John 4

Yeesus Samaria emeria opora maakek

Aria Yeesus Yon nomakep mua unow akena wia yasuwam-ikua. Yeesus ona weetak, makena ona teeria-ke wia yasuwam-ikemik. Ne pun mua unowa o ookamik nain meta manekareya wi Farisi miimamik. Ne Yeesus naap miimap Yuudia piipuap nainiw kirep Galili ikiwok. Ikiwemi Samaria kame-pa naap ikiwok.

Ikiwemi owowa Sikar naimik nan fuunek. Miiw ara oko iiriw ekera Yekop-ke ona muuka Yosep iwok, epa nain Sikar mamaiya-pa ikua. Eka unawera iiriw eena Yekop kuak nain pun nan ikua. Aria unun ama naeya Yeesus era epasia soomarek nain mia sanumarep eka unawera-pa nan pokap ikua.

Nan pokap ikaeya Samaria owow emeria-ko eka uninen naep ekapok. Eka unem-ikaeya maakek, “Sira eliwa, yo eka-ko unep enake.” Ne Yeesus ona waisow ikok naap maakek, ona teeria-na maa enowa-ko sesenaru naep Sikar owowa orop ikemik.

Naeya emeria nain-ke maakek, “No Yuuda-ke, ne yo Samaria-ke, moram yo eka-ko enake efa naakin?”
4.9Wi Yuuda ne wi Samaria iiriw teeria kuisow ikemik. Ne wi Asiria-ke ekapep owowa wiar samorami wi teeria Samaria-pa ikemik nain papako wia aawep ikiwemik. Naap ikok wi owow oko-ke ekapep miiwa nan taanemik ne wiipa wiar aawemik. Naapeya wi Yuudia-pa ikemik nain maemik, wi Samaria me i aka kakeniw-ke. Naemi wiamiya ikowa miatinemik.
Moram iir nain wi Yuuda wi Samaria wiam miatinemik.
10 Ne Yeesus-ke maakek, “No Mua Maneka maa eliwa nia sesekomak nain amisarekan-na, ne pun mua eena eka nefa maakiya nain amisarekan-na o maakeya eka anane naap ikaiya nain eliw nenakinon.” 11 Naeya emeria nain-ke maakek, “Maneka, no eka unomowa nain amina weetak, ne eka fain irauwa akena. No eka anane naap ikaiya nain kaaneke aawinan? 12 Yiena nembesir Yekop-ke eka unawera fain kuak. Ona, ne ona muuk unowa, ne maa eneka pun, wi unowiya iiriw eka fain enem-ikemik, ekapep aakisa. Ne nos-ke Yekop nomakep maneka arekam naep-i?” 13 Naeya maakek, “Wi mua eka fain enimimik nain ikoka nainiw kema enekarem-ikaikuan. 14 Ne mua eena yo eka onakiyem nain ikoka nainiw kema me enekarinon, weetak. Eka nain eka ona saarik kema-pa wiar suuw-urupem-ikaeya Mua Maneka wameiya anane eliwa ikainon.” 15 Naeya emeria nain-ke maakek, “Maneka, yo eka naap nain-ko enake. Ne yo kema enekarep anane ekapep eka fain me unem-ikainen.”

16 Naap maeya maakek, “No ikiwep nena mua aawep ikos ekapeka.” 17 Ne emeria nain-ke maakek, “Yo mua marew ikem.” Naap maeya maakek, “No pepek maen, no mua marew. 18 Makena, no mua ikur iiriw wia aawon. Ne aakisa mua wameiya ikon nain me nena mua makena-ke. No makena maen.” 19 Naeya emeria nain-ke maakek, “Maneka, aakisa yo amisarem, no profet-ke. 20 I Samaria iiriw yiena kae unowa anane ema eenan wiam fiirimep Mua Maneka lotu arem-ikemik.
4.20Wi Samaria Gerisim ema-pa Mua Maneka lotu onam-ikemik.
Nain ni Yuuda-ke maiman, Mua Maneka lotu arowa epa Yerusalem owowa-pa muutiw ikua. Naap-i?”

21 Ne Yeesus-ke maakek, “Aite, yo opora efar miime. Epa fan kereriya, Mua Maneka lotu arowa nain ni ema neeke me onowen ne Yerusalem owowa pun me onikuan. 22 Ni Samaria-na o eena me baliwep amisareman nain lotu oniman. Ne i makena, i o amisaremik nain lotu onimik. Moram Mua Maneka yia aawowa maek nain i Yuuda teeria-pa yiar imenarek. 23 Epa nan kereriya, nain aakisa fanek, wi mua opor makena maemi Ewar Eliwa kekanowa-pa Mua Maneka lotu arikuan. Lotu sira eena Mua Maneka kookaliya nain. 24 Mua Maneka-na ewar-ke, naeya wi o lotu onimik nain opor makena maemi Ewar Eliwa kekanowa-pa lotu onam-ikaikuan.” 25 Ne emeria nain-ke maakek, “Yo amisarem, Mesaiya eena Krais naimik nain ikoka ekapinon. Os-ke ekapemi maa unowa yia maakinon.” 26 Ne Yeesus-ke maakek, “Mua nain-na makena yo fanem. Yo mua nain-ke nefamiya aakunem-ikaiyem.”

