Luke 12

Wi Farisi wadol sira me wiar ookuk naep wia maakek

(Matiu 10.26-27)

Aria yakeyak manek akena kererep iiwawun takunemik, suuw-ekowa me pepek. Ne kiikir akena Yeesus-ke ona teeria wia maakek, “Ni wi Farisi wadol sira wiar uru-urufap, me wiar ookeka. Moram maa eena kokotap-puamik nain ikoka ariman arinon, ne maa kokot ikua nain ikoka mua unowa amisarikuan. Ne uura opora kamenap-ko maeman nain epa wiimeya maiwkin miimikuan. Ne koor kemena-pa ikok ifan onoma-pa opora maeman nain ikoka ariman niar maiwkin amisarikuan.”

Mua Maneka waisow keker opowa

(Matiu 10.28-31)

“Aria emar unowik, yo nia maakiyem, ni mua mia muutiw nia ifakimimik nain ikoka maa oko nainiw me nia onowa me pepek. Naapeya me wia keker opaka. Ni Mua Maneka keker opaka, o nia ifakimep mukuna-pa nia wafurowa nain kekanowa wiar ikua. Ae, yo makena nia maakiyem, o keker opaka.

Ni kema suuweka, nepa fiir maa oram nain maamuma oka erup wuap ikur aawimik. Nain Mua Maneka nepa gelemutitik naap nain kuisow kema-ko me irinariya. Nis pun naap baliwep nia kakaltam-ikaiya. Ni ikiwos afif onoma iiriw niar tuunap-puak. Naapeya ni me keker opaka, moram nepa unowa nain maa oram-ke, ne nis-ke makena, nia kema suuwap nia kookal-afuriya.”

Yeesus unuma ariman wiar wuowa sira

(Matiu 10.32-33 ne 12.32 ne 10.19-20)

“Yo makena nia maakiyem, mua yo yookami mua unowa mokoka-pa wame wuinon-na, ikoka yo Mua Muuka pun naap, mua nain unuma wi ensel mokoka-pa ariman wuinen. Ne mua-ko mua unowa mokoka-pa yo mikikira yiinon-na, ikoka yo Mua Muuka pun naap, wi ensel mokoka-pa mikikira iwinen.

10 Wi mua yo Mua Muuka efa firekami opora-ko onikuan-na Mua Maneka-ke pina nain wiar iirarinon. Ne Ewar Eliwa firekikuan-na, Mua Maneka-ke pina nain me wiar iirarinon.

11 Ne ni lotu koor kemena-pa e wi woos mua e anim onom miira-pa opora-pa nia wuiwkin-na ni keker opap kema unu-unowa me wueka, ‘I opora kamenap wia kiripiyen, ne kamenap wia maakiyen?’ Naap me maeka. 12 Moram iir nain Ewar Eliwa-ke kema niem-ikaeya wia maakowen.” Naap wia maakek.

Maamuma mua-ke momor sira onak

13 Teeria maneka nan ikaiwkin mua oko-ke Yeesus maakek, “Oo somek mua, yo auwa iiriw efar umeya paapa maa muutitik urufiya. Naapeya yo feenap kookaliyem, nos-ke maakeya yiena auwa maa unowa nain wiar sererkap papako yo yiinok.” 14 Naap maeya maakek, “Kamenap? Yo me opora niar kakenow mua-ke, ne me maa sererkow mua-ke.” 15 Naemi unowa nain wia maakek, “Ni maa urufap! Maa kamenap nain me kookaleka. Mua eena maa unow akena wiar ikua nain, ona maa unowa nain-ke pokow eliwa me iwinon, weetak akena,” naap wia maakek.

16 Naap maemi arekin opora-ko feenap wia maakek, “Maamuma mua oko manin maa unow akena wiar ikua. 17 Naapeya wame irami ona kema-pa maek, ‘Nee, yo kamenap oninen noma? Maa enowa iparowa koor unowa aakisa ikua fain iiwawun taanomakek. 18 Yo ikoka feenap-ko oninen-yon. Koora unowa nain te-teekap, koora mane-manekiw kuainen. Naap onap neeke enowa ne maa eliwa unowa sepa wuinen. 19 Naap onap yena kemaiw mainen, yo maa saapa pepek, mokom unowa naap efar ikainon. Ne aakisa yo uuraremi maa enemi palanow manekiw ikainen.’ 20 Naeya Mua Maneka-ke maakek, ‘No momora name puukowin! No ikoka uura kuisow umeya, maa unowa nena name kema suuwap aawomaken nain nena aawinan-i?’ Naap maakek. 21 Wi mua eena wiena wiam kema suuwap maa unow akena aawemi Mua Maneka me kema suuwimik nain, wi ikoka mua nain saarik, iiwawun oraikuan.” Naap wia maakek.

