Luke 8

Emeria papako Yeesus ookamik

Ne iir oko-pa Yeesus owow mane-maneka, owow gelemutumut unowa nain wiar ikiwep opor eliwa wia maakem-miek. Mua Maneka ona pika kemena-pa wia wuowa epa imenarek, opora nain. Ona teeria ten kuisow erup wameiya ikiwemik. Ne wi emeria papako, iiriw sawur wia iiraromak nain ne napuma wia saliwak, wi nain pun ookamik. Oko Maria, ona owowa Makdala. Iiriw Yeesus-ke sawur ikur okaiwi-pa erup mia-pa wiar ikaiwkin iirarek. Oko Yoana, ona mua Kuusa, Erot koora urufomiya, emeria oko Susana, ne emeria papako. Wi emeria nain wiena kakeniw maamuma-pa Yeesus ona teeria onaiya wia asipami wiokam-miemik.

Mua oko-ke maa makena manina-pa fi-fienak

(Matiu 13.1-9, Mak 4.1-9)

Owow unowa emeria mua unowa Yeesus wiar ekapem-ikemik. Ekapep ikaiwkin arekin opora feenap wia iromak, “Mua oko manina ikiwep maa makena fi-fien-ikiwok. Fi-fien-ikiwem-ikaeya papako era-pa oromakek nain soomaremi akup-ititamik, ne nepa-ke urufap enomakek. Papako nomon unowa-pa oromakek nain eliwarek, nain miiwa eka mareweya ififarurumok. Ne papako sipir unowa-pa oromakek nain eliwarek, nain sipira-ke arimemi muok. Ne papako miiw eliwa-pa oromakek nain eliwarep, baliwep akena makenarek nain makena ururowa marew.” Naap maep weesereya opora kerewa maek, “Ni mua ifan onaiya ikok-na opora fain kema wuepeka.”

Yeesus kema kamenap wuap arekin opora wia iromak

(Matiu 13.10-17, Mak 4.10-12)

Aria ona teeria-ke arekin opora nain kemena nokariwkin wia maakek, “Mua Maneka pika kemena-pa ikowa opora kokot ikomakek nain ni yena teeriaiya kemena fookap nia maakem. Wi papako arekin opora muutiw wia iromiyem. Naapeya opora fain makena arek, wi maa urufowa urufikuan nain me amisarikuan. Ne opora miimowa miimikuan nain kemena me aawikuan.”

Arekin opora nain kemena maek

(Matiu 13.18-23, Mak 4.13-20)

11 “Aria arekin opora nain kemena feenap. Maa makena nain Mua Maneka opora-ke. 12 Maa makena era-pa oromakek nain feenap, wi opora miimimik, nain Satan-ke ekapep opor makena kema-pa wiar ikua nain wiar iirariya, oko opora miimap opa-afuriwkin Mua Maneka-ke wia aawinon. 13 Papako nomona-pa oromakek nain feenap, mua opora miimap kookalemi kemelimik. Wi opora nain kerew akena me opimik, epa ekow marew akimowa wiar imenareya wakimik. 14 Ne maa makena sipir unowa-pa oromakek nain feenap, wi mua opora miimimik nain kema-pa wiar ikaiya. Nain miiwa fain kema suuwowa, maa unowa fiirimowa ne mia kookalowa sira-sira kema iikirap Mua Maneka opora nain kema-pa kekanowa me wiar opimik. Naeya maa makena me wiar urufimik. 15 Ne maa makena miiw eliwa-pa oromakek nain feenap, mua opora miimap kema-pa wuap baliwep akena opa-afurimik. Naap kekanep ikok anane makenarem-ikaimik.”

Mua Maneka pika kemena-pa ikowa opor amisa aawowa

(Mak 4.21-25)

16 “Parina isimap amina me pakokor-erimik, ne esimsa tepak-pa me wuimik, weetak. Mua koor kemena ikiwemi maa baliwep urufuk naep ariman wuimik. 17 Mua Maneka opora kokot ikomakek nain ikoka ariman arinon. Maa unowa kokotap-puamik nain ikoka ariman areya amisarikuan. 18 Ni opora miimap baliwep kema suuweka. Wi mua Mua Maneka opora nain kekanowa akena kema suuwimik nain ikoka amis manek akena wiinon. Ne wi mua kema baliwep me suuwimik nain amisa gelemuta wiar ikua nain os-ke iiwawun wiar iirarinon.”

