Luke 11

Mua Maneka farep nokarowa sira

(Matiu 6.9-15 ne 7.7-11)

Iir oko Yeesus epa oko-pa ikok Mua Maneka farem-ikua. Weesereya ona teeria mua oko-ke maakek, “Maneka, no Mua Maneka farow sira-ko yia ofakowe, iiriw Yon Baptais ona teeria wia ofakowak naap.” Ne wia maakek, “Ni Mua Maneka faremi opora feenap maeka,

‘O Auwa, no unum maneka nefa fakeram-ikaiyen.
No miiw mua pika kemena-pa yia wuowa epa nain imenarinok.
[Wi owow iinan opora nefar ookimik, ne i miiwa-pa ikemik fain pun opora nefar ookam-ikaiyen.]
Nos-ke yia urufam-ikaeya i maa enowa pepek yiar ikainok.
Mua oko sira samora yia onimik nain i me wiar kema suuwimik. Naapeya i pina onimik nain yiar iirare.
Ne akimowa-pa me yia wue.’”
Naap wia maakek.

Ne kiiriw wia maakek, “Nena nomar sira feenap-ko nefa oninon-i e weetak? No uura ikiwep nomar nain maakinan, ‘Emar, yo emer ikowa arow-ko yie. Yena emar oko epasia-pa efar ekapeya onakowa nain maa enowa mareweya ekapem.’ Naap maakeya os-ke nefa maakinon, ‘Yo mokoka efa puukin sa. Yo omopora iiriw upem, ne yo muuka efar inemik. Yo kamenap iikirap maa enowa niinen?’ Aria nomar sira naap nefa oninon-i e weetak? Yo nia maakiyem, mua nain yena yomar-ke maa maiya naep iikirap me niinon-na, aria oko emina ururinen naep iikirap maa kamenap kookalin nain pepek akena naap niinon.

Naapeya nia maakiyem, ni Mua Maneka farep nokariwkin nia apekarinon. Maa akupap eliw imenowen ne omopora anumiwkin nia paaskominon. 10 Moram wi mua maa-ko nokarimik nain eliw wiinon. Mua maa-ko akupimik nain eliw imenikuan ne omopora anumimik nain eliw wia paaskominon.

11 Ni muuk onaiya ikeman nain ni feenap-ko oniman-i e weetak? Muuka-ke mera naeya ifa samora onakowen-i? 12 Ne aar muneka naeya waasisirowa onakowen-i? Weetak, ni naap me oniman. 13 Ni mua samora-ke, nain ni muuka maa eliwa wiowa nain amisareman. Naemi niena Niawi owow iinan-pa ikua nain-ke ni Ewar Eliwa naep nokariwkin me niinon-i? Eliw nia sesekominon.”

Yeesus sira oko, Belsebul sira oko

(Matiu 12.22-30, Mak 3.20-27)

14 Ne iir oko-pa mua oko me aakuniya nain Yeesus-ke sawur wiar iirarek. Sawur piipuiwkin mua nain kiiriw aakunek. Mua unowa naap urufap soranep kakaemik. 15 Ne mua papako-ke maemik, “Sawur wia iirariya nain wi sawur woos mua Belsebul-ke
11.15Satan unuma oko Belsebul.
kekanowa iweya naap wia iirariya,” naemik.
16 Naemi mua papako-ke Yeesus akimami faremik, “No maa miililina-ko imeneya-ko nefar urufiyen.” 17 Naap maakiwkin wi kema wiar amisarep wia maakek, “Owowa-ko mua wiam fookap teeria erup arep irakikuan-na, owow onaiya iiwawun samorarikuan. Ne kerekera pun naap, wiam fookap irakikuan-na kerekera nain iiwawun samorarikuan. 18 Ne Satan pun sira naap, ona teeria wiamiya irakinon-na eliw kekanep ikaikuan-i? 19 Ne yo Belsebul-ke kekanowa yieya sawur wia iirariyem naap efa maeman. Nain makeniya-na niena teeria sawur wia iirarimik nain, mua naareke kekanowa wieya naap onimik? Ikoka wis-ke naap onami ariman wuikuan, ni opora me makena-ke. 20 Ne yo Mua Maneka kekanowa-ke efa asipeya sawur wia iirariyem. Ni naap efa maep-na eliw amisarowen, Mua Maneka ona pika kemena-pa nia wuowa epa fan imenarek.