Kema unu-unowa me wueka

(Matiu 6.25-34)

22 Naap maep ikok ona teeria wia maakek, “Naapeya yo nia maakiyem, ni miiwa-pa feek ikowa nain kema me samoraremi maeka, ‘I maa mauwa enimiyen, ne yiena mia maa mauwa suuwiyen?’ 23 Moram miiwa-pa ikowa sira me maa enowa ne mia suuwowa muutiw kema suuwimik. 24 Ni nepa gaaglok urufeka. Maa enowa-ko me isakimik, ne fiirimep koora-pa-ko sepa me wuimik, wi koora marew. Wi nain Mua Maneka-ke maa enowa wia urufiya. Ne ni emeria mua, ni me nepa saarik maa oram-ke, weetak. Naapeya kema unu-unowa me wueka. 25 Mua eena maa muutitik kema unu-unowa wuiya nain, lawisiw eeyarep uminon-i? Weetak. 26 Ni naap onowa me pepek, naapeya ni moram maa papako naap nain kema unu-unowa wuiman?

27 Ni kakala sira kamenap eliwariya nain urufeka, mauwowa-ko me onimik ne wiena mia suuwowa-ko me onimik, nain urufowa eliwa. Yo makena nia maakiyem, iiriw owow saria maneka Solomon maa bala wuam-ikua nain mua wiar urufap mokoka kuemik. Nain kakala-ke urufowa Solomon maa bala wiar nomakek. 28 Aria sipir wowosa ikoka naap ikainon, uurika saniwareya puukap mukuna-pa wafurikuan, maa oram-ke naep. Nain Mua Maneka-ke bala baliwep wiek. Ne ni bala baliwep me nia opawinon-i? Ni faa, naap maemi Mua Maneka baliwep me yia urufiya naeman-yon aa. 29 Naeya nia maakiyem, ni anane feenap kemaiw me ikeka, maa enowa ne eka enowa. Ne kema unu-unowa me wueka. 30 Miiw unowa mua unowa maa kookalemi sira nain kema unu-unowa naap wuimik. Ne ni sira naap me ikeka. Ni maa mauwa iiwareman nain niena Niawi iiriw niar amisarek. 31 Ni Mua Maneka pika kemena-pa wiar ikowa sira nain wiar ookeka, ne ni naap ikaiwkin miiw maa unowa fain nia wuominon.”

Iinan owowa-pa maa eliwa fiirimowa sira

(Matiu 6.19-21)

32 “Ni yena aamun teeria fain, maa muutitik kema unu-unowa me wueka. Moram niena Niawi nia kookalep nia aawep ona pika kemena-pa nia wuak. 33 Naapeya niena maa unowa sesekap, maamuma aawep mua maa marew ikemik nain wia asipeka. Sira naap onowen-na ikoka iinan owowa-pa maa me samorariya nain imenap aawowen, ne maa ele-eliwa pun neeke fiirimowen. Owowa nain maa unowa me mesenaliya, moram ikum mua marew ne kuina pun maa me samoriya. 34 Ni miiw maa unowa niar ikainon-na oko ni kema nain manekiw ikowen. Aria owow iinan maa manek akena kema suuwap-na aa, kema nain manekiw ikowen.”

Uuwow mua maa opamik nain opora-ke

(Matiu 24.42-44)

35 “Ni yo teeria-ke, ni uuwow mua sira feenap nain wiokeka, feenap, uuwow konima aep parina isimap ifaniw ikeka. Wi uuwow mua wiena saria epa oko maapora ikiweya ekapow fofa me wiar amisarep arep ikaikuan. Arep ikaiwkin ekapep koor omopora anuminon-na, ewur akena iikirap paaskomikuan. 37 Inow marew arep ikaiwkin saria ekapinon-na, wi uuwow mua teeria nain manek akena kemelikuan. Yo makena nia maakiyem, ikoka saria nain wi uuwow mua eliwa-ke wia naep ona uuwow konima aep wia pokomowap maa enowa wienakinon. 38 Ne saria nain uura epimeka tuuneya ekapinon-i e aara farem-ikaeya ekapemi wi inowa marew arep ikaiwkin wia urufinon-na, wi uuwow mua teeria nain ikoka kemelikuan.

