Luke 10

Yeesus mua unowa uuwowa wia sesekak

Aria naap ikok Yeesus kiiriw mua ten ikur okaiwi-pa erup erup (72) wia sesekak. Wi teeria nain mua ere-erup wia sesekeya wi kiikir miimep owowa kuisow kuisow wiar ikiwemik, owow unowa ona wiimar ikiwowa nain. Wia sesekami wia maakek, “Manin maa enowa kerew akena ikomakek, nain iwap enowa aawow mua-ke unow marew. Naapeya ni manin onoma nokariwkin uuwow mua papako wia sesekinok. Ni ikiweka. Ni sipsip muuka saarik wi siow asia saarik ikemik nain gone-pa nia sesekiyem. Niena maamuma paus, inera ne meren suuwowa feekiya me ikiweka. Ni ikiwemi era-pa me pokam-miaweka. Ne owowa fuunep koor oko wiar ikiwep kiikir akena feenap maeka, ‘Koora fain emeria mua kema eliwa ikeka,’ naap wia maeka. Ne kema eliwa maeman nain niar opiwkin-na, ni opor eliwa nain koora neeke makenarinok. Nia iirarikuan-na opor eliwa nain makena me arinok. Nia aawiwkin-na koora kuisow neekeriw inem-ikeka. Koor oko oko-pa me areka. Maa enowa neeke wiar enem-ikeka, moram ni mauwiwkin enowa nienakimik. Ne owow oko wiar ikiwiwkin wiena koora nia pikiwep, maa mauwa-ko nienakuk-na eliw wiar enimeka. Owowa nain mua napuma eliw wia saliwami opora fain wia maakem-ikeka, ‘Mua Maneka miiw mua pika kemena-pa yia wuowa epa mamaiyarek,’ naap wia maakeka. 10 Ne owow oko ikiwiwkin me nia aawiwkin-na owowa nain piipueka. Piipuap ikiwemi wia maakeka, 11 ‘Niena owowa miiw foma merena-pa yiar ikua nain kiiriw niena nia tukunomiyen. Naeya i feenap nia maakimik, Mua Maneka pika kemena wiar ekowa epa mamaiyarek,’ naap wia maakeka. 12 Yo makena nia maakiyem, miiwa weeserow epa-pa wi owowa nain pina manek akena aawikuan, iiriw wi Sodom sira samora-pa pina maneka aawemik nain nomakep aawikuan.”

Owowa papako kema me kiremik

(Matiu 11.20-24)

13 “Aa nefa komarka, ni Korasin ne ni Betsaida, ikoka yoowa aawowen. Yo iiriw ni niar ikok maa miililina nia ofakowam-ikemkun kema me kireman. Nain yo ikip Taiya ne Saidon-pa onekam-na wi iiriw kema kirekamik, pina onamik muuta nain konim irina ainep foma yakiep ikekamik. 14 Ikoka Mua Maneka ni sira samora nain nia mekawow epa-pa neeke ni pina maneka aawowen, ne wi Taiya ne Saidon pina maneka me aawikuan. 15 Ne ni Kapeneam, ni niam purupep iinan-pa niam wuau naep-i? Me pepek. Mua Maneka-ke mukuna-pa nia wafurinon.” Naap maek. 16 Naap ikok ona teeria wia maakek, “Wi mua ni opora niar miimimik nain, yos pun efa miimimik. Ne wi mikikira niimik nain yos pun mikikira yiemi Auwa yo efa sesekeya ekapem nain pun mikikira iwimik.”

Mauwow mua kirep ekapemik

17 Aria naap ikok uuwow mua ten ikur okaiwi-pa erup erup (72) nain uuwowa welawap kirep ekapemik. Wi fuunep kemelami Yeesus maakemik, “Maneka, i no nefa unufami sawur wia iiraremkun opora yiar miimamik.” 18 Naap maiwkin wia maakek, “Yo Satan urufam-na mokoma saarik iiwep orok. 19 Ni fain amisareka! Yena kekanowa niem, naeya ifa ne waasisirowa akupowen-na me nia kuinon, ne Satan kekanowa eliw wiar nomakowen. Maa kuisow-ko me nia samorinon. 20 Aria wi sawur opora niar miimimik nain me senam kemeleka, weetak. Maa kuisow fain kemeleka, niena unuma iiriw iinan owowa-pa niar siisimep-puamik, ni nain kemeleka,” naap maek.

