Luke 9

Yeesus ona teeria ten kuisow erup mauwowa wiek

(Matiu 10.5-15, Mak 6.7-13)

Ne aria Yeesus ona teeria ten kuisow erup nain wia farek. Ekapiwkin sawur wia iirarowa ne napuma wia saliwowa kekanowa wiek. Kekanowa wiep wia sesekak, Mua Maneka pika kemena wiar ikowa nain wia maakemi mua napuma wia saliwowa nain. Wia sesekami wia maakek, “Ni ikiwemi wapena oram akena ikiweka. Niena kuuma, raapa, enowa ne maamuma pun me aawep feekiya ikiweka. Mia suuwowa erup me aaweka, kuisow muuta. Owowa kererep koora oko ikiwep-na koora kuisow neekeriw inem-ikeka. Iir oko nainiw owow oko ikiweka. Ne owow oko me nia aawiwkin-na aria owowa nain piipuami sira wia ofakowowa epak kepur foma tukunep-puap ikiweka.” Naap wia maakep wia sesekeya, owow unowa ikiwep Mua Maneka opor eliwa ariman wiar wuami mua napuma wia saliwam-miemik.

Erot Yeesus opora miimak

(Matiu 14.1-2, Mak 6.14-16)

Aria owow saria maneka Erot, Yeesus maa unowa onomakek nain opora miimap kema unu-unowa wuak. Moram mua papako-ke maemik, “Yon umok nain iikirak.” Ne papako-ke maemik, “Profet Elaiya-ke ekapok.” Ne papako-ke maemik, “Weetak, iiriw profet nain-ke umep ikok iikirak.” Naeya Erot-ke maek, “Sa, Yon-na imakuna iiriw wiar puukamik aa. Ne mua opora sira feenap wiar miimiyem nain naareke?” Naap maep Yeesus urufekam naep maem-ikua.

Yeesus mua unow akena maa wienakek

(Matiu 14.13-21, Mak 6.30-44)

10 Aria Yeesus ona teeria wia sesekak nain uuwowa welawap kirep ekapemik. Ekapep maa mauwa onamik nain nanaremik. Ne ona teeria muutiw wia aawep wi wiisow Betsaida kame ikiwemik. 11 Ne emeria mua unowa Yeesus nan ikiwok nain miimap murarep ookamik. Wi ikip kereriwkin wia urufap eliw ekapuk naek. Naemi Mua Maneka miiw mua ona pika kemena-pa wia wuowa epa imenarek nain wia maakemi napuma pun wia saliwam-ikua. 12 Ne urerareya ona teeria-ke ekap maakemik, “Nee, epa fain owow marew, naapeya no wia sesekeya ikiwep owow papako-pa maa enowa-ko e inow epa-ko imenuk.” 13 Ne Yeesus-ke wia maakek, “Nis-ke maa wienakeka.” Ne wis-ke, “Sa, i emer ikowa ikur ne mera erup muuta, naap yiar ikua. No kamenap main, is-ke ikiwep teeria maneka fain maa enowa wia sesenaromiyen-i?” 14 Mua tausen ikur naap ikemik. Ne wia maakek, “Wia maakiwkin mua ten ikur ikur naap wiam aawep poki-ikiwuk.” 15 Aria naap wia sererkap pokowa wia suuwamik. 16 Pokiwkin Yeesus-ke emer ikowa mera onaiya aawep iinan mokakemi Mua Maneka sira eliwa naakek. Naap onap emer ikowa mera onaiya wu-wuepap ona teeria wieya wienakemik. 17 Wi enep pepek eramik. Ne maa enakiwa kiromakek nain inera ten kuisow erup-pa ipariwkin taanek.

Pita-ke Yeesus o Krais-ke naek

(Matiu 16.13-19, Mak 8.27-29)

18 Iir oko Yeesus waisow ikok Mua Maneka farem-ikua. Ne ona teeria pun wameiya ikemik. Mua Maneka farep-puap ona teeria wia nokarek, “Emeria mua unowa yo naareke efa maimik?” 19 Naeya maakemik, “Wi papako-ke no Yon Baptais-ke nefa maimik, papako no Elaiya-ke nefa maimik, ne papako-ke no iiriw eker profet oko-ke umep ikok iikirak, naap nefa maimik.” 20 Ne nainiw wia nokarek, “Ne ni, yo naareke efa maiman?” Naeya Pita-ke maek, “No Krais-ke. Mua Maneka-ke nefa sesekak nain-ke.”

