Mark 10

Yeesus muewowa me puukowa maek

(Matiu 19.1-12, Luk 16.18)

Aria Yeesus Galili kame piipuap Yuuda kame naap ikiwemi Yodan eka puukap okaiwi ekak. Nan ikaeya mua teeria maneka o ookap ekapemik. Ne opor unowa wia maakek, ona anane oniya naap. Opora wia maakem-ikaeya wi Farisi-ke ekapep o akimami feenap nokaremik, “Mua ona emeria iirariya nain Moses sira wuomakek nain puukiya-i e weetak?” Ne wia maakek, “Moses iiriw sira wuomakek nain kamenap nia maakek?” Naeya maakemik, “Sira fain yia wuomak, mua ona emeria iirarekam naep-na maifa siisimep emeria nain iwep eliw iirarinok naek.”

Naeya wia maakek, “Ni emina kekanep opor onom marew nain emeria oram maneka wia iirariman. Naapeya Moses-ke sira nain wuak. Ni fain miimeka. Mua Maneka opora feenap ikua, ‘Iiriw ekera Mua Maneka-ke miiw maa unowa tawerarep emeria mua onaiya wia onak. Naapeya mua ona onak wiawi wia piipuap emeria ikos epaskun ikauk.’ Naapeya wi wiam teekap ononer me ikaimik, weetak, wiam erup ememiria ikaimik. Mua Maneka ememiria wia wuak nain wiam erup wiam teekap-puowa-ko me ikua.” Naap wia maakek.

10 Opora wia maakep-puap koora ikiweya ona teeria-ke muewow sira nain nainiw nokaremik. 11 Ne wia maakek, “O mua ona emeria iirarep emeria oko aawinon-na mua nain emeria nain ikos soma oraikuan. 12 Ne emeria pun naap, ona mua piipuap mua oko aawinon-na soma orainon.”

Yeesus takira muutitik kekanowa wiek

(Matiu 19.13-15, Luk 18.15-17)

13 Aria wi takir muutitik Yeesus wiar amapekapemik, wapena ikiwosa-pa wiar wueya kekanowa aawuk naep. Ne ona teeria-ke onak wiawi wia kakankami iiraremik. 14 Naap wia urufap kema bagiwirap wia maakek, “Takira me wia iirareka, efar ekapuk. Moram Mua Maneka pika kemena nain wi takir muutitik feenap nain-ke kemena wiar ekikuan. 15 Yo makena nia maakiyem. Ni mua takir kema saarik me ikok Mua Maneka opora me miimowen-na Mua Maneka pika kemena-pa me wiar ikowen.”

16 Opora nain wia maakep takira nain wia aawep wapena ikiwosa-pa wiar wuami kekanowa wiek.

Yeesus mua maa unowa wiar ikua nain maek

(Matiu 19.16-30, Luk 18.18-30)

17 Ne Yeesus iikirap ikim-ikaeya mua oko-ke karu-ookak. Ikip keema muuna miiwa-pa mikap maakek, “Somek mua eliwa. Yo sira kamenap onap anane Mua Maneka wameiya ikok eliwa ikainen?” 18 Naeya Yeesus-ke maakek, “No moram eliwa efa naen? Mua eliwa-ko me ikaimik. Mua Maneka waisow eliwa-ke. 19 Moses sira wuomakek nain no amisaren, feenap: mua me wia ifakime, soma me ore, maa me wiar ikumare, wadol opora me wia ife, mua wia peeskimemi maa me wiar aawe, neene niawi opora wia miime.”

20 Naeya mua nain-ke maek, “Somek mua, yo iiriw takira ikok sira nain iiwawun ookam-ikok arimep aakisa mua arem.” 21 Ne Yeesus-ke kookalep mokoka toonep urufami maakek, “Makena, nain no maa kuisow akena onowa-ke nefar ikua. No ikiwep nena maa unowa nain iiwawun sesekomake. Sesekap maamuma aawep wi mua oorpowa nain wia asipe. Naap oninan-na owow iinan-pa maa eliw akena nain nefar ikainon. Aria ekapep yo yooke.” 22 Mua nain naap miimap miikapura pain-ikiwok. Moram o maa unowa akena wiar ikua.

23 Ikiweya Yeesus-ke mokak-ikiwemi ona teeria wia maakek, “Aa emawik, wi maamuma mua Mua Maneka pika kemena wiar ekowa nain yoowa akena. Maa unowa nain-ke wia opap ikua.” 24 Ona teeria opora naap miimap soranemik. Ne nainiw wia maakek, “Makena, Mua Maneka pika kemena wiar ekowa nain yoowa akena, maa unowa wiar ikua nain-ke wia opap ikua. 25 Sira fain saarik, maa eneka kamel wuara gelemuta-pa ikiwowa nain yoowa. Ne wi maamuma mua Mua Maneka pika kemena wiar ekowa nain yoowa akena.”

26 Ona teeria opora naap miimap manek akena soranemik. Ne wi-wieniw aakunemi maemik, “Naap nain Mua Maneka mua kuisow-ko me wia aawinon-i?” 27 Naeya mokoka toonep wia urufami maek, “Mua Maneka pika kemena wiar ekowa nain mua wieniw me pepek, nain Mua Maneka-ke eliw wia aawinon. Moram o maa onowa maek nain pepek eliw oninon.”

