Mark 3

Yeesus Sabat fofa-pa mua wapena umurumok nain saliwak

(Matiu 12.9-14, Luk 6.6-11)

Aria Yeesus Sabat fofa-pa nainiw lotu koora ikiwok. Ne mua oko wapena paara opak nain pun ikiwep nan ikua. Ne wi nan ikemik nain Yeesus wuap ikemik, mua nain saliwami Sabat sira yiar puukinon-na opora-pa wuiyen, naap maemik. Naap wuap ikaiwkin Yeesus-ke mua wapena paara opak nain maakek, “No iikirap feeke eke.” Naap maakep-puap wi Farisi wia nokarek, “Sabat fofa-pa Mua Maneka sira kamenap yia maakek? Mua wia asipiyen-i e mua wia samoriyen? Mua wia saliwiyen-i e wia samoriyen?” Naap wia nokarek nain wi oram bauserap ikemik, opora-ko me kiripomamik.

Wi mua me wia kemaliwkin Yeesus kema samorar-afurak. Ne pasiriw wia mokak-ikiwemi napum mua nain maakek, “No wapena tiine.” Naap maakeya wapena fakerap tiineya wiar sariarek. Ne wi Farisi koora piipuap orop ikiwemi saria maneka Erot teeria unowiya wiam fiirimep aakunemik, Yeesus kamenap onap ifakimowa nain era akupamik.

Yakeyak maneka Yeesus wiar ekapemik

(Luk 6.17-19)

Aria Yeesus ona teeria onaiya owowa nain piipuap Galili eka saawirinowa oromik. Ne yakeyak maneka pun wi wiokamik. Yeesus maa miililina onomakek nain meta wiar miimap ekapemik. Wi papako Galili kame-pa, ne papako Yuuda owow maneka Yerusalem-pa ekapemik. Papako Idumia-pa ekapemik, papako Yodan eka kame okaiwi-pa, papako Taiya ne Saidon kame-pa ekapemik. Yakeyak manek akena, naapeya Yeesus-ke ona teeria wia maakeya aasa kuisow opap ikemik. Ikoka emeria mua takunep efa suuw-irapariwkin-na aasa orainen naek. 10 Moram o napum mua unow akena wia saliwak. Naapeya napum mua papako-ke i-ko ikip tiimap sariariyen naep wiam suuw-iraparem-ikemik.

11 Ne wi mua sawur-ke wia anirawap ikemik nain Yeesus urufap miir onoma-pa wiam wafurami faremi maem-ikemik, “No Iinan Mua Maneka Muuka-ke.” 12 Ne Yeesus-ke kekanowa wia maakek, “Yo Mua Maneka Muuka ariman me efa wueka.”

Yeesus aposel ten kuisow erup wia pepekimok

(Matiu 10.1-4, Luk 6.12-16)

13 Aria iir oko-pa Yeesus ema urupep nan ikok wi mua wia kookalek nain wia fareya wiar ekapemik. Teeria nain wi “aposel”
3.13-14Nain kemena feenap, “Wia sesekamik nain.”
wia naek. Wis-ke anane efamiya ikaikuan ne wia sesekamkun ikiwep Mua Maneka opora emeria mua wia maakikuan.
15 Ne kekanowa wiemkun wi sawur mia-pa wiar ikemik nain wiar iirarikuan, naap maek.

16 Wi mua ten kuisow erup wia pepekimok nain wiena unuma feenap: Saimon, unuma oko Pita naek, Sebedi muuka wiam erup, Yems Yon ikos, unuma Boanesis wia naek, unuma nain kemena feenap, mua paranowa-ke. Andru, Filip, Batolomiu, Matiu, Tomas, Alfius muuka Yems, Tadeus, Saimon, eena wi Rom anim onoma wia iirarinen naep onam-ikua, mua nain, ne Yuudas Iskariot, os-ke Yeesus wi iiwua wapena-pa wiar wuinon.

Yeesus sira oko, Satan sira oko

(Matiu 12.24-32, Luk 11.14-23 ne 12.10)

20 Aria Yeesus ona teeria onaiya ema-pa ikok oromi koora oko ikiwemik. Ne yakeyak maneka nainiw ookap ekapemik. Naap taaniwkin maa enowa naemik-na me pepek. 21 Ne Yeesus ona kerekera-ke opora naap miimap maemik, “O momorarek”, naapeya o aawowa ekapemik.

22 Ne wi Yerusalem sira amis mua papako ekapemik nain-ke Yeesus urufap feenap maemik, “Sawur woos mua Belsebul-ke mia wiar irak. Ne kekanowa iweya sawur wia iirariya.” 23 Ne aria Yeesus opora naap miimap wia fareya epiwkin arekin opora feenap wi iromak, “Satan wi-wieniw kamenap wiam iirarikuan? 24 Aria owow oko mua wi-wieniw irakep omanarikuan-na owowa nain kekanowa me ikaikuan. 25 Ne pun kerekera oko wi-wieniw irakikuan-na wi epaskun ikok kekanowa ikowa nain wiam sererkikuan. 26 Ne Satan pun sira naapiw, ona teeria wia samo-samorami wia sererkinon-na wi kamenap kekanep ikaikuan? Iiwawun samorarikuan. 27 Feenap saarik, mua oko mua kekanowa maa unowa wiar aawekam naep mokomokoka koora wiar ikiwep kekanowa wiar nomakep opap kaikap-puap maa unowa eliw wiar aawinon. Kekanowa me wiar nomakinon-na weetak.

28 Yo makena nia maakiyem, wi pina unowa onimik nain ne Mua Maneka opora firekimik nain wi pina wasirkikuan-na pina wiar iirarinon. 29 Ne wi Ewar Eliwa firekowa opora onikuan-na Mua Maneka-ke pina me wiar iirarinon. Weetak akena. Pina nain anane naap wiar ikainon.” 30 Yeesus Mua Maneka kekanowa-pa sawur wia iirareya wi Farisi-ke maemik, “O Satan kekanowa-pa sawur wia iirarek.” Naapeya opora nain wia maakek.

Yeesus onak ne wiamun teeria-ke o faremik

(Matiu 12.46-50, Luk 8.19-21)

31 Aria Yeesus wiamun teeria wiena onak wiamiya ekapep koor miira-pa iimarep ikok mua oko maakemik, Yeesus maakeya orainok naep. 32 Ne mua teeria maneka o warikap pokap ikemik nain-ke maakemik, “Nena neene ne niamun unowa owaruma-pa ikok no nefa ikumimik,” naakemik.

33 Naap maakiwkin feenap maek, “Naarew ame yena aite ne yo aamun unowa-ke?” Neemi wi o warikap pokap ikemik nain wia uruf-ikiwemi maek, “Ni unowa fain yena aite ne yena aamun-ke. Mua eena Mua Maneka kookalowa wiar ookimik nain yena aite, yena ekera ne yena aamun unowa-ke.”

Copyright information for `MHL