Yeesus-ke umep ikok iikirinen wame maek

(Matiu 16.20-28, Mak 8.30-9.1)

21 Naeya opora nain wi mua oko me wia maakem-miaweka akena wia maakek. 22 Nain wia maakemi maek, “Yo Mua Muuka ikoka sirirowa maneka aawinen, wi owow woos mua, pris woos mua ne wi sira amis mua, wi unowiya mikikira yiikuan, ne efa ifakimiwkin uminen. Ne umep ikok fofa arow-pa iikirinen.”

23 Neemi unow onaiya wia maakek, “O mua yo yookekam naep-na, aria ona mia me wame kema suuwowa nomokow moke akuawep sirirowa aawemi yo yookinok. 24 O mua ona mia wame kema suuwap sirirowa me aawinon-na ikoka umep iiwawun mesenalinon. Ne mua yo muuta nain mia sirirowa sira-sira aawinon-na Mua Maneka wameiya-pa eliwa ikainon. 25 Makena, mua-ko miiw maa unowa iiwawun ona waisow ifemakep aawinon. Nain ona wame ekerap kamenap arinon? Maa mauwiw eliwa ikowa nain wame saliwinon? Me pepek. 26 O mua yo yookowa emina ururep yo opora efar mesaliminon-na wiimar yo Mua Muuka yena parin maneka onaiya, Auwa Maneka ne wi ensel kekanowa ne parin onaiya oromi mua nain mikikira iwinen. 27 Yo makena nia maakiyem, Mua Maneka ona kekanowa onaiya miiw mua ona pika kemena-pa wia fiirimiya nain ni aakisa fan ikeman fain mua papako me umowa ikok maa nain imenareya wiar urufowen.”

Yeesus mia sira onaiya imenarek

(Matiu 17.1-13, Mak 9.2-13)

28 Aria naap ikok sande kuisow ikiweya, Mua Maneka farekam naep Pita, Yon ne Yems, wiam arow naap wia aawep ema iinan wia pikiwok. 29 Urupep Mua Maneka farem-ikaeya ona miira sira onaiya wiar imenarek ne ona mia suuwowa mokom pauwura saarik, kia akena imenarek. 30 Naap ikaeya wi mua wiam erup Moses Elaiya ikos iinan parin onaiya imenarep wameiya aakunem-ikemik, o ikoka Yerusalem ikiwep Mua Maneka kookalowa welawomami umowa nain. 32 Pita ame-na mokoka awawep inep puemik. Aakisa fan iikiramik-na Yeesus parin onaiya ikaeya urufamik, ne pun mua wiam erup wameiya iimarep ikaiwkin wia urufamik. 33 Wiam erup Yeesus piipuap ikiwu naiwkin Pita-ke baliwep me kema suuwap maakek, “Maneka, eliw akena i fan ikemik. I feek ikok marari koora arow nia kuomiyen, oko nena, oko Moses ne oko Elaiya.” 34 Naap maem-ikaeya maa ipisia-ke oromi wia wakesimeya naap urufap kema tootonemik. 35 Naap ikok aakunowa-ko maa ipisia tepak-pa feenap maek, “Fain yena Muuka-ke, yena kookalep pepekimem. Ni opora wiar miimeka.” 36 Wi nain miimap kiremik-na Yeesus waisow muuta nan ikaeya urufamik. Ne wi ema-pa ikok oromi opora nain pipilimemik, mua oko-ko me wia maakemik.

Takira-ko sawur-ke wiar ikaeya Yeesus-ke saliwak

(Matiu 17.14-21, Mak 9.14-29)

37 Aria epa wiimeya Yeesus ame ema piipuap oraiwkin, mua yakeyak maneka o wiar ekapemik. 38 Ne mua oko-ke farek, “Oo, somek mua! Sira eliwa, epap yo muuka-ko efar urufe noma. Yo muuka kuisow muuta. 39 Sawur-ke aniraweya samor akena kirirem-miawiya. Naap onami ipiskeya miiwa-pa wakiya. Ne kara-karanemi puemi opek fafela onaiya wuiya. Samor akena oniya, ewur me piipuiya. 40 Nena teeria sawur nain iirarowa omawami wia maakem-na wi me pepek.”

