Luke 4

Satan-ke Yeesus akimak

(Matiu 4.1-11, Mak 1.12-13)

Ewar Eliwa-ke Yeesus kekanoweya Yodan eka-pa nan ikok kiiriw kirep ikiwok. Ikiwem-ikaeya Ewar Eliwa-ke o aawep epa asia nomon manekiw nan amapikiwok. Ne fofa ten erepam epa nan ikaeya Satan-ke o akimam-ikua. Epa maala naap enow marew ikok wuailowa furewak. Wuailem-ikaeya Satan-ke ekapep maakek, “No Mua Maneka muukiya-na, nomona fain maakeya emer ikowa puukinok.” Naeya maakek, “Mua Maneka opora feenap wiar siisimiwkin ikua,

‘Maa enowa muutiw me kekanep ikaimik, weetak.’”
(Lo 8.3)

Naeya Satan-ke aawep iinan purupep owow unowa nain aapereka wilinowa saarik ewur akena ofakowami maakek, “Miiw maa unowa fain yena-ke, yena kookalep mua oko eliw iwinen. Naapeya no keema muuna mikap lotu efa oninan-na, maa unowa fain eliw niinen, naeya no mua unumiya ikainan.” Naeya maakek, “Mua Maneka opora feenap maek,

‘Mua Maneka niena Maneka-ke, o waisow keema muuna mikami lotu one. O waisow mauwoma.’”
(Lo 6.13-14)

Naap maek.
Naeya kiiriw Yeesus Yerusalem pikiwep tempel koor umua iinan akena-pa wuap maakek, “Mua Maneka opora feenap ikua,

‘Ona ensel wia maakeya baliwep nefa urufikuan,’
ne opor oko feenap,

‘Wi ensel-ke wapena-pa nefa opiwkin nomona merena me nefa mikinon.’
(Someka 91.11-12)

Naapeya no Mua Maneka muukiya-na, aria pikine.”
12 Naeya maakek, “Mua Maneka opora feenap ikua,

‘Mua Maneka-ko me akimimik.’”
(Lo 6.16)

Naap maakek.
13 Satan o akimowa sira-sira akimap-puap piipuap ikiwok, iir oko-pa nainiw akiminen naek.

Yeesus Galili-pa mauwowa onoma wuak

(Matiu 4.12-17, Mak 1.14-15)

14 Yeesus Ewar Eliwa kekanowa onaiya ikok kiiriw Galili kame kirep ikiwok. Nan ikaeya meta wiar manekamik. O nan ikok anane lotu koor unowa wiar ikiwep opor eliwa wia maakem-ikua nain emeria mua unowa unuma wiar purupemik.

Wi Nasaret-ke Yeesus mikikira iwemik

(Matiu 13.53-58, Mak 6.1-6)

16 Aria Yeesus ona owowa Nasaret ikiwok, eena iiriw takir ikok nan arimep mua arek nain. Nan ikok Sabat fofa kerereya lotu koora ikiwok, anane oniya naap. Lotu koora-pa ikok Mua Maneka opora unufinen naep iimarek. 17 Ne profet Aisaiya opora siisimok nain maifa iwiwkin wasirkap opora fain wia unufomak,

18 “Mua Maneka Ewar yo efamiya ikua. Mua Maneka ona efa sesekeya yo feenap oninen. Opor eliwa wi mua oorpowa wia maakinen, wi mua pina wia wasiep ikua nain wia wasirkominen. Wi mokoka oparep ikemik nain wia saliwinen. Wi yoowa aawem-ikaimik nain wia asipami wia wasirkominen.
19 Ne Mua Maneka epa eliwa aakisa yiar imenarek nain wia maakinen.”
(Aisaiya 61.1-2)

20 Opora nain unufap-puap maifa wasiep lotu wia asipow mua nain iwep pokak. Aria wi nan ikemik nain osiw mokakem-ikemik. 21 Ne wia maakek, “Aakisa Mua Maneka opora miimaman nain maken akena arek.” 22 Ne opor eliwa wia maakek nain kema suuwamik-na makena. Naeya maemik, “Nee, mua fain Yosep muuka-ke, ne amisa kamenap aawep opora naap aakuniya?” 23 Ne os-ke maek, “Makena, yo naap efa maemi opora fain efa maowen, ‘Ikemika kaikow mua, no mua papako wia saliwin ne nena mia pun name saliwe. No iiriw Kapeneam-pa uuwam-mien nain nefar miimamik nain aakisa nena owow onoma feeke naap oneya-ko nefar urufiyen,’ ni naap efa maowen-yon. 24 Yo maken akena nia maakiyem, Mua Maneka profet opora maiya nain ona owow onom mua opora me wiar miimimik.

