John 3

Yeesus Nikodemus ikos aakunemik

Aria wi Farisi teeria mua oko nan ikua, unuma Nikodemus, wi Yuuda Kaunsel Maneka mua oko os. Iir oko uura ikip Yeesus maakek, “Nee, i amisaremik, no somek mua-ke, Mua Maneka-ke nefa sesekeya ekapon. No eena maa onin nain mua kuisow naap-ko me onimik. Makena, Mua Maneka o wameiya ikainon-na eliw naap oninon.” Naeya maakek, “Yo makena nefa maakiyem. Mua eena kiiriw enuma me ariya nain Mua Maneka pika kemena me wiar ekinon.” Ne Nikodemus-ke maakek, “Mua iiriw arimemik nain mia kamenap kirep nainiw enuma arikuan? Kiiriw onak urom tepak wiar ikiweya nainiw muukarinon-i?”

Naap maeya Yeesus-ke maakek, “Yo makena nefa maakiyem, mua eena eka-pa wia yasuwiwkin Ewar Eliwa-ke enuma wia arowinon-na Mua Maneka pika kemena wiar ekikuan. Weetakeya-na weetak. Aite-ke yia muukariwkin i miiw fain mua arimik. Nain Ewar Eliwa-ke mua ewar enuma wia arowiya. Ni unowiya nainiw enuma areka. Aria yo naap nefa maakem nain no kema unu-unowa me wue. Ewar ona kookalowa-pa wuuniya, kamenap ekapep kaaneke ikiwiya nain me amisaren. Wuuniya nain muutiw miiminan. Ne wi mua Ewar Eliwa-pa enuma arowa nain pun kakeniw naap.”

Naeya Nikodemus-ke maakek, “Sa, yo nefar kema suuwiyem-na me pepek.” 10 Naeya maakek, “No wi Isrel somek mua maneka-ke, nain no kema-ko me pukon-i? 11 Yo makena nefa maakiyem, i maa amisarep aakunimik ne maa urufap nia maakimik, nain opora-ko me yiar miimiman. 12 Ne yo miiwa-pa maa imenariya nain nia maakiyem nain makena-ke me efa naiman. Ne iinan maa unowa nia maakinen-na efa miimowen-i? 13 Mua kuisow owow iinan-ko me urupok, weetak, Mua Muuka waisow iinan-pa ikok fan orop ikua. 14 Iiriw Moses eena epa asia nomon manekiw nan ifa bras-pa sirarep nomokowa-pa wuap fakerap iimarowap-pueya wi mua napum onaiya ikemik nain mokakemi sariarem-ikemik. Ne Mua Muuka pun ikoka sira naap fakerikuan. 15 Naeya wi mua o opora wiar opimik nain Mua Maneka wameiya-pa anane wueliwa ikaikuan.”

16 Moram Mua Maneka miiw mua manek akena wia kookalep ona Muuka kuisow akena nain sesekak. Naapeya wi mua eena o opora wiar miimap opimik nain wi iiwawun me mesenalikuan, Mua Maneka wameiya-pa anane eliw akena ikaikuan. 17 Moram Mua Maneka ona Muuka sesekak nain me miiw mua wia mekawap wia samorowa nain orok, weetak. Os-ke orop wia aawinok naep sesekak. 18 Naeya wi mua o opora wiar opimik nain Mua Maneka-ke pina me wiar kema suuweya opora-pa me arikuan. Ne wi mua o opora me wiar opimik nain wiimar pina wiar ookami yo opora-pa efar ikaikuan maek. Moram wi Muuka kuisow nain opora me wiar opamik. 19 Mua wia mekawowa onoma feenap, parina iiriw orop miiwa-pa ikua, nain wi mua-ke parina nain mikikira iwemi epa kokoma-pa ikowa kookalimik. Moram wi sira samo-samora onimik. 20 Ne wi mua eena pina onimik nain epa kokoma-pa ikaiyen naimik, moram wi sira samora onimik nain ariman me yiar arinok naep parina-pa ikowa nain mia fifimik. 21 Ne wi sira makena kookalep onimik nain parina aawimik. Feenap maimik, i sira makena onimik nain Mua Maneka-ke wia kekanoweya wi sira naap onimik, naap yia mauk naep naap onimik.

Yon-ke Yeesus ariman maek

22 Aria naap ikok Yeesus ona teeria unowiya Yuudia kame ikiwemik. Ikiwep lawiliw nan ikok emeria mua eka-pa wia yasuwam-ikua. 23 Ne Yon pun naap, Ainon owowa eka-pa wia yasuwam-ikua, owowa nain Salim mamaiya-pa ikua. Eka unowa kame nan ikomakek, naapeya emeria mua o wiar ikiwiwkin wia yasuwam-ikua. 24 Iir nain Yon koora-pa me wuowa ikemik. 25 Ne iir oko-pa wia yasuwowa sira muuta nain Yon teeria-ke Yuuda mua oko wameiya aakunemi oporiw irakemik. 26 Ne Yon teeria-ke ikip Yon maakemik, “Somek mua, iiriw mua eena ikos Yodan eka kame okaiwi-pa ikeman nain pun aakisa eka-pa wia yasuwam-ikaiya, mua no maem-ikon nain. Mua unowiya maneka o wiar ikiwem-ikaimik.”

27 Ne Yon-ke wia maakek, “Mua onaiw maa naap onowa me pepek, Mua Maneka-ke me pepekiminon-na maa sira feenap nain me oninon. 28 Ni iiriw feenap maemkun miimaman, ‘Yo me Krais-ke, yo Mua Maneka-ke efa sesekeya ekapem, ne mua makena murariya.’ 29 Sira feenap saarik, mua-ko emeria aawinon-na aria mua nain maneka-ke. Ne mua nain aakunem-ikaeya ona womar eliw opora wiar miimap wiar kemelinon. Yo sira naapiw aakisa manek akena kemeliyem. 30 O maneka-ke, ne o unuma ikoka manekarem-ikainon, yo weetak, o tepak-pa wiar ikainen,” naap maek.

31 Aria mua eena iinan-pa orok nain-ke mua unowa wia nomakek ne mua eena miiwa-pa imenarek nain miiw fain mua-ke, naeya miiw maa muutitik nain aakuniya. Ne mua eena owow iinan-pa orok nain-ke maa unowa onamiariya. 32 Maa urufap opora miimap maiya, nain wi mua-ke opora me wiar miimimik. 33 Mua eena opora wiar miimiya nain, Mua Maneka maken akena-ke naiya. 34 Moram mua eena Mua Maneka-ke sesekeya ekapok nain Ewar me elu muuta iwok, manek akena iwok, naapeya o opora maomiya. 35 Wiawi-ke ona Muuka kookalep maa unowa urufowa nain kekanowa iwok. 36 Naeya mua eena Muuka opora wiar miimap opiya nain anane eliwa ikainon. Ne mua opora me wiar miimiya nain weetak. Moram Mua Maneka urom sirirowa naap wiar ikainon.

Copyright information for `MHL