28 Naeya Pita-ke maakek. “Aa, i yiena maa unowa piipuap no nookam-miawimik.” 29 Ne Yeesus-ke maakek, “Yo makena nia maakiyem. Wi mua yo muuta nain ne yo opora eliwa muuta nain wiena miiwa, owowa piipuami weepe, wiamun, onak wiawi ne wiena muuka, wiipa pun wia piipuamik. Wi teeria nain ikoka Mua Maneka-ke wia ane-maisomami baliwep akena wia saliwinon. 30 Ikoka onak ne weepe unowa, wiamun, ne wiipa, muuka unowa, ne miiwa ne maa unowa kerew akena wiar ikainon. Ne mua papako-ke sira samora wia onami wia samo-samorikuan. Naap ikok umep Mua Maneka wameiya-pa ikok eliwa ikaikuan. 31 Ne wi mua aakisa miimowa-pa ikemik nain ikoka murarikuan. Ne wi aakisa murarowa-pa ikemik nain miimow mua ikaikuan.”

Yeesus ona umep ikok iikirowa nain maowa arow arek

(Matiu 20.17-19, Luk 18.31-34)

32 Aria iir oko Yeesus ona teeria onaiya Yerusalem ikiwemik. O miimeya ona teeria murarep ookami kema unu-unowa arem-ikemik. Ne mua unowa wi wiokamik nain pun keker opamik. Ne os-ke ona teeria ten kuisow erup nain wia aawep kua ekap ikoka o kamenap onikuan nain wia maakemi maek, 33 “Ni miimeka. I Yerusalem urupem-ikaimik. Ikoka neeke Mua Muuka opap wi pris woos mua ne sira amis mua wapena-pa wuikuan. Wis-ke opora-pa wuami ifakimowa opora anumap owow oko mua wapena-pa wuikuan. 34 Ikoka teeria nain-ke firekami opeka warikuan. Ne samor akena sarua warep-puap ifakimiwkin uminon. Ne fofa arow-pa iikirinon.”

Yems Yon ikos saria maneka ikowa naep Yeesus maakemik

(Matiu 20.20-28)

35 Aria Sebedi muuka erup Yems, Yon ikos ikip Yeesus maakemik, “Somek mua. I maa kuisow fain kookalimik, ae yia nainan-i?” 36 Ne wia nokarek, “Ni niam erup maa mauwa kookaliman, maeka.” 37 Naeya maakemik, “I feenap kookalimik, no ikoka saria maneka arin nain i yiam erup oko-okaiwi-pa nefar pokiyen.”

38 Naap maiwkin wia maakek, “Ni maa amisarep efa nokareman-i? Yo ikoka efa samoriwkin sirirowa aawowa nain nis pun eliw aawowen-i? Yo sirirowa aawinen nain nis pun aawiyen naiman-i?” 39 Ne wiam erup-ke maemik, “Ae, i eliw aawiyen.” Naeya wia maakek, “Eliw, yo sirirowa aawiyem fain ikoka nis pun aawowen, ne yo efa samorimik nain nis pun naap nia samorikuan. 40 Nain yo oko-okaiwi efar pokowa nain me yo maa-ke. Epa nain iiriw Mua Maneka ona wia pepekimep-puomak, wi nain neeke pokikuan.” Naap maek.

41 Ne aria Yeesus ona teeria papako opora nain naap miimap wiam erup nain wia kema bagiwiramik. 42 Ne Yeesus-ke epowa wia maakeya epiwkin wia maakek, “Ni amisareman, miiw unowa wi owow oko saria-ke sira kekanow akena wia urufam-ikemik. Ne wiena iimarow mua pun maimik, wi emeria mua i tepak-pa yiar ikok opora yiar miimam-ikauk. 43 Nain ni sira naap me oneka. Ni teeria fain yo woos mua maneka arekam naep-na wame poromi taar teekow mua niar arinok. 44 Ne o mua miimowa-pa niar ikainen naep-na uuwow mua puukap ni tepak-pa niar ikainok. 45 Moram yo Mua Muuka pun naap, me ni mua-ke yo tepak-pa efar ikok mauwomuk naep ekapem, weetak. Yo nia asipekam naep ekapem. Ne umep emeria mua pina wiar iiraremi wia aawinen.”

Yeesus mua mokok opa-ko saliwak

(Matiu 20.29-34, Luk 18.35-43)

46 Aria Yeesus ona teeria wiamiya ikiwep Yeriko owowa fuunemik. Ne Yeriko piipuap yakeyak maneka wiamiya ikiwem-ikaiwkin mua mokok opa-ko nan ikua, unuma Batimias. Mua nain Timias muuka-ke, o anane era pona-pa pokap ikok maamuma wia nomarem-ikaiya. Nan pokap ikok feenap miimak, “Yeesus, Nasaret mua fan ekapiya.” Naap miimap faremi maek, “Oo, Yeesus, Dewit nembesir, yo efa kemale aa!” 48 Naeya mua unowa nain-ke kakankami maakemik, “No poporare.” Kakankamik-na wia, kerew akena farem-ikua, “Oo, Dewit nembesir, yo efa kemale aa!”

49 Yeesus ikim-ikok iimarep maek, “Mua nain fariwkin ekapinok.” Ne mua mokok opa nain faremi maakemik, “No kema me samorare, iikirap ekape. Nefa fariya.” 50 Maakiwkin ona mia suuwowa anian wuak nan wafurap pipikap iikirami ikiwok. 51 Ne Yeesus-ke nokarek, “Yo kamenap nefa asipinen?” Naeya maek, “Oo Maneka. Mokoka efar saliweya maa urufinen.” 52 Naeya maakek, “No yo kekanowa efa naeya mokoka nefar sariarek. No eliw ikiwinan.” Aria mokoka wiar sariareya maa urufap Yeesus ookak.

Copyright information for `MHL