41 Naap maeya wia maakek, “Ni aakis teeria fain, yo opora baliwep me efar opiman, ne ni mua unowiya ikiwos samora-ke. Yo anane niamiya ikainen-i? Ne anane nia asipam-ikainen-i? Aria, nena muuka amapepe.” 42 Muuka nain Yeesus wiar ekam-ikaeya, sawur-ke samor wiisa miiwa-pa wafureya putu-patanem-ikua. Aria sawur nain kakankami muuka nain saliwap wiawi wapena-pa wuak. 43 Iir nain wi unowa Mua Maneka kekanowa wiar urufap soranep kakaemik.

Yeesus ona umowa nainiw wame maek

(Matiu 17.22-23, Mak 9.30-32)

Aria Yeesus maa unowa onomakek nain soranep kema unu-unowa wuam-ikaiwkin ona teeria wia maakek,
44 “Yo opora nia maakiyem fain kema me irinareka! Yo Mua Muuka ikoka wi iiwua wapena-pa efa wuikuan.” 45 Naap wia maakek nain wi kema me pukep kemena me aawemik. Ne nokarowa pun keker opamik.

Mua naareke manek akena

(Matiu 18.1-5, Mak 9.33-37)

46 Ne naap ikok Yeesus teeria wi-wieniw opora wiam ipiskami mua naareke maneka yiar ikainon maem-ikemik. 47 Wi naap aakunem-ikemik nain Yeesus iiriw wiar amisarek. Naapeya takir gelemuta oko aawep ona wameiya-pa iimarowap wia maakek, “O mua yo efa kema suuwap takir gelemuta feenap nain saliwinon-na yo efa saliwiya mainen. Ne me yo yaisow, weetak, Auwa efa sesekak nain pun saliwiya nainen. Ni teeria fain mua oram akena nain-ke maneka niar ikainon.”

Mua me nia samorimik nain niena nomar-ke naeka

(Mak 9.38-40)

49 Naeya Yon-ke iikirap maek, “Maneka, mua oko no nefa unufami sawur wia iirarem-ikaeya urufamik. Mua nain me i teeria-ke, naapeya nainiw naap me oninok naep maakemik.” 50 Ne Yeesus-ke wia maakek, “Weetak, uuwowa nain me wiar puukeka. Mua me nia samoriya nain yiena teeria-ke naeka.”

Wi Samaria papako Yeesus me kookalemik

51 Aria Mua Maneka Yeesus aawep iinan purupowa epa mamaiyarek. Naapeya Yerusalem ikiwinen akena naek. Ikiwem-ikok mua papako wia sesekeya miimemik. Samaria kame owow oko nan ikua. Owowa nain ikiwep inow epa wia nokarep saliwap-puomuk naep. 53 Ne wi owow mua-ke miatinep iiraremik. Moram wi amisaremik, o Yerusalem ikiwem-ikaiya naemik. 54 Yeesus iirariwkin ona teeria mua wiam erup Yems Yon ikos naap urufap maakemik, “Maneka, no ae naeya-na i mukuna faremkun iinan-pa oromi owowa fain wia kukumakinok.” 55 Naap maiwkin kirep wia kakankami maek, “Ni yo yookiman nain sira me efar amisareman. Yo Mua Muuka, yo me wia samorowa orom, weetak, wia asipowa orom.” 56 Wia kakankap-puap owow oko ikiwemik.

Yeesus ookowa sira

(Matiu 8.19-22)

57 Aria wi ikiwem-ikok era-pa mua oko-ke Yeesus maakek, “No epa kaaneke ikiwinan-na yos pun naap nookam-ikainen.” 58 Naeya maakek, “No eliw maen, nain siow asia miiw ona-pa inimik ne nepa wiena unowa onap nan inimik. Ne yo Mua Muuka-ke inow epa marew.” 59 Naap maep-puap kiiriw mua oko maakek, “Yo yooke.” Naeya os-ke maek, “Oo Maneka, yo niokowa nain yo ikiwep owowa-pa ikok ikoka yena auwa efar umeya soopap-puap nookinen.” 60 Ne Yeesus-ke maakek, “No nain kema me wue. Wi umiwkin-na neeke wiam soopuk. No ikiwep Mua Maneka pika kemena wiar ekowa opora nain ariman wia maakem-miawe.” 61 Ne kiiriw mua oko-ke Yeesus maakek, “Oo Maneka, yo no nookowa kookaliyem, nain eliw efa naeya-na yo ikiwep yena teeria wiamiya ikok wiimar ekapinen.” 62 Naeya maek, “No uuwowa oni-ikiwemi anane mikikira mokakinan-na Mua Maneka pika kemena-pa uuwowa onowa me pepek.”

Copyright information for `MHL