Luke 13

Mua kema me kirinon-na ikoka mesenalinon

Iir nain mua papako ekapep Yeesus maakemik, wi Galili mua papako tempel koora-pa Mua Maneka patiram-ikaiwkin Pailat-ke ami mua wia sesekeya iwap wia ifakimemik. Wia ifakimiwkin wiena aka orop patirowa onamik aka nain onaiya epaskun arek. Naap maakiwkin wia maakek, “Ni naap wia maiman-i, wi Galili wia ifakimiwkin umemik nain pina mua akena-ke, Galili mua papako pina wiar nomakemik, naapeya onoma nan pina aawep umemik, ni naap wia maiman-i? Yo makena nia maakiyem, weetak akena! Ni kema me kirowen-na ikoka nis pun mesenalowen. Iiriw wi mua ten kuisow ikur okaiwi-pa arow, Siloam koor maala-ke tenemi wia ifemakeya umemik. Ni kamenap wia maiman, wi pina-ke wi Yerusalem mua papako wiar nomakek-i? Yo makena nia maakiyem, weetak akena! Ni kema me kirowen-na, nis pun ikoka mesenalowen,” naap wia maakek.

Nomokowa me makenariya nain arekin opora-ke

Ne aria arekin opora oko wia maakek, “Mua oko nomokowa fik kuisow ona wain piita-pa upok. Iir oko makena-ko aawep eniminen naep ekapep urufak-na makena marew. Naapeya ona uuwow mua maakek, ‘Yo nomokowa fain makena aawinen naep ekapem nain makena weetak, mokoma arow arek. Naapeya ware. Miiwa afila oram maneka wesusiya.’ Naeya uuwow mua-ke maakek, ‘Saria, mokoma fain naap ikaeya, ikoka onoma-pa miiwa arufap maa ifi-ifa wuamkun miiwa afila iwinon. Mokoma oko-pa makenarinon-yon. Weetakeya-na eliw warinan.’” Naap wia maakek.

Yeesus Sabat fofa-pa emeria oko saliwak

10 Yeesus Sabat fofa-pa lotu koora ikiwep opora wia maakem-ikua. 11 Iir nain emeria-ko nan ikua. Emeria nain mokoma ten kuisow ikur okaiwi-pa arow naap sawur-ke napuma iwiwkin ikua. Napuma aawep ineka kuep soomarem-ikua. 12 Aria Yeesus-ke urufap farek. Ekapeya maakek, “Oo aite, no napuma nefar iirarem, aakisa eliw ikainan.” 13 Maakemi wapena mia iinan-pa wiar wueya sariarep kaken iimarek. Sariarep Mua Maneka unuma fakerak. 14 Ne aria lotu koora woos mua nain naap urufap kema bagiwirak, moram Sabat fofa-pa me uuwowa nain emeria nain saliwak. Naapeya emeria mua wia maakek, “Uuwow fofa ikur okaiwi kuisow naap. Mua oko napuma nia saliwinok naep-na uuwow fofa-pa ekapeka, Sabat fofa-pa me ekapeka.” 15 Naap maeya Yeesus-ke maakek, “Ni wadol mua akena-ke! Ni unowiya Sabat-pa niena bulmakau ne donki wia kemalep pika wiar ikiwep omopora teekap, wia aawep eka wienakowa me wia pikiwiman-i? 16 Ne Abraham nembesir fain, wiisak, mokoma ten kuisow ikur okaiwi-pa arow Satan-ke naap kaikap-pueya ikua. Ne ni kamenap maiman? Sabat fofa-pa me saliwinen-i?” 17 Naap maeya ona iiwua unowa emina ururep opora marewarep maara mikap ikemik. Emeria mua unowa o maa eliw akena oneya wiar urufap kemelamik.

Mastet makena ne yis arekin opora

(Matiu 13.31-32, Mak 4.30-32)

18 Aria naap ikok nainiw maek, “Mua Maneka pika kemena wiar ekiwkin manekariya nain maa mauwa maemi ileninen? 19 Nain feenap saarik, mastet makena saarik, gelemuta akena. Mua oko nomokowa mastet maken mumua aawep manina-pa isakek. Ne arimemi nomokow maneka arek. Ne nepa-ke birinep ekapep ekeka-pa nan unowa aawemik,” naap maek.

