefarik. Moram opora eena nena efa maaken nain iiriw wiemkun aawemik. Yo no nefar ekapem nain wi amisaremik, ne nos-ke efa sesekan nain pun makena-ke naimik.

Yo wi wia naep nefa fariyem. Me miiw mua unowa nain wia naep nefa fariyem, weetak. Wi mua eena yo yieya opora efar opimik nain naep nefa maakiyem, moram wi nain nena teeria-ke. 10 Maa muutitik yo urufiyem nain no nefarik. Ne maa muutitik no urufin nain yo efarik. Ne wis-ke yo unum maneka nain ariman efa wuimik.

11 Yo aakisa no nefar ikiwiyem. Yo miiwa feeke senam me ikainen, nain wis-ke feek ikaikuan. Oo Auwa, no eliwa ne onaiya akena-ke, nos-ke wia kekanoweya nena unuma-pa nefar ikauk, unuma eena yo yien nain. Naeya wi teeria kuisow epaskun ikauk, i yiam erup ikemik naap. 12 Yo wiamiya ikok wia urufam-ikemkun unuma eena yien nain makena efar naemi yookimik. Naeya mua kuisow-ko me mesenalek. Nain mua kuisow makena, ikoka mesenalinon. Neemi nena opora maek nain makena arowinon. 13 Yo nan nefar ikiwiyem. Ne yo miiwa-pa feek ikok opora fain maemkun wi miimap kemeluk. Yo kemelowa nain-ke wi kema-pa wiar taanep ikainok.

14 Yo no opora wia maakem nain wi miiw mua-ke wia iiwuarimik. Moram yo teeria yena saarik, wi miiw sira-pa me ikemik. 15 Nain miiwa-pa feeke wia iirare naep me nefa nokariyem, weetak. Eewua tepak-pa wia wuap-pueya mua samora-ke me wia aawinok. 16 Wi yena saarik, wi miiw sira-pa me ikemik. 17 No opora makena-ke. Opora nain kema-pa wiar wueya wi no sira-pa ikok sira onaiya akena aruk. 18 Nos-ke efa sesekeya miiwa orom, ne sira naapiw ikoka yena wia sesekamkun miiw unowa nain ikiwikuan. 19 Yo wi wia naep sira onaiya akena ookami no wapena-pa yame wuiyem. Naeya wis pun sira naap, opor makena-ke wia kekanoweya sira eliwa ne onaiya ikok no uuwomuk.

20 Ne aakisa me wi fain muutiw wia naep nefa fariyem. Wi mua papako wi teeria fain opora wiar miimap yo opora efar opimik nain pun wia naep nefa fariyem. 21 Wi teeria kuisow epaskun ikauk naiyem, no efamiya ikon ne yo nefamiya ikem naap. Ne wis pun eliw i yiamiya epaskun ikauk, naeya nos-ke efa sesekan nain miiw mua-ke makena-ke nauk. 22 Unum maneka yo yien nain wis pun wiem. Naeya teeria kuisow epaskun ikauk, i yiam erup epaskun ikemik naap. 23 Yo nefamiya ikem, sira naapiw wis pun efamiya ikauk, naeya wi miiw mua efa amisarep, nos-ke yo efa sesekeya ekapem, naap efa nauk. Ne wi fain pun amisaruk, yo teeria nain nena wia kookalin, yo efa kookalin naap.

24 Oo Auwa, wi teeria eena yo yien nain yena efamiya yo ikaiyem neek ikok parina ne unum maneka efar urufam-ikauk, eena nena yien nain. Iiriw miiwa me imenarowa ikaeya nena yo efa kookalep yien nain. 25 Oo Auwa, no kakeniw-ke, miiw mua no me nefa amisaremik, nain yos-ke nefa amisarem, ne wi teeria fain-ke amisaremik, nos-ke efa sesekeya ekapem. 26 Yo unuma nefa ariman wuamkun no nefa amisaremik. Naap onam-ikemkun wi fain amisaruk, no efa kookalin naap wis pun wia kookalin. Neemi wi naap wiam kookalem-ikauk. Naeya yo wi wiamiya ikainen.” Naap maek.

Copyright information for `MHL