Mark 2

Yeesus mua aka umok nain saliwak

(Matiu 9.1-8, Luk 5.17-26)

Aria fofa erup naap weesereya Yeesus nainiw Kapeneam owowa ikiwok. Ne emeria mua unowa o ekapep koor oko-pa ikua nain meta miimap ekapep koora nain takunemik. Ne koora epa wuara belemuta-ko me ikua, weetak akena. Koor kemena ne omopora iiwawun taanep siinarek. Ne Yeesus Mua Maneka opora wia maakem-ikua. Wia maakem-ikaeya mua erepam napum mua oko ika-pa wuap amapekapemik. Mua nain wapena kepura iiwawun wiar uumarek. Koora iiwawun takuneya wi Yeesus wiar pepowa me pepek. Naapeya wi koor iinan purupemik. Ne Yeesus ikua pepek nan maa muutitik iirarep wuara-pa napum mua nain ika-pa ikaeya ifariw kaikap momasia akena piipuiwkin Yeesus miir onoma-pa wiar orok. Ne Yeesus yo kekanowa efar kema suuwimik naep mua nain maakek, “Emar, no pina iiwawun nefar iirarem.”

Naeya wi sira amis mua nan pokap ikemik nain-ke wiena kemaiw feenap maem-ikemik, “Nee, moram mua fain naap maiya? O me Mua Maneka-ke, ne opora naap maiya. Mua Maneka ona waisow pina yiar iirariya. Naap aakuniya nain Mua Maneka firekiya.” Wi naap maemik nain Yeesus iiriw kema wiar amisarek. Ne naapeya wia nokarek, “Ni moram yo opora maem nain kema unu-unowa wuiman? Opora erup fain, ‘No pina nefar iirariyem’, e ‘No iikirap inow maa aawep soomare.’ Opora kain mua fain maakemkun makena urufowen? 10 Yo Mua Muuka miiwa-pa fan ikem nain pina eliw nia iirarominen. Nain ni amisareka naep feenap oniyem.”

11 Ne maemi napum mua nain maakek, “Yo nefa maakiyem, no iikirap inow maa aawep koora ikiwe.” 12 Naap maakeya wi unowa nain urufam-ikaiwkin iikirap inow maa opap soomarek. Ne wi naap urufap soranep eneka teekami Mua Maneka unuma fakerami maemik, “I iiriw sira feenap nain-ko me urufam-ikemik.”

Yeesus Liwai fareya ookak

(Matiu 9.9-13, Luk 5.27-32)

13 Aria iir oko Yeesus Galili eka saawirinowa pona-pa ikiwem-ikaeya yakeyak maneka o wiar ekapep warikamik. Ne os-ke Mua Maneka opora wia wafuromak. 14 Ne naap ikiwemi Alfius muuka Liwai urufak. Mua nain koor oko-pa takis wiar aawem-ikua. Urufap ekami maakek, “Yo yooke.” Naap maakeya iikirap ookak.

15 Wi takis aawow mua nain ne wi pina mua, wi unowiya Yeesus ookam-miemik. Iir nain Yeesus ona teeria onaiya Liwai koora wiar ikiwep nan maa enemik. 16 Wi teeria nain pun Yeesus wameiya maa enem-ikaiwkin wi Farisi ne sira amis mua-ke naap wia urufap Yeesus teeria wia nokaremik, “O moram wi takis aawow mua ne wi pina mua wiamiya maa enimiya?”

17 Naeya Yeesus-ke wia miimap feenap wia maakek, “Mua napum marewa nain ikemika kaikow mua me wiar ikiwimik. Napum mua-ke makena, wis-ke ikemika kaikow mua wiar ikiwimik. Yo me wi mua eliwa wia aawowa ekapem, weetak, wi pina mua wia aawowa ekapem.”

Maa enowa emi wuowa sira

(Matiu 9.14-17, Luk 5.33-39)

18 Aria Yon Baptais teeria ne wi Farisi teeria fofa pepekimep maa enowa emi wiam wuimik. Ne iir oko wi naap oniwkin mua papako-ke ekapep Yeesus nokaremik, “Ei, Yon teeria ne wi Farisi teeria fofa pepekimep maa enowa emi wuimik. Moram no teeria naap-ko me onimik?” 19 Naap maiwkin anian wia kaisomami maek, “Mua-ko emeria aawep enuma ikaeya ona womar wiar ekapimik nain o wameiya ikok maa enowa emi wuikuan-i e weetak? Weetak. Mua nain wiamiya ikaeya enowa emi me wuikuan. 20 Mua
2.20Mua oko emeria aawok nain arekin opora-ke, Yeesus-ke ona wame pepekimemi opora naap maek. Ona teeria wiamiya ikaeya wi kemelam-ikemik. Ikoka umeya kema samorarikuan.
nain ona umeya iir nain makena, maa enowa emi wuikuan.

21 Yo sira enuma feenap saarik, mia suuwowa awona pereneya konim enuma katiwa aawep iinan-pa wuap feekiya me warimik, weetak. Naap onikuan-na konim enuma katiwa wame mufep aaweya mia suuwowa perenep ikua nain iiwawun samorarinon.

22 Ne oko feenap, wain enuma meme kanima reenep kekaniya neeke me ototimik, weetak. Naap onikuan-na wain eka enuma awowa-ke arimep mika-suuweya meme kanima nain pukinon. Naeya wain eka nain fuemi weeserinon. Ne meme kanima nain pun samorarinon. Naapeya wain enuma, meme kanima enuma-pa ototimik.”

Sabat fofa uuwowa emi wuamik

(Matiu 12.1-8, Luk 6.1-5)

23 Aria iir oko Sabat fofa-pa Yeesus ona teeria unow onaiya wit manin gone erepuma-pa wiar ikiwemik. Ikiwem-ikok ona teeria-ke wit makena wiar piitap aawep enim-ikiwem-ikemik. 24 Naap oniwkin wi Farisi-ke Yeesus maakemik, “Ei, no urufe! I Sabat fofa-pa maa me onowa nain no teeria-ke onimik. Moram Sabat fofa sira yiar puukiman?”

25 Ne wia maakek, “Ni naap yia maiman. Nain iiriw yiena nembesir Dewit sira onak nain Mua Maneka opora-pa siisimep-puamik. Ni nain me-ko urufaman-i? Dewit iir nain Abaiyata pris woos mua ikaeya ona teeria onaiya wuailep Mua Maneka lotu koora ikiwep emer ikowa Mua Maneka patirimik nain wiar aawep enemik. Emer ikowa nain wi pris muutiw enimimik ne mua oro-oram wia. Aria Dewit emera nain wiar aawep enemi ona teeria wienakek. Wi sira puukamik, naap-ko wia maimik-i?”

27 Ne nainiw wia maakek, “Sabat fofa-na Mua Maneka-ke mua uuraruk naep fofa nain wuak, me mua samoraruk naep wuak. 28 Yo Mua Muuka-ke Sabat sira unowa urufiyem.”

Copyright information for `MHL