Luke 6

Sabat-pa mauwowa emi wuowa opora-ke

(Matiu 12.1-8, Mak 2.23-28)

Iir oko Sabat fofa-pa Yeesus ona teeria unow onaiya wit manin gone erepuma-pa wiar ikiwemik. Ikiwem-ikok ona teeria-ke wit makena wiar piitap wapena-pa firirimep makena enim-ikiwem-ikemik. Naap oniwkin wi Farisi papako-ke wia maakemik, “Ei, moram Sabat fofa-pa maa-ko me onowa nain nis-ke oniman?” Ne Yeesus-ke wia maakek, “Ni naap yia maiman. Nain iiriw yiena nembesir Dewit sira onak nain Mua Maneka opora-pa siisimep-puamik. Ni nain me-ko urufaman-i? Iir nain ona teeria unowiya wuailep Mua Maneka lotu koora ikiwep emer ikowa Mua Maneka patirimik nain wiar aawep enemik. Emer ikowa nain wi pris muutiw enimimik ne mua oro-oram wia. Nain Dewit emera nain wiar aawep enemi ona teeria wienakek. Wi sira puukamik, naap-ko wia maemik-i?” Naap maemi wia maakek, “Yo Mua Muuka-ke Sabat sira unowa urufiyem.”

Yeesus Sabat-pa mua wapena samorarek nain saliwak

(Matiu 12.9-14, Mak 3.1-6)

Ne Sabat oko-pa Yeesus lotu koora ikiwep emeria mua unowa opora wia maakem-ikua. Mua oko nan ikua, wapen akena wiar samorarep paara opap ikua. Wi sira amis mua ne wi Farisi Yeesus baliwep akena wuam-ikemik, mua napuma Sabat-pa wia saliwinon-i e weetak. Moram o opora-pa wuowa era imenu naep naap onamik.
6.7Wi Yuuda Sabat fofa-pa mauwowa emi akena. Naapeya Yeesus mua nain saliwinon-na maikuan, o mauwak. Naemi opora-pa wuikuan.
Ne os-ke ikiwosa wiar amisarep mua nain maakek, “No iikirap ekap gone-pa feeke iimare.” Naap maakeya iikirap iimarek. Naeya wia maakek, “Sabat fofa-pa Mua Maneka sira kamenap yia maakek? Mua wia asipiyen-i e mua wia samoriyen? Mua wia saliwiyen-i e wia samoriyen?” 10 Naap wia nokarep wia mokak-ikiwemi mua nain maakek, “No wapena tiine.” Naeya mua nain wapena fakerap tiinep wiar sariarek. 11 Ne wi Farisi manek akena kema bagiwirap wi-wieniw aakunemik, Yeesus sira kamenap oniyen naemik.

Yeesus ona uuwow teeria ten kuisow erup wia pepekimok

(Matiu 10.1-4, Mak 3.13-19)

12 Iir oko Yeesus Mua Maneka farekam naep ema urupok. Nan ikok Mua Maneka farem-ikaeya epa wiimok. 13 Epa wiimep ama urupeya ona teeria wia fareya ekapiwkin mua ten kuisow erup wia pepekimep uuwowa wiemi aposel wia naek. 14 Wiena unuma feenap, Saimon, unuma oko Pita naek, ne ona weepe Andru, Yems ne Yon, Filip, Batolomiu, 15 Matiu, Tomas ne Alfius muuka Yems, ne Saimon, wi Selot teeria wia naemik mua nain-ke, 16 Yems muuka Yuudas, ne mua oko pun unuma Yuudas Iskariot, os-ke Yeesus wi iiwua wapena-pa wiar wuinon.

Yeesus emeria mua unowa wia saliwak

(Matiu 4.23-25, Mak 3.7-12)

17 Aria Yeesus ona teeria wiamiya ema-pa ikok epa uruma oromik. Wi orop nan ikaiwkin yakeyak maneka wiar ekapemik. Wi Yuudia kame-pa ekapemik, Yerusalem, ne saa owowa Taiya ne Saidon, kame nain pun ekapemik. O opora-ko wiar miimu naep ne napuma-ko yia saliwinok naep wiar ekapemik. 18 Ne emeria mua unowa sawur-ke wia anirawap ikemik nain wiar iiraromakek. 19 Ne o kekanowa-ke wi wiar ikiweya sariarem-ikemik, naapeya emeria mua unowa pun o tiimu naep ekam-ikemik.

Mua sira kamenap nain eliw kemelikuan?

(Matiu 5.1-12)

20 Ne Yeesus ona teeria wia urufami maek,

“Ni maa marew oram ikeman nain, ni eliw kemelowen, moram ni Mua Maneka pika kemena-pa wiar ikeman.
21 Ni aakisa wuailem-ikaiman nain eliw kemelowen, moram ikoka ni iiwawun pepek aawowen. Ne ni omem-ikaiman nain, eliw kemelowen, moram ni ikoka kemelami niirowen.
22 Ni Mua Muuka muuta nain mua unowa kema nia iririmep nia iirarikuan, murarow opora nia maikuan, ne unuma pun nia samorikuan-na ni kemeleka.
23 Iiriw wiena nembesir pun wi profet sira naap wia onam-ikemik. Naapeya nia oniwkin-na ni kemel-afureka, moram ni maa muuna maneka owow iinan-pa niar ikua, ikoka nia kiripominon.

