Matthew 15

Wi Yuuda wiena kae sira aakunemik

(Mak 7.1-13)

Aria naap ikok wi sira amis mua Yerusalem-pa ikemik nain wiam aawep Yeesus wiar ekapep nokaremik, “No teeria-ke wapena me yasuwowa maa enimimik. Moram yiena kae sira yiar puukimik?” Ne wia maakek, “Ne ni moram naep niena neke sira nain ookap Mua Maneka opora emina-pa wuiman, wuami sira puukiman? Mua Maneka feenap oneka nia maek,

‘Niena neene niawi opora wia miimam-ikeka.’
(Eksodas 20.12, Lo 5.16)

Ne opora fain pun maek,

‘Muuka-ko onak wiawi opora wia fienami opor samora wiinon-na muuka nain ifakimiwkin uminok.’
(Eksodas 21.17, Wok Pris 20.9)

Mua Maneka-ke naap maek.
Nain ni sira amis mua-ke feenap wia maakiman, ‘No nena neene niawi wia maakinan, “Yo maa unowa niowa ikem, nain iiriw Mua Maneka unuma-pa wuam, naeya ni niowa me pepek.” No naap onap neene niawi me wia kakaltowa pun eliw,’ naap wia maakiman. Naap maemi Mua Maneka sira emina-pa wuami niena sira nain miimowa-pa wuap kekanowiman. Ni mua wadola-ke. Naapeya iiriw profet Aisaiya opora maek nain pepek nia maek, Mua Maneka feenap maek,

‘Wi teeria fain oram opaimika-pa yo unuma efa fakerimik. Nain wiena kema-pa yo me efa kema suuwimik.
Wi wadolalemi lotu efa onimik. Ne sira wia maakimik nain wiena miiw sira imenap wia ofakowimik.’
(Aisaiya 29.13)

Mua Maneka-ke naap maek.”

10 Yeesus naap wia maakep-puami emeria mua unowa nain wia farek. Ekapiwkin wia maakek, “Ni opora fain miimap kema aaweka. 11 Maa enimiman nain uroma niar oraiya, nain pokowa me nia samoriya, weetak. Ne maa-ko ni kema-pa niar ikok opaimika-pa kosiep oraiya nain-ke pokowa nia samoriya.” Naap wia maakek.

12 Naap ikok ona teeria-ke ekap maakemik, “No wi Farisi opora maen nain nefar miimap kema eliwa me nefa naimik. Nain nena amisaren-i?” 13 Ne wia maakek, “Maa unowa Auwa iinan-pa ikua nain ona wapena-pa me upomakek nain ikoka perekikuan. 14 Naapeya wi me wia kema suuweka, neek ikauk. Wi wiena mokok opo-opaiw wiam aawep pikiwimik nain-ke. Naap onimik nain ikiwemi fuura-pa wakiep iiman iwikuan.”

15 Ne aria Pita-ke maakek, “Arekin opora maen nain i baliwep fookap yia maake.” 16 Ne wia maakek, “Nis pun kema pukow marewa-kion aa. 17 Ni kema-ko me suuwiman-i? Maa enimimik nain oromi uroma yiar oreya siarimik. 18 Ne maa mauwa mua kema-pa wiar imenareya opaimika-pa kosiep oraiya nain-ke ona wame samorami pina imeninon. 19 Kema samora naap nain-ke sira feenap nain imeniya, mua wia ifakimowa, soma orowa, uruw mia samora, ikumarowa, wadol opora onowa, murarow opora onami wia tuunowa ne sira papako naap nain imeniya. 20 Sira naap nain-ke mua pokowa wia samoreya pina imenikuan. Aria wapen yasuwowa marew maa enimimik nain-pa pina me imenikuan, weetak.” Naap wia maakek.