21 Feenap saarik, mua kekanowa-ko irakow maa opap ona koora baliwep akena urufam-ikainon-na ona maa unowa eliw wiar ikainon. 22 Ne mua oko kekanow akena nain-ke ekapep mua nain wameiya irakep o nomakep irakow maa unowa wiar aawinon. Ne maa unowa pun wiar aawep sererkap wiomakinon. 23 Mua eena yo efamiya me ikua nain yo iiwua-ke. Ne mua eena yo efamiya me uuwami mua me wia fiirimiya nain wia fafarumeya pukikuan.”

Sawur iiriw mua piipuap ikiwok nain kirep ekapiya

(Matiu 12.43-45)

24 “Aria sawur mua oko mia-pa wiar ikok oromi epa reenowa ikiwep uurarow epa enuma akupam-miawinon. Epa me imeninon-na kema-pa feenap mainon, ‘Yo kirep yena epa awona nainiw iwinen.’ 25 Naap maep kiiriw ekapep ona epa awona nain urufinon-na koor kemena epa foniwkin ikua, maa sakua marew. 26 Naap urufap kiiriw ikiwep sawur samor akena ikur okaiwi-pa erup wia aawep ekapep koora neeke taanikuan. Naeya iiriw mua nain lawisiw samora ikua, ne ikoka iiwawun samorarinon.”

Sira kamenap onap kemelimik

27 Yeesus opora nain maem-ikaeya emeria oko teeria maneka gone-pa wiar ikok maakek, “Emeria eena no nefa muukarep nefa kakaltak nain eliw kemelinon!” 28 Naap maeya maek, “Makena, nain kemelowa onoma feenap, wi teeria Mua Maneka opora wiar miimap ookimik, wi eliw kemelikuan.”

Maa Yoona-pa ilenowa

(Matiu 12.38-42, Mak 8.12)

29 Aria wi unow akena Yeesus wiar ekapem-ikemik. Naeya feenap wia maakek, “Ni aakis teeria fain ni mua samora-ke ikeman. Ni maa-ko imeneya i urufiyen, naap efa naiman. Weetak, yo me oninen. Ni Yoona kamenap arek nain kema suuwap ileneka, maa nain muutiw urufowen.
11.29Iiriw ekera Mua Maneka-ke Yoona sesekak, ikiwep wi Niniwe opora wia maakeya kema kirep sira samo-samora onam-ikemik nain piipuauk naep. Yoona uuwowa nain miatinep baurarep epa oko ikiwok. Ne Mua Maneka-ke ewar maneka sesekeya aasa wiar fieneya Yoona ifera-pa wafuramik. Naap ikaeya mera maneka-ke muok. Fofa arow-pa kiiriw miiwa-pa keesak. Mua Maneka-ke nainiw sesekeya Niniwe ikiwep opora wia maakeya kema kiremik.
30 Iiriw Mua Maneka-ke wi Niniwe mua Yoona-pa wia ofakowak. Ne ikoka Mua Muuka-pa ni aakisa epa fain emeria mua unowa nia ofakowinon. 31 Ikoka miiwa weeserow epa-pa, Mua Maneka-ke wia mekawiya neeke Seba woos emeria-ke iikirap ni pina ariman niar wuinon. Moram o epasia akena-pa ikua nain-ke ekapep Solomon
11.31Solomon iiriw ekera wi Yuuda owow saria maneka-ke. O wiawi Dewit. Mua Maneka-ke amis maneka iweya mua kema firia ikua.
amis eliwa wiar miimam-ikua. Nain aakisa mua kuisow fan ikua fain-ke Solomon amis maneka wiar nomakek. Nain ni opora me wiar miimiman.
32 Iir neeke wi Niniwe mua-ke ni aakis teeria fain pina ariman niar wuikuan. Moram wi iiriw Yoona opora wiar miimap kema kiremik. Nain mua kuisow fan ikua fain-ke Yoona nomakek, nain ni opora wiar miimap kema me kiriman.”

Mia parina

(Matiu 5.15 ne 6.22-23)

33 “Parina isimap me-ko pipilimimik e kua-pa me wuimik, weetak. Ariman sererimiwkin maa urufap koor kemena ikiwimik. 34 Nena mokoka pun naap, nena mia parina-ke. Mokoka eliwa nefar ikaeya-na, nena mia tepak parina manekiw nefar ikainon. Ne mokoka nefar samorarinon-na kokom miiriw ikainan. 35 Naapeya no maa uru-urufami, oko kema tepak parina nefar ikua nain kokoma tenowawinan. 36 Ne no kema tepak kokoma marew, parina manekiw nefar ikaeya-na feenap, lam parina nefa mikiya saarik naap ikainan.”