25 Makena, iiriw profet Elaiya ikowa-pa mokoma arow enakiwa ipia me oraeya owow unowa weniw maneka wiar imenarek. Ne apura unowa i Isrel-pa ikemik, nain Mua Maneka-ke Elaiya me wiar sesekak, wia naapowa nain. Weetak, owow epasia Saidon kame muutiw sesekeya, Sarefat owowa wiar ikiwep apura oko asipak.

27 Ne iir oko profet Elisa ikowa-pa i Isrel mua unowa mia gigir mane-maneka onaiya ikemik nain mua kuisow-ko me saliwak, weetak. Siria owow mua Naaman waisow saliwak.” 28 Naap wia maakeya opora nain wiar miimap kema bagiwirap 29 iikirami o iiraremik. Owowa nain ema-pa ikua, naapeya opap ema kiira pikiwep okaiwi fuura-pa wafuru naep onamik. 30 Ne wia, o kirep wi gone wia fookap orok.

Yeesus mua oko saliwak

(Mak 1.21-28)

31 Orop ikiwep Galili owow oko Kapeneam naimik nan wiar kererek. Nan ikok anane Sabat fofa-pa Mua Maneka opora suule wia onam-ikua. 32 Opora nain kekanowa onaiya ikua, naapeya miimap soranemik. 33 Aria mua oko lotu koor kemena-pa nan ikua. Mua nain sawur-ke anirawap ikaeya Yeesus urufap kiriremi maek, 34 “Aa! Yeesus, Nasaret mua, no maa mauwa yia onekam naep fan ekapon? I yia samorowa naep-i? Yo nefa amisarem, no Mua Maneka-ke nefa sesekak nain-ke.” 35 Naap maeya Yeesus-ke kakankami maakek, “No poporaremi mua fain piipue!” Kakankeya sawur mua mia-pa wiar ikua nain ikiwemi anu-fieneya wakiek. Mua nain me samorak. 36 Ne wi nan ikemik nain naap urufap soranep opaimika tenep erap ikemik. Ne wi-wieniw maem-ikemik, “Nee! Opora fain kamenap nain-ke? Mua faa, kekanowa onaiya ikua, sawur wia maakeya miimap mua wia piipuap ikiwimik,” naap maemik. 37 Naapeya Yeesus meta kame nain manekareya owow unowa miimamik.

Yeesus Pita emeria onak wiar saliwak

(Matiu 8.14-15, Mak 1.29-31)

38 Aria Yeesus iikirap lotu koora-pa oromi Pita koora wiar ikiwok. Pita emeria onak mia keenep esimsa-pa inep ikua, naapeya Yeesus maakemik, emeria nain saliwinok naep. 39 Ne o ekap wameiya-pa iimarep napuma nain wiar iirareya sariarek. Sariarep ewursow iikirap maa wia uupomak.

Yeesus emeria mua unowa wia saliwak

(Matiu 8.16-17, Mak 1.32-34)

40 Ne aria, urera ama orom-ikaeya wi napum sira-sira wiar ikua nain Yeesus wiar pekapemik. Ne o wapena napum mua mia iinan-pa wiar wuami wia saliwak. 41 Naap oneya wi sawur mia-pa wiar ikemik nain pun wia piipuap ikiwemik. Ikiwemi faremik, “No Mua Maneka Muuka-ke!” Naap fariwkin wia kakankak, yo Krais-ke, nain ariman me efa mauk.

Yeesus owowa papako ikiwok

(Mak 1.35-39)

42 Uuriw akena Yeesus owowa nain piipuap epa oko mua marewa nain ikiwep nan ikua. Ne emeria mua unowa pun o akup-ikiwep imenamik. Ne o me yia piipuap ikiwinok naep asipamik. 43 Naeya wia maakek, “Yo Mua Maneka pika kemena-pa ikowa opora fain owow papako wiar ikiwep wia maakinen. Moram yo muut nain efa sesekak.” 44 Naap maep Yuudia kame wiar ikiwep lotu koor unowa-pa opora wia maakem-miek.

Copyright information for `MHL