Luke 3

Yon Baptais opora ariman wuak

(Matiu 3.1-12, Mak 1.2-8, Yon 1.19-28)

Rom owow saria maneka Siisar Taiberius mokoma ten kuisow ikur owow saria arek. Ne iir nain Sekaraiya muuka Yon ikiwep epa asia nomon manekiw nan ikua nain Mua Maneka-ke kema iwok. Iir nain Yuudia anim onom maneka Pontius Pailat-ke ikua. Ne Erot o tepak-pa ikok Galili kame urufam-ikua, ne ona wiamun Filip-ke Ituria ne Trakonitis urufam-ikua, ne Lisanias-ke Abilene kame urufam-ikua. Iir nain Aanas Kaiafas ikos pris woos mua ikemik. Aria, Mua Maneka-ke Yon kema iweya Yodan eka pona owow unowa nain ikiwok. Ikiwep feenap wia maakem-ikua, “Ni unowiya kema kirep pina wasirkiwkin-na nia yasuwamkun Mua Maneka-ke pina niar iirarinon.” Sira naap onak nain iiriwiw profet Aisaiya-ke opora maeya wiar siisimiwkin ikua,

“Epa asia nomon manekiw neeke, mua oko-ke feenap farem-ikainon, ‘Ni yiena Maneka era eepomami miiw muu-muuna ikomakek nain kakenomaka.
Era kokor unowa nain soopiwkin ikainok, ema mane-maneka, gelemutumut pun fo-fookiwkin orainok. Era meka-meka ikomakek nain kakenurumeka ne nomona era-pa ikomakek nain iirareka.
Naap oniwkin Mua Maneka era yia sererkomiya nain unowiya urufikuan.’”
(Aisaiya 40.3-5)

Naap maek.

Emeria mua unowa Yon wiar ekapemik, yia yasuwinok naep. Ekapiwkin wia maakek, “Ni teeria faa, ifa upowa-ke. Mua naareke nia maakiwkin yo efar ekapeman? Mua Maneka ikoka miiw mua yiena sira samora yia kiripomiya nain bauraru naep naiman-i? Ni sira eliwa oniwkin niar urufap maikuan, makena, ni kema kireman. Nieniw feenap me niam maeka, ‘Abraham yiena nembesir iperowa-ke, naapeya Mua Maneka yia aawinon.’ Yo makena nia maakiyem, Mua Maneka eliw nia iirarep nomona fain maakeya mua puukami Abraham wiimasip teeria wiar arikuan. Aria burir iiriw nomokow onoma-pa wuap-puamik. Nomokowa kain-ke oresa wuiya nain, ikoka waromakep mukuna-pa wafufurikuan.” 10 Naap maeya mua unowa-ke nokaremik, “I kamenap oniyen?” 11 Ne wia maakek, “Mua mia suuwowa erup wiar ikua nain mua oko marewa nain iwinok. Mua maa enowa wiar ikua nain pun naapiw oninok,” naap wia maakek. 12 Ne takis aawow mua, wis pun Yon yia yasuwinok naep wiar ekapep nokaremik, “Somek mua, i kamenap oniyen?” 13 Ne wia maakek, “Maamuma wiar aawiman nain nia pepekimomamik naap kakeniw wiar aaweka, unow akena me wiar aaweka,” naap wia maakek. 14 Ne ami mua papako pun nokaremik, “Ne i kamenap oniyen?” Ne wia maakek, “Ni mua wia samorami maamuma me wiar aaweka. Ne wia wadolalowap opora-pa me wia wueka. Niena uuwow sesa kakeniw aawiman nain naapiw ikeka,” naap wia maakek.

15 Ne wi Krais arewap ikemik nain wiena kema-pa maem-ikemik, “Mua fain Krais-ki e weetak?” 16 Ne Yon-ke wia maakek, “Yo eka-pa nia yasuwiyem. Mua oko-ko ikoka ekapinon, o kekanowa-ke yo kekanowa efar nomakek. Yo mua meta marew akeniya o taar teekow mua murarow akena-pa wiar ikem. Os-ke ikoka Ewar Eliwa mukun onaiya nia sesekomaya kekanowa aawowen. 17 O wapena sawol opap, wit makena sowa bilik ikua nain baliwep rookasep epa saliwinon. Makena aawep koora-pa sepa wuinon, ne sowa muutitik mukuna me umiya neeke wafureya awem-ikainon.” Naap maek. 18 Ne opora papako pun wia wafuromami Mua Maneka opor eliwa unowa wia maakek.

