Mark 7

Yeesus wi Farisi wiena weke sira ookimik nain wia maek

(Matiu 15.1-9)

Aria iir oko-pa wi Farisi ne wi sira amis mua Yerusalem-pa ikemik nain wiam aawep Yeesus wiar ekapemik. Nan ikok Yeesus teeria wia urufamik, wi sira me ookami wapena me yasuwowa maa enemik.

Wi Farisi ne wi Yuuda wiena weke sira ookami wapena baliwep yasuwap maa enimimik. Ne fofa epa-pa enowa wiar sesenarimik nain wiena koora ekapep baliwep yasuwap enimimik. Sira nain iiriw wiena weke-pa ekapok. Urupa, amina ne epira pun naap yasuwimik.

Ne aria wi Farisi nain naap wia urufap Yeesus nokaremik, “Moram no teeria-ke i sira ona iiriw kae-pa ekapok nain me yiar ookimik? Wapena me yasuwowa maa enimimik.” Ne wia maakek, “Ni wadol mua akena-ke. Iiriw ekera profet Aisaiya opora maek nain pepek nia maek, Mua Maneka feenap maek,

‘Wi teeria fain oram opaimika-pa yo unuma efa fakerimik. Nain wiena kema-pa me efa kema suuwimik.
Wi wadolalemi lotu efa onimik. Ne sira wia maakimik nain wiena miiw sira imenap wia ofakowimik.’
(Aisaiya 29.13)

Aria ni Mua Maneka opor makena nain fieniman, ne niena neke sira nain ookiman.” Yeesus opora nain wia maakemi opora fain wia maakek, “Aa, ni Mua Maneka opora wiar fienowa baliwep akena amisareman. Niena sira ooku naep Mua Maneka opora wiar fieniman. Ni sira fain baliwep oniman. 10 Iiriw ekera yiena nembesir Moses Mua Maneka-ke maakeya sira feenap wuak, ‘Niena neene niawi opora wia miimam-ikeka. Muuka-ko onak wiawi opora wia fienami opor samora wiinon-na muuka nain wia ifakimiwkin uminok.’ Naap maek. 11 Nain nis-ke feenap wia maakiman, ‘Niena neene niawi wia maakowen, “Yo maa unowa niowa ikem, nain iiriw Mua Maneka unuma-pa wuam, naeya ni niowa me pepek.”’ 12 Ni sira nain wia maakiwkin wiena onak wiawi me wia asipimik. 13 Ni naap onami Mua Maneka sira yia maakek nain fienap niena sira ookap mua naap wia maakiman. Ni anane sira unowa naapiw oniman.”

Wi sira samora onimik nain-ke wiam samorimik

(Matiu 15.10-20)

14 Wi Farisi teeria ne wi sira amis mua opora nain wia maakep-puap emeria mua nan ikemik nain wia fareya ekapiwkin feenap wia maakek, “Ni opora fain efar miimap kema aaweka. 15 Maa enimiman nain uroma niar oraiya, nain pokowa me nia samoriya, weetak. Ne maa-ko ni kema-pa niar ikok opaimika-pa kosiep oraiya nain-ke pokowa nia samoriya. 16 Aria ni woosa onaiya ikok-na opora fain miimap kema aaweka.”

17 Aria opora naap wia maakep-puami wia piipuap koora ikiwok. Koora-pa ikaeya ona teeria-ke arekin opora nain kemena nokaremik. 18 Naeya wia maakek, “Nis pun kema pukow marewa-kion aa. Ni kema-ko me suuwiman-i? Maa enowa enimiwkin uroma niar oraiya nain me nia samoriya, weetak. Moram maa enimimik nain kema me wiar oraiya. Oromi urom tepak-pa ikaiya, ne naap ikok siarimik.” Opora nain maemi maa momor enowa pun eliw, fariarowa marew naek.

