Luke 19

Sakius Yeesus opora wiar opak

Aria Yeesus Yeriko kererep owow goneiw ikiwem-ikua. Mua-ko nan ikua, unuma Sakius, mua nain wi takis aawow woos mua-ke. O maamuma unow akena wiar ikua. Yeesus mua kamenap nain-ke naep baliwep urufekam naep onam-ikua-na me pepek. Moram o mua iiwa-ke, ne pun yakeyak maneka Yeesus warikap ikemik. O urufekam naep miimep karuwiw ikiwep, nomokowa sama irak, Yeesus ikoka era feek ekapinon naek. Yeesus ikiwemi Sakius ikua nan kererep nomokowa iinan-pa ikaeya urufap maakek, “Oo Sakius, no orop-pue. Yo ikoka no koora-pa nefar ikainen.” Naeya kemelami ewursow orop Yeesus aawep ona koora pikiwok. Ne wi unowa nain naap urufap muninemi maemik, “Moram ikiwep pina mua koora-pa wiar ikua?” Ne koora-pa ikok Sakius-ke Yeesus maakek, “Maneka, yo feenap oninen. Yena maa unowa fookap okaiwi akena wi mua oorpowa, oram ikemik nain wiinen. Ne mua oko maamuma wia peeskimep wiar aawem nain, ikoka wia kiripomami osena erepam kiiriw iinan-pa wuominen.” Naeya maek, “Ni koora fain teeria aakisa Mua Maneka-ke nia aawok. Moram mua fain pun Abraham nembesir-ke. 10 Mua Muuka-na wi mua mesenalemik nain kiiriw wia imenap wia aawekam naep ekapok.”

Uuwow mua maamuma aawemik nain arekin opora-ke

(Matiu 25.14-30)

11 Wi Yeesus opora nain wiar miimap ikaiwkin arekin opor oko wia iromak. Moram o ikiwemi Yerusalem mamaiyarem-ikaeya wi kema naap maemik, Mua Maneka miiw mua pika kemena-pa wia wuowa epa ikoka kuisow ariman arinon naemik. 12 Ne arekin opora fain wia iromak, “Mua unumiya oko-ko owow epasia ikiwemkun owow saria maneka efa pepekimiwkin nainiw ekapinen, kema naap wuak. 13 Naapeya ona uuwow mua ten kuisow wia farep, gol maamuma kuisow kuisow
19.13Maamuma nain feenap, siiwa arow uuwow sesa saarik.
wiemi wia maakek, ‘Maamuma fainiw uuwowa onam-ikaiwkin yo nainiw kirep ekapinen.’

14 Aria o ikiwep ikaeya ona owow mua-ke o me kookalep mua papako wia sesekamik, ‘Ni ikiwep opora feenap wia maakeka, “I mua nain saria maneka yiar ikowa me kookalimik.” ’

15 Naap ikok mua nain owow saria maneka wuiwkin nainiw kirep ona owowa ekapok. Owowa kererep maek, ‘Yena uuwow mua iiriw maamuma wiem nain wia fareka. Yo amisarekam naep, ewar maamuma kamin kamin imenamik.’ 16 Wia fariwkin mua mokomokoka ekapok nain-ke maek, ‘Oo saria, yo maamuma yien nain-pa uuwami ewar maamuma ten kuisow imenam.’ 17 Ne saria-ke maakek, ‘Se-ek eliw oram, no uuwow mua eliwa-ke! Maa gelemuta akena nain aawep uuwowa baliwep faen. Naapeya aakisa yo woos mua nefa wuamkun owowa ten kuisow wia urufam-ike.’ 18 Ne oko-ke ekapemi maakek, ‘Oo saria, yo maamuma yien nain ewar maamuma ikur imenam.’ 19 Ne saria-ke maakek, ‘No ikoka owowa ikur wia urufam-ike.’

20 Ne aria oko-ke ekapemi maek, ‘Saria, nena maamuma nain faneka. Konim tiira-pa kaikap wuap-puam. 21 Moram no mua riirinowiya nefa keker opam. Mua oko maa nos-ke wiar aawin ne maa enowa wiena isakiwkin wiar ifemakep aawin.’