24 Ne ni maamuma mua, ni maa urufap! Maa unowa iiriw aaweman.
25 Ne ni maa enep ipoka arimep ikeman nain, ni maa urufap! Ikoka wuailowen. Ne ni niirem-ikaiman nain, ni maa urufap! Ikoka samor akena omowen.
26 Ne ni mua unowa-ke unuma nia fakeriwkin-na ni maa urufap! Iiriw wiena nembesir-ke wi wadol profet sira naap wia onam-ikemik.”

Iiwua wia kookalowa sira

(Matiu 5.38-48)

27 “Ni mua yo opora efa miimiman nain nia maakiyem, niena iiwua wia kookaleka. Wi urom meka nia wuimik nain sira eliwa wia oneka. 28 Wi opor samora nia maakimik nain opor eliwa wieka. Ne nia samorimik nain ni Mua Maneka wia saliwinok naep fareka. 29 Mua-ko kumunkura-pa nefa arufinok-na kireya okaiwi pun nefa arufinok. Ne mua-ko konim kuruma name wakesimin nain nefar aawinok-na mia suuwowa oko pun me asipe, neek aawinok. 30 Maa unowa nefa nomariwkin-na neek wie. Ne mua maa-ko nefar aawinok-na, kiiriw kiripome naep me kakanke. 31 Ni mua oko sira eliwa yia onuk naep-na nis pun naapiw wia oneka. 32 Aria wi mua nia kookalimik nain muutiw wia kookalowen-na, Mua Maneka sira eliwa niar naep nia kiripominon-i? Weetak. Wi pina mua pun sira naap onimik. 33 Ne mua eena sira eliwa nia onimik wi nain muutiw sira eliwa wia onowen-na naareke nia mainon, ni emeria mua eliwa-ke? Wi pina mua pun sira naapiw onimik. 34 Ne ni mua oko ikoka yia kiripomuk naep maa wiowen-na naareke nia mainon, ni eliwa-ke? Wi pina mua pun, pina mua oko maa wiimik, ikoka nainiw yia kiripomikuan naep. 35 Ni sira nain me ookeka. Ni niena iiwua wia kookalep, sira eliwa wia oneka. Mua oko maa wiep-puap kema naap me wueka, yo kiripomuk me naeka. Ni kiripowa me wia maowen-na ikoka maa eliwa urufowen, ne Mua Maneka Iinan Akena nain muuka wiar ikowen. Ne os-ke nia saliwinon. Moram wi mua o sira eliwa me naakimik nain, ne wi mua samora unow onaiya wia kemaliya. 36 Niena Niawi nia kemaliya naap, sira naapiw mua wia kemaleka.”

Mua oko opora-pa me wia wueka

(Matiu 7.1-5)

37 “Ni mua oko me wia tuuneka, oko nis pun Mua Maneka-ke sira nain nia kiripominon. Ne mua oko pina me wiowen-na Mua Maneka pun pina me niinon. Mua pina nia onimik nain pina wiar iiraremi wia saliweka, ne Mua Maneka pun naap nia oninon. 38 Ni mua oko maa wieka, ne Mua Maneka-ke ni maa ane-maisap niinon. Ni kiripomowa nain maa unowa nieya kerewa niar ikainon. Mua oko wiiman naap ikoka Mua Maneka-ke pepekiw nia kiripominon.” Naap ifana wiarek.

39 Opora nain maep-puap arekin opora oko feenap wia iromak, “Mokok opa mua wiam erup eliw era wiam ofakowikuan-i? Weetak. Wi opo-opaiw ikiwemi fuura-pa wakiep iiman iwikuan. 40 Ne sumatin-ke ona somek mua iinan me irinon. Ikoka suule nomakep, ona somek mua saarik ikainon. 41 No nena niamun mokoka maa sakua gelemuta wiar ikua nain urufap iirarominen nain, ne moram nena mokoka maa kakawa nefar ikua nain me name urufin? 42 No maa kakawa mokoka-pa nefar ikua nain me kema suuwowa kamenap niamun maakinan, ‘Aamun sa, maa sakua fain iirarominen.’ No wadolalin. No kiikir akena maa kakawa nena mokoka-pa nefar ikua nain iirarep-puap maa baliwep urufami niamun maa sakua eliw iirarominan.”

Nomokowa arekin opora maek

(Matiu 7.16-20 ne 12.33-35)

43 “Nomokow eliwa makena oresa-ko me wuiya, nomokowa samora-ke makena oresa wuiya. 44 Nomokow makena urufap amisarimik, nomokowa kain-ke eliwa ne kain-ke eliw marew. Fik makena suaruwa-pa me makenariya, ne wain makena wirimowa-pa me makenariya. 45 Ne sira naapiw mua eliwa ona kema-pa opor eliwa imeniya, ne mua samora ona kema-pa opor samora imeniya. Maa unowa kema-pa ikaeya opaimika-pa kosiep oraiya.”

Mua opora miimowa

(Matiu 7.24-27)

46 “Ni moram anane ‘yiena Maneka’ efa naiman, nain yo opora me yookiman? 47 Mua-ko kemena-pa efar ekap yo opora efa miimami ookiya nain sira feenap mainen, mua oko koora eliwa kuowa saarik. Kiikir akena irauwa kuap, peperowa imenap, poka soopap-puap koora kuak. Ikoka eka luuma-ke iwami koora nain me teekinon. Moram mua nain koora baliwep akena kuak. 49 Ne mua yo opora efar miimap me yookiya nain, mua nain koor poka miiw iinan-pa iimarowak saarik. Irauwa me kuak. Naap ikok eka luuma-ke ekapemi koora nain anu-fienami te-teekeya iiwawun samorarinon.”

Copyright information for `MHL