27 Yeesus emeria nain mamaiya aakunem-ikaeya ona teeria iiriw owowa ekamik nain kiiriw ekapemik. Ekapep naap urufap kema unu-unowa wuamik. Nain feenap nokaru naep onamik-na me nokaremik, “No maa mauwa nokarin?” e, “No oram emeria nain wameiya aakunin?” 28 Aria emeria nain eka amina nan wuap-puap ikiwep owow mua wia maakek, “Nee, ni ekapep mua fain-ko urufeka. Yo maa muutitik iiriw onam nain os-ke ariman efa maek. O Mesaiya-ki e mua kamenap nain-ke?” 30 Naeya unowiya iikirap emeria nain ookap Yeesus wiar ekapemik.

31 Aria emeria nain ikiwep ikaeya ona teeria-ke maakemik, “Somek mua, no maa-ko enime.” 32 Naap maakiwkin wia maakek, “Yo maa enowa efar ikua nain ni me efar amisareman.” 33 Naeya wi kema unu-unowa wuami wi-wieniw maemik, “Aa, mua oko-ke maa enowa-ko pekapep onakemik-i kamenion.” 34 Naiwkin wia maakek, “Weetak, yo maa enowa feenap maiyem, mua eena efa sesekak nain kookalowa ookami o uuwowa iiwawun welawomakam naep. 35 Ni feenap maiman, ‘Siiwa erepam ikiweya maa enowa perekimik.’ Naap-i? Nain yos-ke feenap nia maakiyem, ni mokoka wilinep baliwep urufeka. Manin maa enowa iiriw parewok. 36 Mua eena maa enowa perekap koora-pa sepa wuiya, mua nain o kiripowa wiar ikua. Ne maa enowa koora-pa sepa wuimik nain feenap, wi mua, Mua Maneka pika kemena ikiwep anane eliwa ikaimik nain wia maiyem. Mua maa enowa upiya nainiya, ne mua maa enowa perekiya nain, wiam erup eliw kemelikuan. 37 Naapeya opora fain makena, ‘Mua oko-ke maa upowa isakiya ne mua oko-ke maa enowa perekiya.’ 38 Ni maa enowa me upeman nain yos-ke maa enowa perekowa nia sesekam. Mua papako-ke iiriw oospep maa upowa isakemik, ne ni aakisa perekiman.” Naap wia maakek.

39 Aria Samaria owow emeria nain-ke owow emeria mua unowa wia maakek, “Yo maa muutitik iiriw onam nain ariman efa maek.” Naapeya wi Yeesus opora wiar opamik. 40 Ne o wiar ekapep yiamiya ikainok naep kekanemik. Naapeya ekap fofa erup nan wiamiya ikua. 41 Nan ikok opora wia maakem-ikua nain unow akena opora wiar opamik. 42 Ne emeria nain maakemik, “I me no maen nain muutiw miimap opora wiar opimik, weetak. I yiena kakeniw ifana-pa wiar miimamik. Naeya i aakisa amisaremik, mua fain makena-ke, os-ke miiw mua yia aawow mua-ke.”

Yeesus woos mua muuka wiar saliwak

43 Aria fofa erup weesereya Yeesus owowa nain piipuap Galili ikiwok. 44 Moram ona wame maemi maek, “Profet ona owow mua-ke ekima me opimik.” 45 Nain wi Galili unowa iiriw Pasowa maapora urufowa naep Yerusalem ikiwep nan ikaiwkin maa miililina oneya wiar urufamik. Naapeya Galili ikiwok nain kemelap aawemik.

46 Aria nan ikok kiiriw Kaana owowa ikiwok, owowa eena mokomokoka maa miililina onami eka wain onak, owowa nain. Ne anim onom mua-ko Kapeneam owowa-pa ikaiya. Mua nain muuka-ke wiar napumarep umekam naep onam-ikua. Aria Yeesus Galili ekapok nain miimap muuka saliwominok naep ikip Yeesus nokarek. 48 Nokareya maakek, “Ni, yo maa miililina onamkun efar urufap opora efar opiman naiman, ne me urufiman nain weetak.” 49 Ne mua nain-ke maakek, “Maneka, ewur akena yooke aa, oko yo muuka efar uminon.” 50 Naeya maakek, “No eliw ikiwinan, no muuka nefar sariarinon.” Ne opora wiar miimap makena efa maakiya naep ikiwok. 51 Ikim-ikok ona uuwow mua wia miirowak, ne wis-ke maakemik, “Oo, no muuka nefar sariarek.” 52 Ne wia nokarek, “Ama kamin napuma wiar sariarek?” Naeya maakemik, “Inon amirika ama kuisow naap.” 53 Naap maiwkin kema suuwak, inon amirika ama pepek naap Yeesus-ke maakek, “No muuka nefar sariarinon.” Ne aria naap furewap ona ne ona teeria unowiya Yeesus opora wiar opamik. 54 Aria Yeesus Yuudia kame piipuap Galili ekapep iir nain maa miililina nain oneya aakisa erup arek.

Copyright information for `MHL