Luke 15

Sipsip mesenalek nain arekin opora-ke

(Matiu 18.12-14)

Aria wi takis aawow mua ne wi pina mua papako pun Yeesus opora wiar miimu naep ekapemik. Wi Farisi ne wi sira amis mua onaiya naap urufap o tuunami maemik, “Mua fain anane wi pina mua womar wia opami wiamiya maa enimiya.” Naap maiwkin Yeesus-ke arekin opora feenap wiek, “Mua oko sipsip andet kuisow wiar ikok kuisow wiar mesenalinon. Aria sipsip papako epa oko-pa wia wuap kuisow mesenalek nain me ikiwep akupam-miawinon-i? Akup-ikiwep imeninon-na kemelami akuwisa-pa wuap ekapinon. Ekapep owowa kererep ona womar ne mua papako wia fareya ekapiwkin wia maakinon, ‘Arika, ni yena efamiya kemeleka! Yo sipsip efar mesenalek nain kiiriw imenam.’ Naapeya nia maakiyem, owow iinan ensel, wi mua unowa kakeniw ikemik nain wia kemelimik, ne pina mua kuisow kema kirinon-na wi ensel mua nain maneka akena kemelikuan.”

Maamuma mesenalek nain arekin opora-ke

Ne arekin opora oko feenap wia iromak, “Emeria-ko maamuma ten kuisow tewerimep-puak, ne naap ikok kuisow wiar mesenalinon-na kamenap oninon? Kema wiisarep arua isimap koora epa fonami baliwep akena akupinon. Naap onap imenap-na kema teninon. Imenap ona womar ne emeria papako wia farep wia maakinon, ‘Ni ekapep yo efamiya kemeleka. Yo maamuma efar mesenaleya akupap imenam!’ 10 Ne naap akena, pina mua-ko kema kirinon-na Mua Maneka ensel unowa o kemelikuan.”

Wiawi ona muuka wiam erup nain arekin opora-ke

11 Ne nainiw maek, “Mua oko muuka erup. 12 Iir oko-pa muuk kapa-ke wiawi maakek, ‘Auwa-na, no maa unowa i paapa ikos ikoka kuisow yia sererkoma, ne yo maa unowa ikoka kuisow aawekam naep.’ Naeya wiawi-ke maa unowa sererkap wiek. 13 Aria muuk kapa nain ona maa unowa aawep epasia ikiwep owow oko-pa ikua. Nan ikok wame irami ne momor onami maamuma welawak. 14 Maamuma welawap ikaeya owowa nain weniw maneka kererek. Naap ikok wuailek. 15 Wuailep mua oko wiar ikiwep mauwinen naeya eliw naakemi waaya urufowa-pa wuak. 16 Ne senam akena wuailep bin kanima waaya wienakimik nain enimekam naep maek-na me onakemik.

17 Ne naap ikok kema suuwap maek, ‘Yena auwa uuwow mua unowa maa enowa senam akena wiar ikua. Ne yo fan ikok samor akena wuailiyem. Lawisiw feek ikainen-na uminen. 18 Naapeya yo kirep auwa wiar ikiwep feenap maakinen, “Oo auwa, yo pina nefa onam nain Mua Maneka sira wiar puukam. 19 Aakisa muuka me efa nae, moram yo me mua eliwa-ke. Naapeya uuwow mua efa wue.” ’ 20 Kema naap wuap ona wiawi wiar ikiwok. Ekapep fuunem-ikaeya wiawi-ke epasia-pa urufap kemalep karuwiw ikiwep opa-wuakek. 21 Naap oneya muuka-ke maakek, ‘Oo auwa, yo pina nefa onam nain Mua Maneka sira wiar puukam. Aakisa yena muuka me efa nae, moram yo me mua eliwa-ke.’ 22 Ne wiawi-ke uuwow mua wia fareya ekapiwkin wia maakek, ‘Ikip yena mia suuwowa eliw akena nain aawep pekapep suuwomap wapena ring suuwomaka ne meren suuwowa wuomaka. 23 Ne bulmakau muuka mia manekiw urufap ifakimep paep uupiwkin maa enow maneka oniyen. 24 Moram yo muuka fain iiriw umok naem-na eliw ikua. Mesenalek naem-na kiiriw imenarek.’

Aria wi enowa onam-ikaiwkin muuk iperowa manina-pa ikok owowa ekapok. Ekapep koora mamaiyarem-ikok wi ufem-ikaiwkin wia miimak.
26 Ne takira oko farep nokarek, ‘Wi maa mauwa onam-ikaimik?’ 27 Naeya maakek, ‘Nena niamun kiiriw ekapeya niawi-ke maa enowa onomami bulmakau muuka kuisow maeya ifakimemik. Moram muuka nain maera-pa me arek, o kiiriw ekapok.’ 28 Aria muuk iperowa naap miimap kema bagiwirap koor kemena me ikiwok. Naap ikaeya wiawi-ke orop kekelka maakek, ‘Aria ekapeya koora ikiwu.’ 29 Naeya maakek, ‘Yo mokom unowa anane nena uuwow mua saarik oram maneka uuwam-ikem. Yo emina-ko me kekanem-ikem. Ne no meme muuka kuisow akena-ko me enaken, yena yomar unowiya enemi kemelekamik. Weetak akena. 30 Nena muuka nain nena maa unowa iiriw nefar aawep wi emeria-pa weeserowap kiiriw ekapeya no kemalep maa enow maneka onoman.’ 31 Naeya wiawi-ke maakek, ‘Oo muuka, i yiam erup anane maneka fan ikaimik. Yo maa unowa fain nena maa unowa-ke. 32 Ne aakisa i unowiya maa enowa onami kemelikua, moram niamun fain iiriw umok naem-na eliw ikua. Mesenalek naem-na kiiriw imenarek.’”

Copyright information for `MHL