Yeesus onak ne wiamun teeria wiar ekapemik

(Matiu 12.46-50, Mak 3.31-35)

19 Iir nain Yeesus wiamun teeria onak onaiya o wiar ekapemik. Nain emeria mua unow akeniya mamaiya wiar ekowa me pepek. 20 Ne papako-ke Yeesus maakemik, “Nena neene ne niamun unowa owaruma-pa ikok nefa ikumimik.” 21 Ne wia maakek, “Emeria mua unowa Mua Maneka opora wiar miimap ookimik nain, yena aite ne yena aamun unowa-ke.”

Yeesus ewar maneka maakeya puok

(Matiu 8.23-27, Mak 4.35-41)

22 Iir oko-pa Yeesus ona teeria unowiya aasa irami wia maakek, “Arika, i eka kame okaiwi ekikua.” 23 Aasa-pa ikiwem-ikaiwkin ewar asia-ke iikirak. Aasa eka taanek, lawisiw akena bulunarekak. Yeesus-na inep ikua. 24 Ne wi keker opap ikiwep ifimami maakemik, “Maneka sa, i fan mesenalimik ya.” Naap maakiwkin iikirap ewar maneka ne eka umukut onaiya wuam-ikua nain kakankeya ewar puep malin inek. 25 Ne wia maakek, “Ni iiriw yo kekanowa efar opaman nain aakisa kamenap?” Wi keker opap kema unu-unowa wuami wi-wieniw wiam maakem-ikemik, “Nee, mua fain kamenap-ke noma! Ewar eka umukut onaiya wia maakeya opora wiar miimimik.”

Yeesus sawur wia iirarek

(Matiu 8.28-34, Mak 5.1-20)

26 Aria wi ikiwemi Gerasa kame fuunemik. Epa nain Galili eka pona kame okaiwi-pa ikua. 27 Fuunep Yeesus aasa-pa orop urupem-ikaeya mua oko-ke wiar kererek. Sawur samora-ke mua nain anirawiwkin ikua. Epa maala akena saporma soomarem-miemi ona koora-pa me ikaiya, weetak. Nomon ona-pa mua wia soopimik nan ikaiya. 28 Mua nain Yeesus urufap faremi o meren onoma-pa wame wafurak. Ne Yeesus-ke sawur mua nain piipuauk naep kakankeya kerew akena faremi maek, “Yeesus, Mua Maneka Iinan Akena Muuka, yo efa samorekam naep-i? Yo me efa samore.” Wi sawur-ke mua nain anane aawep piawimik. Wi mua-ke wapena merena wiar kaikimik-na wia, sen ne ifara nain pu-puukap sawur-ke aawep epa asia nomon manekiw nan pikiwimik. 30 Ne Yeesus-ke mua nain nokarek, “No unuma kamenap?” Naeya maek, “Yo unuma Pamua.” Moram sawur unowa mia-pa wiar ikemik. 31 Sawur unowa nain epa fuura-pa me yia sesekinok naep sisewaremik. 32 Waa teeria maneka ema kiira-pa nan yeem-ikemik. Naeya wi sawur-ke Yeesus maakemik, “No eliw yia naeya i ikiwep waa teeria nain mia-pa wiar ikaiyen.” Naap maakiwkin eliw wia naek. 33 Ne sawur unowa nain orop ikiwemi waa teeria nain wia anirawiwkin karuw-iwami een fuura-pa oromi eka enep umurumemik. 34 Wi waaya nepiow mua naap urufap baurarep owow maneka ne owow gelemuta ikiwemi opora manekamik. 35 Ne owow mua unow onaiya maa nain urufu naep ikiwemik. Ikiwemik-na mua nain Yeesus meren onoma-pa wiar pokap ikaeya urufamik. Sariarep ikiwosa eliwa wiar ekapeya konima ainep pokap ikua. Wi unowa nain naap urufap kema tootonemik. 36 Yeesus sira kamenap oneya urufamik wi nain-ke wia nanaromamik. 37 Naeya wi kame nain manek akena keker opap Yeesus kame yiar piipuinok naep maakemik. Naap oniwkin kiiriw kirekam naep orop aasa irak. 38 Ne mua sariarek nain-ke omawami maakek, “Aa, yo nookinen aa.” Ne Yeesus-ke iiraremi maakek, 39 “Weetak, nena owowa ikiwe. Ikiwep Mua Maneka nefa saliwak nain owow mua wia maake.” Naeya o kirep owowa ikiwep Yeesus sira kamenap onak nain wia maakem-miek.

