Matthew 13

Manin uuwowa arekin opora-ke

(Mak 4.1-9, Luk 8.4-8)

Aria fofa kuisow nainiw Yeesus koora piipuap orop eka saawirinowa ikiwep pona-pa pokap ikua. Ne o ookap warikamik nain mua unow akena. Naapeya orop aasa irap pokap ikok opora wafuram-ikua. Ne yakeyak nain saa-pa iimarep ikok opora wiar miimam-ikemik. O maa unow akena aakunemi arekin oporiw wia maakem-ikua. Feenap maek, “Aria iir oko-pa mua oko manina ikiwep maa makena fi-fien-ikiwok. Fi-fien-ikiwem-ikaeya makena papako era-pa oromakek nain nepa-ke enek. Ne papako nomon miiwa-pa oromakek nain baliwep me eliwarek. Ne ewur akena opa urupok, nain miiwa mareweya fiira miiw tepak me iwak. Nomon miiwa pun fiira kerewa me orok, ne ama-ke kuumeya iiwawun ififaromakek. Ne makena papako sipir unowa-pa oromakek nain sipira-ke arimemi muok. Ne papako miiw eliwa-pa oromakek nain-ke baliwep arimemi makena eliwa wuomakek. Papako eliw akena makenarep pinarep segulalep ikomakek, papako lawisiw eliwa makenarek. Ne papako orena wuomakek, makena naap wuiya. Ni ifan onaiya ikok-na opora fain kema wuepeka!”

Yeesus teeria-ke arekin opora kemena nokaremik

(Mak 4.10-12, Luk 8.9-10)

10 Ne aria Yeesus ona teeria-ke ekapep nokaremik, “No moram anane opor unowa wia maakemi arekin opora wia maakin?” 11 Ne wia maakek, “Mua Maneka pika kemena wiar ikowa opora nain kokot ikua nain ni yena teeriaiya opora fookap nia maakem, ne wi unowa weetak. 12 Naapeya o mua Mua Maneka kema suuwowa kekanow akena kema suuwiya nain Mua Maneka-ke amis maneka iwinon. Ne o mua kema suuwowa kekanowa me opiya nain Mua Maneka-ke amis gelemuta wiar ikua nain iiwawun wiar iirarinon. 13 Yo arekin oporiw wia maakiyem, nain moram, wi maa-ko urufowa urufimik ne ifana maa miimowa miimimik nain kema-ke me suuwimik. 14 Naapeya opora iiriw Mua Maneka ona profet Aisaiya opora maakek nain wiar pepek erak, feenap,

‘No ikiwep feenap wia maake,
“Makena akena, ni teeria fain opora miimowa miimowen, nain kema me suuwowen, ne mokoka maa urufowa urufowen, nain kema-ke me pukowen,” naap wia maake.
15 Moram wi teeria fain kema marew ne ifan otota ofomap ikemik, mokoka oparep ikomakemik. Naapeya maa me urufimik. Nain wiena mokoka-ke maa urufekamik ne ifana-ke maa miimekamik-na, ne maa kema suuwap kema kirekamik-na aa eliw, yo wia saliwekam.’
(Aisaiya 6.9-10)

Mua Maneka-ke naap maek.
16 Naapeya nia maakiyem, ni maa urufiman ne ifana maa miimiman nain kemelam-ikeka! 17 Maken akena nia maakiyem, ni aakisa maa urufomakiman nain iiriw wi Mua Maneka profet ne wi mua kakeniw ikemik nain urufowa manek akena kookalemik, nain me urufamik. Ne ni opora miimiman nain wi miimowa manek akena kookalemik, nain me miimamik.”

Yeesus arekin opora nain kemena fookap wia maakek

(Mak 4.13-20, Luk 8.11-15)

