Matthew 10

Yeesus mua ten kuisow erup wia pepekimok

(Mak 3.13-19, Luk 6.12-16)

Aria Yeesus ona teeria mua ten kuisow erup wia farep uuwowa wiep wia sesekak. Wi sawur wia iiraruk, ne napuma sira-sira wia saliwuk naep wia sesekami ona kekanowa wiek. Wi aposel ten kuisow erup nain, wiena unuma feenap: Saimon, unuma oko Pita naek, ne ona weepe Andru pun, ne Sebedi muuka Yems Yon ikos, Filip, Batolomiu, Tomas, Matiu, eena takis aawow mua nain, aria Alfius muuka Yems, Tadeus, ne Saimon eena wi Rom anim onoma wia iirarinen naep onam-ikua mua nain, ne Yuudas Iskariot, os-ke Yeesus wi iiwua wapena-pa wiar wuinon.

Yeesus ona teeria uuwowa wia sesekak

(Mak 6.7-13, Luk 9.1-5)

Aria wi teeria nain uuwowa wia sesekami feenap wia maakek, “Ni ikiwemi wi Isrel owowa muutiw wiar ikiweka, ne owow oko-ko me wiar ikiweka, ne wi Samaria owowa pun me wiar ikiweka. Wi Isrel muutiw wiar ikiweka, wi Mua Maneka piipuap sipsip saarik mesenalep ikemik. Ikiwemi opora feenap manekeka, ‘Mua Maneka pika kemena-pa nia wuowa nain epa mamaiyarek.’ Naap wia maakeka. Ne napum mua wia saliweka, ne mua umiwkin-na wia iikiroweka, ne wi mia gigir ikemik nain wia saliweka. Wi mua inasina wia kuiwkin napumaremik nain sawur wia iirareka. Yo kekanowa fain sesa marew niem, naapeya nis pun oram wia asipeka. Ni ikiwemi maamuma maneka e gelemuta naap nain feekiya opap me ikiweka. 10 Ne niena sikiw maneka me aaweka, mia suuwowa ne meren suuwowa naap nain opap me ikiweka, wapen ore ikiweka. Ne soomarow kuuma pun me opaka. Maa muutitik nain ikoka teeria wia asipiman nain-ke nia asipikuan.

11 Ni owow maneka e owow gelemuta naap wiar ikiwep fuunep-na mua baliwep wia nokareka. Mua kain-ke mua eliwa ne kakeniw ikaeya-na mua nain wiar inem-ikok iir oko-pa owow oko ikiweka. 12 Aria ni owowa wiar kererep koora ikiwep-na mokomokoka feenap wia maakeka, ‘Ni kema eliwa ikeka,’ naap wia maakeka. 13 Ne koor onoma nain-ke kema eliwa nia naakep nia aawemi koora-pa nia wuiwkin-na opor eliwa nain neeke makenarinon. Ne me nia aawiwkin-na opor eliwa wieman nain makena me arinok. 14 Ne owowa papako e koora papako wiar fuuniwkin me nia aawiwkin-na, ne opora me nia miimiwkin-na owowa nain piipuami sira wia ofakowami kepur foma tukunep-puami ikiweka. 15 Yo maken akena nia maakiyem, ikoka wia mekawow epa-pa wi pina manek akena aawikuan. Iiriw wi Sodom ne Gomora pina muuta nain yoowa aawemik nain lawisiw maneka. Ne wis-ke ikoka pina muuta nain yoowa manek akena aawikuan!”

Yeesus teeria ikoka yoowa aawikuan

(Mak 13.9-13, Luk 21.12-17)

16 “Ni miimeka. Yo nia sesekamkun ni sipsip saarik ikiwemi wi mua siow asia saarik ikemik nain gone-pa uuwowen. Naapeya ni baliwep kema suuwap maa oneka, ne kema meliniw ikeka. 17 Nain ni maa urufami ikeka, yo muuta nain mua papako-ke nia opap anim onoma wapena-pa nia wuikuan, ne oko wiena lotu koora-pa nia wuap sarua niarikuan. 18 Ne nia opap opora-pa nia wuami nia pikiwep wi anim onom maneka ne owow saria wapena-pa nia wuikuan. Ne wi mokoka-pa yo opor makena nain ariman wia maakowen. Ne wi owow oko-oko mua pun opora nain wia maakowen. 19 Ne aria nia opap nia amapikiwiwkin-na ni kema samorarep kema unu-unowa me wueka, ‘opora kamenap maiyen,’ naap me maeka. 20 Moram ikoka niena kema-pa opora imenap me aakunowen, weetak. Mua Maneka Ewar Eliwa-ke kema niem-ikaeya aakunowen.