22 Naeya saria-ke maakek, ‘No uuwow mua eliw marew! Nena wadol opora-pa ikoka samor aawinan. Nos-ke naap efa maen, yo mua samora-ke, mua oko maa unowa yos-ke wiar aawiyem ne pun maa enowa isakep-puiwkin yos-ke wiar ifemakiyem. Naap-i? 23 Naap nain moram maamuma nain maamuma koora-pa me wuomen? Naeya ekapemi ewar maamuma onaiya aawekam.’ 24 Maemi mua nan iimarep ikemik nain wia maakek, ‘Maamuma nain wiar aawep mua eena maamuma ten kuisow imenak nain iweka.’ 25 Ne wis-ke maakemik, ‘Saria, mua nain maamuma maneka iiriw aawok.’ 26 Naap maiwkin saria-ke wia maakek, ‘Yo nia maakiyem, wi mua maa unowa wiar ikua nain aawep uuwimik nain ikoka nainiw unow akena wiinen. Ne mua maa unowa marewa nain uuwow marew wuap-puimik nain iiwawun wiar iirarinen. 27 Ne yena iiwua unowa yo owow saria-pa ikowa efa miatinemik nain wia aawep yena mokoka-pa feeke wia ifakimurumeka,’ naap maek.” Arekin opora naap wia iromak.

Yeesus owow saria maneka sira ookami Yerusalem ikiwok

(Matiu 21.1-11, Mak 11.1-11, Yon 12.12-19)

28 Aria Yeesus opora nain wia maakep-puap ikiweya yakeyak maneka murarep ookami Yerusalem era ookamik. 29 Ikiwemi Oliw ema erekina-pa aremik. Owowa erup, Betfage ne Betani mamaiyarem-ikok ona teeria mua erup wia sesekak. 30 Ne wia maakek, “Ni owowa eefin ikiwep donki iimarow eremina-ko kaikap-puimik nain urufowen. Mua me irowa ikemik. Urufap-na ifara wasirkap pekapeka. 31 Mua oko-ko nia nokarinok-na, ‘Ni moram donki nain wasirkiman?’ Naeya maakeka, ‘I saria mauwowa wiar ikaeya aawimik.’” 32 Naeya wi ikiwep fuunep wia maakek naap onamik. 33 Donki ifara wasirkam-ikaiwkin donki wiawi-ke wia urufap wia nokaremik, “Ei, ni moram donki wasirkiman?” 34 Ne maakemik, “I saria-ke mauwowa wiar ikaeya yia sesekak.”

35 Aria donki nain aawep pekapemik. Pekapep iwemi wiena mia suuwowa papako iinan-pa ikowiwkin Yeesus iinan-pa pokap ikiwok. 36 Wi emeria mua wiena mia suuwowa era-pa ikow-ikiwiwkin o iinan-pa ikiwok. 37 Wi Oliw ema orom-ikok Yeesus maa miililina iiriw onomakek nain wiar kema suuwap Mua Maneka sira eliwa naakemi unuma fakerami mukuruniya ikiwem-ikemik,

38 “Yiena Maneka Mua Maneka unuma-pa ekapiya fain os-ke kema eliwa iwinok! Owow iinan epa eliwa akena! O unum maneka, Mua Maneka Iinan Akena!”
39 Wi Farisi papako yakeyak maneka nain wiamiya ikok Yeesus maakemik, “Somek mua, nena teeria wia kakankeya poporaruk.” 40 Ne Yeesus-ke wia maakek, “Yo nia maakiyem, wi poporarikuan-na, nomon unowa fain-ke wieniw kiriremi Mua Maneka unuma fakerikuan.”

Yeesus Yerusalem kema suuwap omok

41 Aria Yeesus ikiwemi Yerusalem mamaiyarem-ikok owowa urufap omow eka sawikami maek, 42 “Ni kema eliwa aawowa era amisarekaman-na eliw-yon. Nain aakisa wia. Maa unowa kokot ikaiya nain ni urufowa me pepek. 43 Ikoka maa-ko feenap niar imenarinon, owow oko mua-ke iiwua nia purupomami pika nia warikap niamiya irakikuan. Ni baurarowa me pepek. 44 Ikoka nia ifakimemi owow onaiya iiwawun niar samorikuan. Maa kuisow-ko me ikainon. Moram Mua Maneka nia asipowa ekapok nain ni me ilenap amisareman.”

Yeesus tempel koora ikiwok

(Matiu 21.12-17, Mak 11.15-19, Yon 2.13-22)

45 Aria Yeesus tempel pika kemena ikiwep wi mua epa nan maa sesekam-ikemik nain wia iiraremi wia maakek, “Mua Maneka opora siisimep-puamik nain maek, ‘Yo yena koora-na yo efa kema suuwap efa farowa epa-ke.’ Nain nis-ke ikum mua koora arowaman.” 47 Yeesus anane tempel koor kemena-pa ikok opora wia maakem-ikua. Naap onam-ikaeya wi pris woos mua, wi sira amis mua ne wi owow woos mua unowiya ifakimu naep aakunemik-na wia. 48 Wi era-ko me imenamik, moram emeria mua unowa Yeesus opora wiar miimowa kookalep naap ookam-miemik.

Copyright information for `MHL