Luke 2

Yeesus imenarek

(Matiu 1.18-25)

Naap ikaeya Rom saria maneka Ogastus-ke ona woos mua wia maakeya owow unowa emeria mua unuma wiar aawemik. Iiriw unuma-ko me wia aawem-ikemik. Ne Siria kame Kuirinius anim onoma ikowa-pa, emeria mua unuma wiar aawowa iir nain onoma wuamik. Ne wi unowa wiena owow onoma ikiwiwkin unuma wiar siisimemik. Aria Yosep Dewit nembesir teeria-ke, ne wi unuma wuau naep Maria ikos ikiwemik. Maria eena o pepekimep-puomamik emeria nain. Wi Nasaret owowa piipuap Yuudia kame ikiwemi ona nembesir Dewit owowa Betlehem ikiwemik. Maria urom onaiya ikok ikiwemik. Wi ikiwep owowa nan ikaiwkin Maria uroma yakiowa epa wiar mamaiyarek. Inow koora epa sesa wuap inimik nain epa taaneya wiam erup koor oko bulmakau pika-pa inemik. Nan ikok Maria uroma yakiek. Muuka muukarep konima aawep wasiep bulmakau maa enimiya ika-pa nan inawap wuak.

Aria epa ara oko-pa wi sipsip urufow mua uura epa maneka-pa sipsip urufam-ikaiwkin Mua Maneka ensel-ke wiar imenarek. Mia parina onaiya wiar imenareya urufap keker opamik. 10 Ne ensel-ke wia maakek, “Ni me keker opaka. Ni miimeka, yo opor eliwa nia pekapomiyem. Opor eliwa fain emeria mua miimap kemelikuan. 11 Feenap, aakisa fan Dewit owowa-pa emeria oko muuka muukarek. Muuka nain ikoka pina niar iirarow mua ikainon. O Krais-ke ne yiena Maneka-ke. 12 Ni ikiwemi feenap urufap amisarowen, muuka nain konimiw wasiep bulmakau maa enow ika-pa inawap wuiwkin ikua. Naap urufap-na amisareka, muuka maemik nain makena faneka.” 13 Naap maep ikaeya ensel kerew akena iinan-pa imenaremik. Ne Mua Maneka unuma fakerami maemik,

14 “Mua Maneka unuma fakeriyen. Wi mua Mua Maneka wia kemaliya nain riirinowa marew kema eliwiw ikaikuan.”
Faremi naap maemik.

15 Ne wi teeria nain wia piipuap kiiriw iinan urupemik. Urupiwkin wi sipsip urufow mua wi-wieniw aakunemi maemik, “Arika, i Betlehem ikiwep maa imenarek nain-ko urufikua, Mua Maneka ensel sesekeya yia maakek nain.” 16 Wi iikirap ipetar-ikiwemik. Ikiwep koora fuunep Maria Yosep ikos wiena muuka wameiya ikaiwkin wia urufamik. Muuka nain bulmakau maa enow ika-pa inawap wuiwkin ikua. 17 Naap urufap opora manekamik, ensel-ke opora wia maakek naap. 18 Mua unowa opora nain miimap soranep kakaemik. 19 Aria Maria pun opor unowa nain miimap ona kema-pa nain kema suuwam-ikua. 20 Ne wi sipsip urufow mua kirep ikiwemi Mua Maneka unuma fakeram-ikemik. Moram maa unowa urufamik ne miimamik nain ensel wia maakek naapiw akena imenarek.

21 Sande kuisow ikiweya muuka nain mia kanima puukomami unuma Yeesus naemik. Onak uroma marew ikaeya ensel-ke muuka unuma Yeesus iwok.

Simeon Ana ikos Yeesus tempel koora-pa urufamik

22 Yeesus onak muukarep ikok epa maneka orowa epa wiar pepek ereya, mua ikos muuka aawep Yerusalem pikiwemik. Moses sira wuak nain ookami Mua Maneka iwiyen naemik. 23 Moram Mua Maneka sira kekanowa siisimemik nain feenap,

“Muuka ookikir akena muukarimik nain Mua Maneka iweka.”
(Eksodas 13.12)

24 Wi Mua Maneka sira maek naap ookami patiru naep ibiamun onaiya ikiwemik. Sira-ke naap maek, ibiamun kia gelemuta erup-i e oko ibiamun muuka erup naap aawep patireka.