39 Ne ni maa oko fain pun kema suuweka. Koor onom mua wi ikum mua koora wiar ekapowa ama wiar amisarinon-na koora baliwep akena urufam-ikainon. Naeya wi ekapep koora me wiar fookikuan. 40 Naeya nis pun naap akena ikeka. Mua Muuka ekapowa nain urufami ikeka, oko o ewur me ekapinon naem-ikaiwkin ekapemi oram nia soranowap-puinon.” Naap wia maakek.

Uuwow mua eliwa ne uuwow mua samora arekin opora-ke

(Matiu 24.45-51)

41 Naap maeya Pita-ke maakek, “Maneka, arekin opora nain iisow yia maen-i e mua unowiya yia maen?” 42 Naeya maakek, “Uuwow mua eliwa ne kema onaiya ikua nain ona saria-ke woos mua wuinon. Naeya uuwow mua papako baliwep wia urufami maa enowa ama pepek wienakinon. 43 Naap uuwowa baliwep faem-ikaeya ona saria nainiw ekapep naap urufinon-na mua nain kema eliwa ikainon. 44 Yo maken akena nia maakiyem, o ikoka ona saria-ke woos mua wueya maa unowa os-ke urufominon. 45 Aria oko mua nain ona kema-pa feenap mainon, ‘Yena saria ewur me ekapinon,’ naap maep uuwow mua ne emeria papako wia arufami, maa enowa ne eka kekanowa enemi momor yiawem-ikainon. 46 Aria iir oko yo saria me efar ekapinon, naap naem-ikaeya saria nain feekeriw fuuninon. Ekapemi sira naap wiar urufap samor akena arufami iirarinon. Iiraremi wi opora fienimik teeria neeke epaskun wia wuinon.

47 Ne uuwow mua ona saria kema wiar amisarek, nain o me uuwinon ne ona saria kookalowa me wiar ookinon-na ikoka yoowa iwemi samor akena arufikuan. 48 Ne uuwow mua ona saria kema me wiar amisarep, uuwowa onami samorinon-na, samor akena arufowa nain kerewa me arufikuan. Sira naap ikua, mua amisa eliwa iwemik nain ikoka uuwowa eliwa onowa-ke ikua. Ne amisa manek akena iwemik nain ikoka uuwowa manek akena nain onowa-ke ikua.”

Wi emeria mua Yeesus naep wiam fo-fookikuan

(Matiu 10.34-36)

49 “Yo miiwa-pa mukuna wafurowa naep ekapem, ewur akena manekarekak-na eliw. 50 Ne ikoka yoowa maneka aawowa nain aawinen. Yo nain kema samor ikem, ikiwep uuwowa nain iiwawun welawekam naep. 51 Ni yo pokow eliwa yia pekapomak efa naiman-i? Weetak, yo nain me ekapem. Makena nia maakiyem, yo emeria mua wia fo-fookap ononer wia wuowa nain ekapem. 52 Ikoka sira feenap imenarinon, teeria kuisow wiam ikur koora kuisow-pa ikemik nain ikoka wiam fo-fookap teeria erup arikuan. Wiam arow-ke wiam erup nain wia iiwuarikuan, ne wiam erup nain-ke epaskun arep wiam arow nain wia iiwuarikuan. 53 Wiawi-ke ona muuka iiwuarinon, ne muuka pun naap. Onak-ke wiipa iiwuarinon, ne wiipa pun naap. Ne onak-ke ona wamekua iiwuarinon ne wamekua pun kirep o iiwuarinon.” Opora naap wia maakek.

Maa sira kamenap imenariya nain amisarowa

(Matiu 16.2-3)

54 Ne teeria maneka nain wia maakek, “Ni ipia kokoma ama orow kame-pa urufap maiman, ‘Ipia ikoka orainon.’ Ne makena, ipia orainon. 55 Ne gomi maneka ama urupow epa-pa wuuneya maiman, ‘Ikoka ama kaaninon.’ Ne makena naap ariya. 56 Aa, ni maa momor wiisa oniman! Ni aapereka maa urufap makena maiman. Ne aakisa yo maa unowa imenam nain moram mokokiya ookowa nain me amisareman?”

Mua opora-pa nefa wueya kakenowa ewurare

(Matiu 5.25-26)

57 “Ni moram nieniw kema me suuwiman, sira kain-ke eliwa? 58 Mua oko opora-pa nefa wueya-na aria niam erup opora kakenowa ikiwemi era-pa neeke opora umukeka. Oko os-ke medistret wiar ikiwemi opora nefa nomakeya ami mua wapena-pa nefa wuiwkin koora ekinan. 59 Yo makena maiyem, no koora-pa ikon nain ewur me weeserinan. Nena pina onan nain iiwawun name sesenarep-na eliw orainan.” Naap wia maakek.

Copyright information for `MHL