Yeesus owow oko emeria wiipa wiar saliwak

(Mak 7.24-30)

21 Aria Yeesus owowa nain piipuap Taiya ne Saidon kame wiar ikiwok. 22 Nan ikaeya Kenan owow emeria oko-ke ekapep omawami maakek, “Maneka, Dewit Muuka, yo efa kemalinan-i? Yo wiipa sawur-ke anirawap ikemik. Asipe aa.” 23 Naap omawami maakeya opora-ko me kiripomak. Naap oneya ona teeria-ke urufap ekap maakemik, “Ya, emeria fain maa mauwa kookalep maiya nain onomaya ikiwinok, o fan fare-yiokiya!” 24 Ne wia maakek, “Yo efa sesekeya orom fain ni Isrel sipsip saarik mesenalep ikeman nain niisow nia asipowa naep orom.” 25 Naap maeya emeria nain-ke ekami meren onoma-pa keema muuna mikami maakek, “Maneka, yo efa asipe akena nom!” 26 Naeya maakek, “Wiipa muuka

maa enowa enakiwa-ko wiar aawep siowa
15.26Wi owow oko mua-ke Mua Maneka sira me wiar amisaremik, naapeya wi Yuuda-ke “siowa” wia naemik. Yeesus pun emeria nain akimami aakunow sira nain ookak.
me wienakimik, weetak!”
27 Ne emeria nain-ke maakek, “Oo Maneka, no maken akena maen, nain wiena maa enimiwkin sowa wiar ururiya nain siowa eliw wiar enimimik.” 28 Naeya maakek, “Aite, yo kekanowa baliwep efar amisaren. Naapeya no maa mauwa kookalin nain naap akena imenarinok.” Naap maeya wiipa wiar sariarek.

Yeesus mua unowa wia saliwak

29 Ne aria Yeesus owowa nain piipuap Galili eka ponaiw ikiwemi ema urupep nan pokap ikua. 30 Nan ikaeya teeria maneka ookap ekapemik. Wi mua kuuma, wi meren agagilowa paara wia opap ikua nain, wi opaimik uuma nain, wi mokok opa nain ne napum sira-sira nain wia pekapemik. Wia pekapemi Yeesus miir onoma-pa wiar wuiwkin wia saliwam-ikua. 31 Ne wi mua unowa nain naap urufap soranemi kakaem-ikemik. Moram wi opaimik uuma nain aakisa aakunemik, paara wia opap ikua nain wi sariarep soomaremik, ne wi mua kuuma nain sariarep soomaremik, wi mokok opa nain mokoka wilinemi maa urufamik. Wi naap urufap kakaemi Mua Maneka unuma fakeramik.

Yeesus emeria mua tausen erepam maa enowa wienakek

(Mak 8.1-10)

32 Aria naap ikok Yeesus ona teeria wia farep ekapiwkin wia maakek, “Teeria maneka fain wia kemaliyem. Moram yo efamiya ikemik nain aakisa fofa arow kakeniw fan ikemik, ne wi maa enowa wiar weeserek. Naapeya yo oram me wia sesekinen. Oko iwam-ikok era-pa wuailep mia sekurarikuan.” 33 Naap maeya maakemik, “Epa owowa marew fain i maa enowa kaan naap imenap teeria maneka fain wienakiyen?” 34 Ne wia nokarek, “Ni emer ikowa kamin niar ikua?” Ne maakemik, “I emer ikowa ikur okaiwi-pa erup ne mera gelemutitik yiar ikua.” 35 Naeya teeria maneka wia maakeya miiwa-pa pokamik. 36 Pokiwkin emer ikowa mera onaiya aawep Mua Maneka sira eliwa naakep-puap wu-wuepap sererkap ona teeria wieya wienakemik. 37 Wi enep pepek eramik. Ne maa enowa enakiwa kirek nain inera-pa iparemik nain inera ikur okaiwi-pa erup taanomakek. 38 Wi mua muutiw wia tuunamik nain tausen erepam, emeria muuka wiipa me wia tuunamik. 39 Aria wia sesekeya owowa ikiwemik. Ikiwiwkin aasa aawep Magadan kame ikiwok.

Copyright information for `MHL