Yeesus Yairus wiipa wiar iikirowak ne emeria oko saliwak

(Matiu 9.18-26, Mak 5.21-43)

40 Aria Yeesus aasa aawep kame okaiwi ekak. Kerereya emeria mua unowa kemelami ekapep warikamik, moram wi o arep ikemik. 41 Naap ikaeya mua oko Yairus naimik nain-ke o wiar ekapok. O lotu koora woos mua-ke. Ekap keema muuna mikap maara mikami omawami maakek, “No eliw yo koora-ko efar ikiwinan-i?” 42 Moram wiipa kuisow akena nain wiar umekam naep oniya. Wiipa nain mokoma ten kuisow erup. Ne Yeesus ikiwem-ikaeya emeria mua unowa warikap ookamik. 43 Emeria-ko nan ikua, mokoma ten kuisow erup naap mia akaiyarem-ikua. Mua kuisow napuma nain wiar saliwowa me pepek. 44 Emeria nain Yeesus murarep ookap konim miirfa wiar tiimak. Naap oneya mia akaiyarem-ikua nain wiar weeserek. 45 Aria Yeesus-ke kiremi wia nokarek, “Nee, naareke efa tiimak?” Wi unowa nain-ke maemik, “I weetak.” Ne Pita-ke, “Maneka, emeria mua unow akena nefa warikap suuw-iraparimik.” 46 Naeya Yeesus-ke maek, “Wia, mua oko-ke efa tiimeya yo kekanowa papako efar ikiwok. Naap yame furewam.” 47 Emeria nain ona amisarek, wame pipilimowa me pepek. Naapeya karanemi ekap keema muuna miiwa-pa mikap Yeesus tiimak nain ariman wame maek. Naemi maek, “Yo naap onap ewursow sariarem.” 48 Naeya maakek, “Aite, yo kekanowa efar naep naap onan, naep sariaren. No ikiwep kema eliwiw ike.” 49 Naap aakunem-ikaeya mua oko Yairus koora-pa wiar ikaiya nain ekapep o maakek, “No wiipa umok aa. Somek mua nefar ikiwowa neek ikainok.” 50 Naap maakek nain Yeesus miimak. Ne Yairus maakek, “No kema me tootone. Yo kekanowa efar nae, ne no wiipa nefar sariarinon.” 51 Ikiwep koora wiar kereremi emeria mua unowa wia maakeya owaruma-pa ikemik. Pita, Yon, Yems ne wiipa nain onak wiawi, wiisow wia aawep koor kemena ikiwemik. 52 Emeria mua unowa omem-ikaiwkin wia maakek, “Ni me omomeka. O me umok, inep ikua.” 53 Naap wia maakeya wi unowa nain amap-niiremik, moram wiipa nain iiwawun umok naemik. 54 Ne Yeesus-ke emeria gelemuta nain wapena-pa opap maakek, “Wiipa, no iikire.” 55 Naap maakeya kukusa wiar ekapeya iikirak. Naeya wia maakek, “Maa enowa-ko onakeka.” 56 Onak wiawi naap urufap manek akena soranemik. Ne Yeesus opor kekanowa wia maakek, “Yo maa onam fain me wia maakeka.”

Copyright information for `MHL