Yis arekin opora

(Matiu 13.33)

20 Ne kiiriw wia maakek, “Mua Maneka pika kemena wiar ekiwkin teeria manekariya nain maa mauwa maemi ileninen? 21 Nain feenap saarik, emeria oko-ke yis aawep inasin emera onaiya kiripap nan wuap-pueya iiwawun arimiya.”

Omopora gelemuta arekin opora

(Matiu 7.13-14 ne 7.21-23)

22 Aria naap ikok Yeesus Yerusalem ikiwem-ikok owow unowa opor eliwa wia maak-ikim-ikua. Naap onam-ikaeya mua oko-ke maakek, “Maneka, ikoka Mua Maneka-ke mua papako muutiw wia aawinon-i?” Ne wia maakek, 24 “Ni kekan-afurap, omopora siina-pa ikiweka. Yo nia maakiyem, mua unowa ikiwowa akimimik nain, wi me pepek. 25 Ikoka koor onoma-ke iikirap omopora upinon. Upep-pueya ni owaruma-pa iimarep omopora arufami farowen, ‘Oo Maneka, i omopora-ko yia paaskoma!’ Naap maakiwkin nia iiraremi mainon, ‘Yo me nia amisarem, ni naareke?’ 26 Ne ni nainiw maakowen, ‘I iiriw no nefamiya maa enem-ikemik, ne no yiena owow era-pa yiar iimarep opora yia maakem-ikon.’ 27 Ne nia maakinon, ‘Yo me nia amisarem, ni kaakew mua-ke. Ni pina mua-ke ikeman. Ni ikiweka.’ Naap nia maakinon. 28 Ne ikoka Abraham, Aisak, Yekop ne wi profet unowa Mua Maneka pika kemena-pa wiar ikaiwkin wia urufowen, ne ni nia iirariwkin sisina-pa ikowen. Iir neeke samor akena omemi sirirowa aawemi enek muuna geegenem-ikowen. 29 Ne miiw maneka fain mua unowa ama urupowa ikip ama orowa kame, ne epa kaaneke ikemik nain ekapep Mua Maneka pika kemena-pa wiar pokap maa enimikuan. 30 Ae, aakisa wi mua papako murarimik nain ikoka miimowa-pa ikaikuan, ne wi mua papako miimowa-pa ikemik nain ikoka murarow akena-pa ikaikuan.” Naap wia maakek.

Yeesus owow saria Erot ne Yerusalem mua wia maek

(Matiu 23.37-39)

31 Iir nain wi Farisi papako-ke ekapep Yeesus maakemik, “Erot-ke nefa ifakiminen naep oniya, naapeya no owowa fain piipuap epa oko ikiwe.” 32 Maakiwkin wia maakek, “Ni ikiwep mua oram maneka nain feenap maakeka, ‘Epa lawisiw maala yo sawur wia iiraremi mua napuma pun wia saliwinen, ne iir oko-pa yo mauwowa welawinen.’ 33 Epa lawisiw maala yo soomarem-miok Yerusalem-pa fuuninen. Moram Mua Maneka profet owow oko-pa me uminok. Weetak. Yerusalem-pa ikaeya ifakimiwkin uminok. 34 Oo ni Yerusalem, emawa, nis-ke anane wi profet wia ifakimiman. Ne Mua Maneka mua wia sesekeya ni niar ekapimik nain pun nomon ika wiariman. Emawa, ni emeria mua yena kemena-pa nia wuap nia kakaltekam oo. Aara eena ona muuka eewua tepak-pa wia wuiya, yo naap nia onekam naep onam-na niena miatineman. 35 Aa, Mua Maneka iiriw nia piipuap niisow nia wuak. Yo nia maakiyem, ikoka yo me efa urufowen. Ne wiimar feenap maemi-na efa urufowen, ‘Yiena Maneka, Mua Maneka unuma-pa ekapok nain unuma purupiyen.’”

Copyright information for `MHL