25 Aria mua oko Yerusalem-pa ikaiya, unuma Simeon, o mua kaken eliwa-ke ne Mua Maneka sira wiar ookam-ikua. Ne mua oko-ko Isrel yia aawowa nain arewap ikua. Ne Ewar Eliwa anane o wameiya ikaiya. Wameiya ikok iiriw kema-pa maakek, “Simeon no ewur me uminan, weetak. Mua Maneka Krais sesekiya nain urufap-puap uminan,” naap maakek. 27 Ne iir nain Ewar Eliwa-ke kema iweya tempel koora ikiwok. Yeesus onak wiawi sira ookami muuka sira-ko onu naep pekapiwkin 28 os-ke wiar aawep kemenimep, Mua Maneka unuma fakerami maek,

29 “Yiena Maneka, yo nena uuwow mua-ke, aakisa kema eliwa naap ikok uminen, iiriw efa maaken naap.
30 Moram yena kakeniw mokoka-pa muuka fain urufam, muuka eena ikoka yia aawinon nain.
31 Nos-ke naap onan, owow unowa emeria mua unowa urufuk naep.
32 O parina saarik, ikoka owow oko teeria unowa parina wieya amisa aawikuan, ne i Isrel teeria unum maneka yiinon.”
33 Simeon Yeesus opora naap maeya onak wiawi ikos kema unu-unowa wuamik. 34 Ne Simeon-ke ni kema eliwiw ikeka naep-puap kiiriw Maria maakek, “No miime. Mua Maneka-ke muuka fain naep pepekimok, i Isrel mua unowa o opora wiar fienimik nain wakikuan, ne mua unowa o opora wiar miimimik nain eliwa ikaikuan. O ikoka ariman ikaeya mua unowa opora wiar firekimik nain wiena kema suuwowa samora nain ariman wiar arinon. Ne no onak pun ikoka kema peelalinan.” Simeon-ke naap maakek.

36 Ne oko, Mua Maneka profet emeria oko nan ikua, unuma Ana. O Fanuel wiipa-ke, wi Aser nembesir teeria-ke. Emeria nain iiriw wiip takira ikok muewep mokoma ikur okaiwi-pa erup mua wameiya ikua. 37 Naap ikok mua wiar umeya apura ikok panek. Ne aakisa mokoma ten ikur okaiwi-pa arow ne erepam aawok. O tempel koora me piipuam-ikua. Maa enowa emi wuap anane Mua Maneka farem-ikua. Ne amirika ne uura Mua Maneka uuwowa wiar opam-ikua. 38 Iir nain os pun ekapep Mua Maneka unuma fakerami mua unowa miimuk naep muuka nain maek, wi eena Mua Maneka-ko i Yerusalem yia aawinok naep arewap ikemik nain. O muuka nain maemi opora ariman wia maakek.

39 Yosep ame Mua Maneka sira unowa nain iiwawun onomakep kiiriw kirep wiena owowa Nasaret ikiwemik, Galili kame. 40 Muuka nain arimemi kema pukep amisa eliwa aawep kekanek, ne Mua Maneka kemelowa o wiar ikaiya.

Yeesus takir eliwa ikok tempel ikiwok

41 Yeesus onak wiawi anane Pasowa maapora maneka naeya Yerusalem ikiwem-ikemik. 42 Yeesus mokoma ten kuisow erup aawok iir nain maapora epa kerereya Yerusalem feekiya ikiwemik.
2.42Wiena Yuuda sira ookami muuka mokoma ten kuisow erup weesereya maimik, wi arimemik, wiena kakeniw Mua Maneka patiruk, ne o opora ookuk. Naapeya Yeesus mokoma naap aaweya Yerusalem pikiwemik. Naapeya Yeesus-ke maek, “Yo yena Auwa koora-pa ikowa-ke.”
43 Ne maapora nain weesereya kiiriw kiremik, wiena owowa ekapu naep. Ne muuka Yerusalem-pa nan ikua nain me amisaremik. 44 Wiam erup kema feenap wuamik, iiriw emeria mua papako wiokak, naap naemik. Ekapem-ikok kema suuwap muuka akupamik. Wiena samapora ne owow epaskun wiamiya-ko urufu naemik-na weetak. 45 Me imenamik. Ne kiiriw kirep akupami Yerusalem ekapemik. 46 Akupam-ikok fofa arow-pa o tempel koora-pa ikaeya urufamik. Somek mua unowa gone-pa wiar pokap ikok opora wiar miimami wia nokarem-ikua. 47 Mua unowa opora wiar miimam-ikemik, ne amisa pun ne opora wia kiripam-ikomak nain naap urufap kakaemi eneka teekamik. 48 Aria wiam erup imenap soranep onak-ke maakek, “Aa muuka, no moram naap yia onan? I niawi ikos kema samorarep no nefa akupam-miawemik.” 49 Naeya wia maakek, “Ni moram efa akupiman? Yo yena Auwa koora-pa feeke wiar ikowa-ke, ni nain me amisareman-i?” Naap wia maakek. 50 Ne wiam erup opora nain kemena me aawemik. 51 Aria o onak wiawi wiokap Nasaret ikiwemik. Ne anane onak wiawi opora wiokam-ikua. Ne ona onak opor unowa nain kema-pa wuap naap ikua. 52 Naap ikok Yeesus arimep amisa eliw akena aawok. Mua Maneka ne mua unowa pun o manek akena kookalemik.

Copyright information for `MHL