18 “Aakisa ni mua eena manina-pa maa makena fi-fienomakek nain kemena maemkun miimeka. 19 Feenap, maa makena eena era-pa oromakek nain feenap, wi mua Mua Maneka pika kemena wiar ekowa opora wiar miimami kemena me aawimik nain Satan-ke opor eliwa kema-pa wiar ikaiya nain wiar iirarinon. 20 Maa makena nomon miiwa-pa oromakek nain feenap, wi mua eena Mua Maneka opora wiar miimap kookalemi kemelimik. 21 Nain wi kema-pa me wuiwkin epa ekow marew, ne opor nain ookowa muuta nain pina ne opora-ke wia aaweya, ewuriw akena piipuimik. 22 Ne maa makena sipir unowa-pa oromakek nain feenap, wi mua opora miimimik nain kema-pa wiar ikaiya. Nain wiena miiw maa unowa fiirimowa nain kema iikirap Mua Maneka opora nain kema-pa kekanowa me wiar opimik. Naeya maa makena me wiar urufimik. 23 Ne maa makena miiw eliwa-pa oromakek nain feenap, wi mua eena opora miimap opa-afurami baliwep ookimik. Papako makena unow akena wuiya, ne papako lawisiw unowa wuiya, ne papako oro-orena wuiya. Naapeya wi mua nain uuwowa pun naap.” Naap wia maakek.

Sira eliwa ne sira samora wiam ookowap ikemik

24 Aria Yeesus kiiriw naapiw arekin opora oko wiemi feenap wia maakek, “Wi mua Mua Maneka pika kemena-pa wiar ikowa feenap saarik. Mua oko maa makena aawep manina-pa fi-fienak. 25 Uuwap ekapep owowa-pa ikaeya uura ona iiwua mua-ke ekapep sipir samor wowosa nain aawep manina-pa wiar fi-fien-iraparep-puami ikiwok. 26 Ne naap ikok maa eliwa nain eliwaremi makena wuak ne sipir samora nain pun feekiya eliwarek. 27 Ne uuwow mua-ke naap urufap ikiwep manin mua nain maakemik, ‘Saria, no nena maa makena eliwa fi-fienan nefa naemik. Nain sira kamenap naep sipira samora nain maa enowa bilik eliwaromakek noma?’ 28 Ne wia maakek, ‘Yo efa iiwuarow mua-ke naap efa onak.’ Ne maakemik, ‘Naapeya-na ikiwep sipira perekiyen-i?’ 29 Ne wia maakek, ‘Weetak, naap ikainok. Oko sipira nain perekami maa enowa opa feekiya perekowen. 30 Ere-erup naap ikok ariminok. Ne ikoka maa makena aawowa epa nain epeya uuwow mua feenap wia maakinen, “Sipira samora nain kiikir perekap purekap kuumeka. Aria naap onap-puap maa enowa muutiw fiirimep pikiwep yena enow koora-pa sepa wueka.” ’”

Nomokowa mastet makena arekin opora-ke

(Mak 4.30-34, Luk 13.18-21)

31 Ne aria Yeesus kiiriw nainiw arekin opora oko wia iromami wia maakek, “Mua Maneka pika kemena wiar ekiwkin teeria manekariya nain feenap saarik, mua oko nomokowa mastet maken mumua aawep manina-pa isakek. 32 Nomokowa papako mumua gelemutitik ikomakek, ne mastet mumua nain gelemutitik oram. Nain pia arimowa-ke manin maa muutitik nomakek. Nomokowa nain arimemi eke-ekeka wueya nepa-ke ekapep ekeka-pa unowa aawimik.”

33 Naap wia maakep-puami arekin opora oko wia iromami feenap wia maakek, “Mua Maneka pika kemena wiar ekiwkin teeria manekariya nain feenap, emeria oko yis aawep inasin emera onaiya kiripap nan wuap-pueya iiwawun arimiya.” Naap maek.

34 Aria opor unowa nain wia maakemi opor makena kemena fookap me wia maakem-ikua. Oram anian wia kaisomak. 35 Sira naap onak nain iiriw profet oko-ke opora maek nain makena akena wiar imenarek. Opora feenap,

“Yo opora maemi arekin oporiw nia iromiyem. Maa unowa iiriw miiwa fain imenaremi maa kokot ikua nain arekin oporiw iriyem.”
(Someka 78.2)