Yeesus wi Farisi ne sira amis mua wia maek

(Matiu 23.1-36, Mak 12.38-40, Luk 20.45-47)

37 Aria Yeesus opora maep weesereya, Farisi oko-ke maakeya ookak, ikos maa enimu naeya. Ikiwep koora kererep esimsa-pa pokak. 38 Sira me ookami wapena yasuwowa marew maa enem-ikaeya mua nain naap urufap kema unu-unowa arem-ikua. 39 Ne Yeesus-ke maakek, “Ni Farisi niena sira-sira onami urupa ne epira yasuwami mikikira baliwep akena yasuwiman ne kemena me yasuwiman. Nain ni ikum sira ne sira samora-ke niar taanep ikua. 40 Ni momora akena-ke. Mua Maneka mikikira siraremi kemena pun me sirarek-i? Ne urom tepak me niar urufinon-i? 41 Ni maa niar ikua nain wi mua maa marew ikemik nain wieka. Ni naap onowen-na ni sira eliwa-pa ikowen.

42 Ni Farisi, ni samor aawowen! Ni Mua Maneka patiru naep anane maa muutitik, maawa ne lombu naap fiirimep mokoka ten kuisow nain mokoka kuisow arowap Mua Maneka patiriman. Ni sira muutitik ookiman, nain ni sira maneka fain me ookiman, ni Mua Maneka me kookaliman, ne mua papako sira kakeniw me wia oniman. Ni sira nain anane ookam-ikok maa muutitik nain Mua Maneka patirekaman-na eliwa. Nain ni naap me oniman. 43 Ni Farisi, ni samor aawowen! Ni lotu koora ikiwep pokow eliwa miimowa-pa ikua nain senam kookaliman. Ne fofa epa-pa emeria mua nia ane-puukami unuma nia purupimik nain senam akena kookaliman. 44 Nefa komarka! Ni matmat sipira-ke mueya ikua saarik, tepak-ke tumina. Wi mua me urufap iinan-pa soomaremi mia awowa aawimik.”

45 Ne sira amis mua oko-ke maakek, “Somek mua, no wi wia maemi is pun yia maen.” 46 Naeya maakek, “Nefa komarka, nis pun. Ni sira ookowa uuwow yoowa akena nain wi emeria mua wiiwkin wi me pepek. Nain niena lawiliw-ko me wia asipiman. 47 Nefa komarka! Niena nembesir unowa-ke wi profet wia ifakimiwkin umemik. Aakisa nis-ke wiena matmat bala wia opawaman. 48 Sira neeke mua papako eliw amisarikuan, niena nembesir wi profet wia ifakimemik nain, aakisa nis-ke eliwa naep wiena matmat bala wia opawaman. 49 Iiriw Mua Maneka-ke ona amisarep maek, ‘Yo ikoka yena profet ne aposel teeria onaiya wia sesekamkun, ikiwiwkin papako wia ifakimikuan ne papako wia samo-samorikuan.’ 50 Naapeya ni aakisa fain emeria mua unowa ikoka pina nain aawowen. Iiriw akena profet wia ifakimemik nain ekapep aakisa epa fain pun sira naap oniman. Ni iiriw ekera Abel ifakimemi mua wia ifakimowa onoma wuaman nain ekapep Sekaraiya-pa. Sekaraiya-na tempel koora ne maa patirimik esimsa nain gone-pa ifakimemik. Ae, yo makena nia maakiyem, pina unowa nain yoowa ikoka ni aakis teeria fain-ke aawowen. 52 Nefa komarka, ni sira amis mua! Ni amisa aawow era eliwa iiriw mesalimeman. Amisa aawowa nain niena kakeniw omopora teekap ikiwep me aaweman. Ne mua papako ikiwep aawowa nain nis-ke wia mika-puukaman,” naap wia maakek.

53 Naap ikok koora nain piipuap owaruma oreya wi sira amis mua-ke wi Farisi wiamiya opora-pa wuau naep baliwep akena wuam-ikemik. Opora ara-ko samoreya-na neeke opora-pa wuau naep akimami nokarowa sira-sira nokarem-ikemik.

Copyright information for `MHL