21 Ne ikoka yo muuta nain mua oko-ke weepe e wiamun opap pikiweya ifakimikuan. Ne wiawi pun wiena muuka sira naap onikuan, ne muuka wiipa-ke wiena onak wiawi sira naap wia onikuan. 22 Ne yo muuta nain mua papako-ke kema nia iririmem-ikaikuan. Ne mua kain-ke kekanep ikaiya nain ikoka miiwa fain weeserow epa-pa Mua Maneka-ke nia aaweya eliw ikowen. 23 Ne ni owow oko-pa ikaiwkin nia samoriwkin-na bauraremi owow oko ikiweka. Yo maken akena nia maakiyem, ni ikiwemi Isrel miiwa fain owow unowa me weeser-wuowa ikaiwkin yo Mua Muuka nainiw ekapinen.

24 Ne aria suule takira ona somek mua tepak-pa wiar ikaiya. Ne uuwow mua ona saria tepak-pa wiar ikaiya, o iinan me irinon. Suule takira uuwowa balisow oninon-na os pun ona somek mua pepekiw ikainon. Ne sira naapiw uuwow mua uuwowa balisow oninon-na ona saria pepekiw ikainon. 25 Aria yo sira eliwa oniyem, nain wi sawur samora Belsebul
10.25Belsebul Satan unuma oko-ke.
efa naimik. Naeya ni yena teeria-pa ikeman nain pun opor samora nia maakemi samor akena nia onikuan.”

Mua Maneka waisow muuta keker opowa-ke ikua

(Luk 12.2-9,51-53, 14.26-27)

26 “Naapeya ni me wia keker opaka. Moram maa kokotap-puamik nain ikoka ariman arinon, ne maa kokot ikua nain ikoka mua unowa amisarikuan. 27 Maa mauwa uura kokot nia maakem nain arimaniw maeka, ne maa mauwa ifan onoma-pa nia maakem nain epa maneka-pa iimarep manekiw maeka. 28 Wi mua nia ifakimimik nain mia muutiw niar ifakimimik, ne kukusa niar ifakimowa nain me pepek. Naapeya me wia keker opaka. Ni Mua Maneka ona waisow muuta keker opaka, moram o waisow mia ne kukusa eliw mukuna-pa niar wuinon. 29 Ni kema suuweka, nepa fiir maa oram nain maamuma gelemuta wuap aawimik. Nain niena Niawi-ke maa nain kakaltam-ikaiya, o me mainon-na kuisow fuluw me orainon, weetak. 30 Nis pun naap baliwep nia kakaltam-ikaiya, naeya niena ikiwos afif onoma kui-kuisow iiriw niar tuunap-puak. 31 Naapeya me wia keker opaka, moram nepa unowa nain maa oram-ke, ne nis-ke makena, nia kema suuwap nia kookal-afuriya. 32 Naapeya o mua yo yookami mua unowa mokok epa-pa wame wuinon-na yos pun ikoka owow iinan yena Auwa mokok epa-pa o unuma arimaniw unufinen. 33 Ne mua-ko mua unowa mokoka-pa mikikira yiinon-na yena Auwa mokok epa-pa o naap oninen.

34 Ni kema naap me wueka, yo ni miiw mua pokow eliwa nia pekapomam, naap me maeka, weetak. Yo ekapem fain ikoka irakowa niar imenarinon. 35 Naep yo muuta nain niam fo-fookowen. Feenap, ikoka muuka-ke ona wiawi iiwuarinon. Wiipa-ke ona onak iiwuarinon, ne wamekua-ke ona mua onak iiwuarinon. 36 Aria mua ona teeria kakeniw-ke o iiwuarikuan. 37 O mua ona onak wiawi manek akena wia kookalemi yo manek akena me efa kookaliya nain yo teeria-pa me efar ikainon. Ne o mua ona muuka wiipa manek akena wia kookalemi yo manek akena me efa kookaliya nain pun yo teeria-pa me efar ikainon. 38 Ne o mua ona nomokow moke me akuawep yookinon-na, yo teeria-pa me efar ikainon. 39 Aria o mua miiwa-pa feeke ona mia kookalowa weeserowinon-na, iiwawun mesenalinon. Ne o mua miiwa-pa feeke yo muuta nain pokow eliwa me aawinon-na ikoka owow iinan-pa Mua Maneka wameiya ikainon.”

Wi Yeesus teeria sira eliwa wia onimik nain kiripowa wiar ikainon

(Mak 9.41)

40 “Ni sira eliwa nia onimik nain yos pun sira eliwa efa onimik wia maiyem. Neemi yo sira eliwa efa onami Auwa eena efa sesekak nain pun sira eliwa onimik. 41 Mua oko-ko mainon, fain Mua Maneka profet-ke, naap wia naemi sira eliwa wia onimik nain ikoka Mua Maneka ona profet nain saliwami wis pun sira naap wia saliwinon. Ne mua oko-ko mainon, fain mua kakeniw-ke, naap maemi sira eliwa wia onimik. Nain ikoka Mua Maneka-ke mua kakeniw nain wia saliwami mua nain pun sira naap saliwinon. 42 Maken akena, mua ‘O Yeesus teeria-ke’ nefa naep eka dabela-ko nenakiya nain mua nain ikoka kiripowa wiar ikainon.”

Copyright information for `MHL