20 Ne opor oko feenap maek, “Sira samora onowa kema-pa wiar ikaeya pina onimik nain-ke wia samorinon. 21 Moram kema samora fain mua kema-pa urupiya: uruw mia samora, maa wiar ikumarowa, mua wia ifakimowa, soma orowa, 22 maa ifemakep aawowa, murarow opora wia onowa, opor wadola, opor samo-samora aakunowa, maa unowa kema wiar kuowa, opor oram wia ifowa, wiena unuma wiam pirowa, Mua Maneka kema suuwowa marew iraparem-miowa. 23 Sira samo-samora nain-ke kema-pa wiar imenarep pina imenikuan.”

Owow oko emeria Yeesus opora wiar opeya wiipa wiar saliwak

(Matiu 15.21-28)

24 Yeesus opora nain wia maakep-puap iikirap Taiya kame wiar ikiwok. Fuunep koor oko wiar ikiwep nan ikua. Ne o nan ikua nain me efa amisaruk naek-na weetak. Wi owow mua unowa iiriw amisaremik. 25 Ne emeria oko nan ikua nain opora miimap ewur akena wiar ekapok. Emeria nain Grik opora aakuniya ne Sairofonesia-pa arimok. Ona wiipa gelemuta sawur-ke anirawap ikaiwkin Yeesus wiar ekapok. Ekapemi o miir onoma-pa keema muuna mikap omawami maakek, “Emawa, yo wiipa sawur-ke efar anirawap ikemik. Sira eliwa, no wia iirare aa.” 27 Naeya feenap maakek, “I Yuuda, kiikir yiena muuka wiipa maa enowa wienakimik. Muuka wiipa maa enakiwa wiar aawep siowa wienakowa nain sira-ko me ikua.”

28 Naap maeya emeria nain-ke maakek, “Oo Maneka, no pepek maen, nain takira maa enem-ikaiwkin sowa ururiya nain siowa-ke eliw wiar enimimik.” 29 Ne Yeesus-ke maakek, “No naap maen nain makena, aakisa eliw ikiwinan. Wi sawur nena wiipa mia-pa wiar ikemik nain iiriw piipuamik.” 30 Ne o koora ikiwok-na ona wiipa wiar sariarep esimsa-pa inep ikaeya urufak. Sawur iiriw piipuap ikiwemik.

Yeesus mua ifana kuok nain saliwak

31 Aria Yeesus Taiya kame-pa nan ikok kirep oromi Saidon owowa wiar fuunep oromi Dekapolis kame-pa puukap ikiwemi Galili eka saawirinowa-pa fuunek. 32 Nan ikaeya mua papako-ke mua oko aawep amapekapemik. Mua nain ifana kuok, ne aakunowa omaiwa-pa aakuniya. Mua nain pekapep Yeesus omawami maakemik, “Sira eliwa, no mua fain wapena mia-pa wiar wueya sariarinok aa.”

33 Naap maakiwkin Yeesus-ke mua nain aawep kua teekap ekak. Ne wapen tetelka ifana-pa wiar suuwap wapen tetelka oko opeka wuap omaiwa wiar tiimak. 34 Naap onami maara painep iinan mokakep, ewar kerew mufemi feenap maek, “Efata.” Opora nain kemena feenap, “Paaske”. 35 Naap maeya ewuriw akena ifana wiar sariareya maa miimap opora baliwep aakunek. 36 Yeesus mua nain saliwap-puap epap wi emeria mua wia maakek, “Ni mua papako me wia maakeka.” Naap wia maakek-na wia. Wi ikiwemi mua unowa wia maakiwkin meta manekarek.

37 Ne aria emeria mua papako nain miimap manek akena soranep maemik, “Pepek. O maa mauwa oniya nain eliw akena oniya. Maa fain pun pepek onak, wi ifana kuemik nain wia saliwak. Ne wi mua omaiwa-pa aakunemik nain wia saliweya baliwep aakunimik.”

Copyright information for `MHL