John 9

Yeesus mua mokok opa saliwak

Aria Yeesus ikiwem-ikok mua mokok opa-ko urufak. Mua nain iiriw onak uroma-pa naap orok. Aria Yeesus ona teeria-ke nokaremik, “Somek mua, mua fain naarew pina-pa onak-ke mokok opa naap muukarek? Mua nain ona pina-pa e onak wiawi pina-pa?” Ne wia maakek, “Weetak, me mua nain ona pina-pa e onak wiawi pina-pa naap imenarek. Naap arep ikua nain, ikoka Mua Maneka-ke saliweya mua unowa o kekanowa wiar urufikuan. Aakisa ama maneka ikua fainiw o eena efa sesekak nain uuwowa onomiyen. Epa nan kokomariya, uura mauwowa me pepek. Yo fan ikem nain miiw mua parina wiem-ikaiyem.”

Naap maep-puap ineka kuemi opeka tuenep opeka nain miiw onaiya kiripak. Kiripap aawep mua nain mokoka-pa ifomami maakek, “No ikiwep Siloam eka unawera-pa mokoka yasuwe.” Eka unuma nain kemena feenap, “Sesekowa”. Naeya ikiwep mokoka yasuweya mokoka wiar wilinek. Naeya kirep ekapok.

Ne aria ona owow epaskun ne wi mua iiriw maamuma wia nomarem-ikua nain urufamik nain-ke naap urufap wi-wieniw wiam nokaremik, “Nee, mua fain anane fan pokap ikok maa yia nomarem-ikaiya nain-ki?” Ne papako-ke maemik, “Ae, mua nain-ke.” Ne papako-ke maemik, “Sa, weetak. Mua fain o saarik urufinan.” Naap aakunem-ikaiwkin ona wia miimap wia maakek, “Ae, yos-ke.” 10 Naeya nokaremik, “Ne no kamenap onap mokoka wilinep aakisa maa urufin?” 11 Ne wia maakek, “Mua Yeesus naimik nain-ke sipa aawep mokoka-pa ifomep efa maakek, ‘No ikiwep Siloam eka unawera-pa mokoka yasuwe.’ Naeya opora wiar ookap naap onamkun mokoka efar wilineya maa urufiyem.” 12 Ne nokaremik, “Mua nain ona kaanek ikua?” Ne os-ke, “Yo me amisarem,” naap wia maakek.

Wi Farisi mua sariarek nain baliwep akena nokaremik

13 Yeesus sipa kiripap mua mokok opa saliwak nain, Sabat fofa-pa nain onak. Muut nain mua nain aawep wi Farisi wiar ikiwemik. 15 Ne wi Farisi-ke nokaremik, “O kamenap onap mokoka nefar saliwak?” Ne wia maakek, “Sipa aawep mokoka-pa wuomep-puap ikip mokoka yasuwowa efa maakeya naap onap aakisa maa urufiyem.” 16 Ne wi Farisi papako-ke maemik, “Mua sira naap onak nain me Mua Maneka wiar ekapok, naeya Sabat sira me ookiya.” Ne papako-ke maemik, “Weetak, pina mua maa miililina naap nain me oninon.” Naap maemi wiam fookamik. 17 Naap ikok nainiw mua mokok opa nain nokaremik, “Mua nefa saliwak nain no kamenap mainan?” Ne maek, “O profet-ke.”

18 Ne o mokok opa ikok sariarek nain wi Yuuda makena-ke me naep ona onak wiawi wiar farep 19 wia nokaremik, “Ni maeka, mua fain ni muuka-ki? Ne mokok opa naap imenarek, naap-i? Ne kamenap onap aakisa maa urufiya?” 20 Ne onak wiawi-ke wia maakemik, “Ae, makena i muuka-ke, mokok opa naap imenarek. 21 Ne aakisa mokoka kamenap onap sariarep maa urufiya nain i me amisaremik. Ne mua naareke saliwak nain pun me amisaremik. O me gia muuta-ke, ona nokariwkin nia maakinok!” 22 Aria wi Yuuda woos mua iiriw opora feenap anumap-puamik, mua naareke Yeesus Mesaiya-ke nainon-na mua nain iiwawun iirarep sisina-pa wuiwkin wi wiamiya lotu me arinon. Wiam erup nain wia keker opap maemik, “O arimok aa, ona nokareka.”

24 Ne kiiriw mua nain fariwkin ekapeya maakemik, “No Mua Maneka unuma-pa makena mae! I mua nain amisaremik, pina mua-ke.” 25 Ne os-ke wia maakek, “O pina mua-ki e wia, yo me amisarem. Yo maa kuisow fain amisarem, yo iiriw mokok opa ikem, ne aakisa maa urufiyem.” 26 Naeya nokaremik, “O maa mauwa nefa onak? Ne sira kamenap onap mokoka nefar saliwak?” 27 Ne wia maakek, “Yo nan maem, nain yo me efa miimaman. Ne moram nainiw mae-maep nainen? Nis pun o teeria wiar aru naep-i?” 28 Naeya wis-ke riirinemi maakemik, “No nena mua nain teeria-ke. I wia, i Moses sira wiar ookimik. 29 I fain amisaremik, Mua Maneka ona opora iiriw Moses iwok. Ne mua nain me amisaremik, ne epa kaanek ekapok nain pun me amisaremik.” 30 Ne mua nain-ke wia maakek, “Aa, ni opora naap maiman, naapeya yo kema suuwiyem-na weetak. Moram nis-ke o epa ekapok nain me amisareman naiman. Nain yo mokoka efar saliwak! 31 I feenap amisaremik, wi pina mua, Mua Maneka maa nokarimik nain opora me wiar miimiya. Makena, wi mua eena opora wiar miimap ookimik nain opora wiar miimiya. 32 Iiriw iiriw mua kuisow mua mokok opa-ko mokoka wiar saliwak naiwkin-ko me miimamik. 33 Ne mua fain me Mua Maneka wiar ekapekak-na maa miililina kuisow me onekak.” 34 Naeya wis-ke maakemik, “No pina onaiya ikok imenaren. Ne nos-ke i suule yiekam naep-i?” Naap kakankami iiwawun iiraremik.

Wi mua opora me opimik nain wi mokok opa saarik

35 Aria mua nain iiraremik nain Yeesus opora miimak. Ne mua nain akupap imenap maakek, “No Mua Muuka makena-ke nain-i?” 36 Naeya os-ke, “Oo Maneka, mua nain naarew main? Unufeya makena nainen.” 37 Ne Yeesus-ke maakek, “No mua nain aakisa urufin. Nain-ke nefamiya aakunem-ikaiya.” 38 Naeya maakek, “Maneka, aakisa yo makena naiyem.” Neemi Yeesus meren onoma-pa keema muuna mikap unuma fakerak. 39 Naeya maakek, “Yo miiwa fan ekapem nain yo muuta nain wia mekawikuan. Naapeya wi mua mokok opa eliw maa urufikuan, ne mua mokok eliwa mokok opa arikuan.” 40 Aria wi Farisi papako pun nan ikaiwkin Yeesus opora naap maek. Naeya nokaremik, “Ne is pun mokok opa-ke yia nain-i?” 41 Ne wia maakek, “Ni mokok opa ikekaman-na ni pina marew ikekaman. Nain ni feenap maiman, ‘I maa urufimik,’ naapeya ni pina naap niar ikainon.”

Copyright information for `MHL