36 Aria Yeesus opora wia maakep-puap koora ikiwok. Ne ona teeria-ke ookap ikiwemi maakemik, “No arekin opora wia iromami wia maaken. Sipira manina-pa eliwarek nain aakisa i kemena fookap yia maake.” 37 Naeya wia maakek, “Mua maa makena eliwa manina-pa fi-fienak nain Mua Muuka ona, 38 ne manina nain miiw maneka fain maem. Maa makena eliwa nain wi emeria mua Mua Maneka opora wiar ookimik nain wia maem. Ne sipir samora nain wi mua sira samora onimik nain wia maem. 39 Mua eena sipir samora wowosa manina-pa wafurak nain Satan. Ne wit makena aawow epa nain miiwa fain weeserow epa, ne wi uuwow mua wia maem nain wi ensel. 40 Aria sipir samora fiirimep mukuna-pa kuumowa maem nain miiwa fain weeserow epa-pa neeke sira nain imenarinon. 41 Wi mua, mua papako wia peeskimiwkin sira samora-pa wakimik nain, ne wi mua sira samora onimik nain Mua Muuka-ke ona ensel wia sesekeya wia fiirimep mukuna anane naap ikaiya neeke wia wafuriwkin omemi enek muuna geegenem-ikaikuan. 43 Ne aria wi mua kakeniw ikemik nain-ke Auwa Mua Maneka owowa-pa o wameiya-pa ikok ama parina saarik pariniya ikaikuan. Aria ni ifan onaiya ikok-na opora fain miimap kema wueka! 44 Aria Mua Maneka pika kemena wiar ekowa kookalowa nain feenap saarik. Maa eliw akena miiw tepak-pa ikua. Ne mua oko-ke miiwa kuap imenap kiiriw soopak. Ne manek akena kemelami ikiwok. Ikiwemi ona maa unowa wiar ikua naap iiwawun sesekap maamuma aawep ekapemi miiw ara nain wiar sesenarek.

45 Ne Mua Maneka pika kemena wiar ekowa kookalowa nain pun feenap saarik. Mua oko omod onoma
13.45Omod onoma ifer maa-ke, ne balamakur papako tepak-pa ikaeya aawimik. Maa nain saawirinowa ne kia dubila, ne nain aawep maa bala onimik nain sesa maneka.
eliwa nain sesenarekam naep akupam-miek.
46 Akupam-miok eliw akena kuisow imenap ikiwemi ona maa unowa sesekap maamuma iiwawun aawep omod onoma nain sesenarek.

47 Aria Mua Maneka pika kemena wiar ekowa sira oko pun feenap saarik, mera sia ifera-pa wafurap mera sira-sira unowa aawimik. 48 Sia wafurap mera iwap taaneya mufep purupep pona-pa pokap ikok mera mekawimik. Mekawap mera eliwa tel-pa iparimik ne samora wafurimik. 49 Ne ikoka miiwa fain weeserow epa-pa sira naap akena imenarinon. Wi ensel-ke orop emeria mua wia mekawap wi mua samora wia fiirimep mukuna neeke wia wafuriwkin omemi wiena enek muuna geegenem-ikaikuan. Ne mua kakeniw ikemik nain eliw ikaikuan.” 51 Naap wia maakep weesereya wia nokarek, “Opora nia maakem fain ni-ko kema aaweman-i e weetak?” Ne maemik, “Ae, i kema aawemik.” 52 Ne wia maakek, “Sira naapeya-na wi sira amis mua Mua Maneka pika kemena wiar ekap sira unowa baliwep paayar-afurak nain o mua fain saarik oninon. O eena koor onoma mua ona maa eliwa awona enuma onaiya aaporop epa maneka-pa wuap wia ofakowinon.”

Yeesus ona owow mua-ke iiraremik

(Mak 6.1-6, Luk 4.16-30)

53 Aria Yeesus arekin opora nain wia maakep-puap wia piipuap ona owowa ikiwok. 54 Ikiwep nan ikok lotu koora-pa Mua Maneka opora suule wia onam-ikua. Ne wi opora naap miimap soranemi maemik, “O amis maneka naap nain kaanek aawok? Ne maa miililina onomakiya faa, naareke kekanowa iweya naap oniya noma? 55 I amisaremik, ona wiawi koora kuow mua-ke ne ona onak Maria. Ne ona wiamun unowa Yems, Yosep, Saimon ne Yuudas, wi nanemik. 56 Ne ona wekera unowa owowa fan-pariw ikemik. Nain o amisa fain kaaneke aawok?” 57 Naap maep o me kookalemik. Naeya os-ke wia maakek, “Sira naap ikua, wi owow oko oko mua-ke profet ekima opimik. Ne ona owow onoma-ke ne ona kaka-ke weetak,” naap maek. 58 Naapeya o opora me wiar ookiwkin maa miililina unowa me wia ofakowak.

Copyright information for `MHL