Yeesus kemelap Auwa maneka sira eliwa naek

(Matiu 11.25-27 ne 13.16-17)

21 Ne iir nain Yeesus Mua Maneka Ewar Eliwa-ke oneya kemelami maek, “Oo Auwa, owow iinan ne miiwa fain onoma nos, yo sira eliwa nefa naiyem. Moram, maa unowa kokot ikua nain wi mua kema ne amis onaiya ikemik nain me wia ofakowan, ne wi mua takir kema saarik ikemik nain wia ofakowan. Makena, Auwa, sira naap nain nena kookalowa-pa onan. 22 Yo maa unowa yena Auwa-ke wapena-pa efar wuak. Mua kuisow Mua Maneka Muuka me wiar amisarek, Auwa ona waisow Muuka amisarek. Ne mua kuisow yo Auwa me efar amisarek, ne yo o Muuka-ke yaisow amisarem. Ne yo yena kookalep yena Auwa mua papako wia ofakowamkun amisarikuan.”

23 Neemi kirep ona teeria kokot wia maakek, “Wi mua ni maa urufiman nain urufap-na eliw kemeluk. 24 Yo makena nia maakiyem, ni aakisa maa urufiman nain wi iiriw profet ne owow saria unowa wi urufowa manek akena kookalemik, nain me urufamik. Ne ni opora miimiman nain wi miimowa manek akena kookalemik, nain me miimamik.”

Samaria mua-ke sira eliwa onak

25 Aria iir oko sira amis mua oko-ke iikirap Yeesus akimami nokarek, “Oo somek mua, yo sira kamenap onamkun Mua Maneka anane wameiya eliwa ikainen?” 26 Ne maakek, “Moses sira wuomakek nain opora kamenap maek? Ne no unufin nain kemena kamenap aawin?” 27 Naeya maakek, “Feenap maek, ‘Yiena Maneka Mua Maneka kookale, mia, kema, uroma, woosa iiwawun manekiw kookale. Ne no mua oko wia kookale, nena name kookalin naap.’” 28 Naap maeya maakek, “Nanek, no pepek kiripan. Naapeya no ikiwep naapiw akena one. Sira naap onap anane Mua Maneka wameiya eliwa ikainan.” 29 Mua nain-ke kiiriw maakek, “Iiriw nefa nokarem nain, yo fain amisarinen naep, yo mua oko naarew akena wia kookalowa-ke ikua?” 30 Naeya arekin opora feenap iromak, “Mua oko Yerusalem piipuap Yeriko orok. Orom-ikaeya wi mua samora-ke era-pa imenap samor akena arufap maa unowa wiar aawep ikiwemik. Mia suuwowa pun wiar aawiwkin era-pa nan saporma inep ikua ne lawisiw akena umekak. 31 Iir nain pris oko era nan ikiwemi mua nain urufak. Naap urufap nan ikaeya ao-wuepami ikiwok. 32 Ne wi Liwai kerekera mua oko pun sira naap ao-wuepap ikiwok. 33 Naap ikaeya owow oko Samaria mua-ke ekapok. Ekapemi urufap manek akena kemalek. 34 Ne mamaiya ekap wel wain onaiya aawep ikemika wiar yasuwap kaikomak. Naap onap mua nain fakerap ona donki iinan-pa pokomowap pikiwok. O baliwep akena kakaltak. Aria era-pa soomaremi kokomareya inimik koora pikiwep nan wuak. 35 Uuriw epa wiimeya koora nain onoma maamuma iwemi maakek, ‘Mua fain baliwep kakalte. Ne yo maamuma niiyem fain weeserinok-na nena maamumaiw naape. Ikoka yena kirep ekapemi kiripominen,’ naap maakek.

36 Aria yo aakisa nefa nokariyem. Mua wiam arow nain, mua naareke mua samor aawok nain manek akena kookalek?” 37 Nokareya mua nain-ke maek, “O kemalep asipak nain-ke.” Ne maakek, “Nos pun ikiwep sira naapiw mua wia kookalem-ike.”

Yeesus, Maria Mata ikos koora wiar ikiwok

38 Aria Yeesus ona teeria wiamiya ikiwemi owow oko wiar kereremik. Owowa nain emeria oko unuma Mata, os-ke Yeesus fareya koora wiar ikiwok. 39 Mata wiamun Maria, o ekap Yeesus wameiya-pa wiar pokap opora wiar miimam-ikua. 40 Naap oneya ona weepe uuwowa unow akeniya kema samorarep Yeesus maakek, “Maneka, yo kema me efa suuwin-i? Yena aamun fain yaisow efa wueya uuwow unowa yaisow uuwam-ikaiyem. O maakeya-ko ekapep efa asipinok.” 41 Naap maeya maakek, “Oo Mata, no uuwow muuta nain woosa unu-unowa arep kema samorarin. 42 Maa kuisow fain maa maneka-ke. Maria maa eliw akena fain aawowa kookalep opora efar miimiya. Naapeya maa eliwa fain me wiar iirariyen.”

Copyright information for `MHL