19 Aria owow saria maneka Erot-ke pina samora unowa onam-ikua. Ne pina oko ona weepe emeria Erodias wiar aaweya Yon-ke amukarek. 20 Sira samora muuta nain amukareya oko feenap onak, Yon me efa amukarinok naep opap koora-pa wuak.

Yon Yeesus eka-pa yasuwak

(Matiu 3.13-17, Mak 1.9-11)

21 Mokomokoka Yon koora me ekowa ikok emeria mua unowa wia yasuwami Yeesus pun yasuwak. Ne Yeesus-ke Mua Maneka farem-ikaeya, iinan aapereka-ke aakiareya 22 Ewar Eliwa-ke o wiar orom-ikaeya nepa ibiamun saarik urufamik. Ne iinan-pa iwakara-ko feenap maek, “No yena muuka-ke, yena kema muneka-ke. Yo manek akena nefa kookaliyem.”

Yeesus nembesir unowa wiena unuma feenap

(Matiu 1.1-17)

23 Iir nain Yeesus mokoma ten arow naap aawep ikok ona mauwowa onoma wuak. Aria emeria mua unowa feenap maemik, “O Yosep muuka-ke”.

Yosep Eeli muuka-ke.
24 Eeli Matat muuka-ke,
Matat Liwai muuka-ke, Liwai Melki muuka-ke,
Melki Yanai muuka-ke ne Yanai Yosep muuka-ke.
25 Yosep Matatias muuka-ke, Matatias Amos muuka-ke,
Amos Nahum muuka-ke, Nahum Esli muuka-ke,
ne Esli Nagai muuka-ke.
26 Nagai Mat muuka-ke,
Mat Matatias muuka-ke, Matatias Semen muuka-ke,
Semen Yosek muuka-ke ne Yosek Yoda muuka-ke.
27 Yoda Yoanan muuka-ke, Yoanan Resa muuka-ke,
Resa Serubabel muuka-ke, Serubabel Sealtiel muuka-ke
ne Sealtiel Neri muuka-ke.
28 Neri Melki muuka-ke,
Melki Adi muuka-ke, Adi Kosam muuka-ke,
Kosam Elmadam muuka-ke ne Elmadam Er muuka-ke.
29 Er Yosua muuka-ke, Yosua Elieser muuka-ke,
Elieser Yorim muuka-ke, Yorim Matat muuka-ke,
ne Matat Liwai muuka-ke.
30 Liwai Simeon muuka-ke,
Simeon Yuuda muuka-ke, Yuuda Yosep muuka-ke,
Yosep Yonam muuka-ke ne Yonam Eliakim muuka-ke.
31 Eliakim Melea muuka-ke, Melea Matata muuka-ke,
Matata Natan muuka-ke ne Natan Dewit muuka-ke,
32 Dewit Yesi muuka-ke, Yesi Obet muuka-ke,
Obet Boas muuka-ke, Boas Salmon muuka-ke
ne Salmon Nason muuka-ke.
33 Nason Aminadap muuka-ke,
Aminadap Atmin muuka-ke, Atmin Arni muuka-ke,
Arni Eesron muuka-ke, Eesron Peres muuka-ke,
Peres Yuuda muuka-ke.
34 Yuuda Yekop muuka-ke,
Yekop Aisak muuka-ke, ne Aisak Abraham muuka-ke,
Abraham Tera muuka-ke ne Tera Nahor muuka-ke.
35 Nahor Seruk muuka-ke, Seruk Reu muuka-ke,
Reu Pelek muuka-ke, Pelek Eber muuka-ke
ne Eber Sela muuka-ke.
36 Sela Kainan muuka-ke,
Kainan Apaksat muuka-ke, Apaksat Siem muuka-ke,
Siem Noa muuka-ke ne Noa Lamek muuka-ke.
37 Lamek Metusela muuka-ke, Metusela Enok muuka-ke,
Enok Yaret muuka-ke, Yaret Mahalalel muuka-ke
ne Mahalalel Kenan muuka-ke.
38 Kenan Enos muuka-ke,
Enos Set muuka-ke, Set Adam muuka-ke
ne Adam Mua Maneka muuka-ke.
Copyright information for `MHL